އިންޑިއާއި ޕާކިސްތާނާދެމެދު އުފެދިފައިވާ ހަމަނުޖެހުން ހައްލު ކުރުމަށް އެހީތެރިވާނެ ކަމަށް ސައޫދީ އަރަބިއްޔާގެ ފޮރިން މިނިސްޓަރު އާދިލް އަލް ޖުބައިރު ވިދާޅުވެއްޖެއެވެ.

ހުސްވި ހަފްތާގައި ކަޝްމީރުގައި ދިން ޖާނުން ފިދާވުމުގެ ހަމަލާގައި ކަޝްމީރުގެ އިންޑިއާ ސަރަހައްދުގައި 40 ސިފައިން މަރުވުމާއި ގުޅިގެން މި ދެ ގައުމުގެ ދެމެދުގައި ވަނީ ނުތަނަވަސްކަން އުފެދިފައެވެ.

މިހަމަލާގެ ޒިންމާ ޕާކިސްތާނުގެ "ޖައިޝް އީ މުހައްމަދު" ގުރޫޕުން ނަގާފައި ވާއިރު ޕާކިސްތާނުގެ ބޮޑު ވަޒީރު އިމްރާން ޚާން ވަނީ އިންޑިއާ ސަރުކާރުން ދޮގު ތުހުމަތުތައް ނުކޮށް އެކަމުގެ ހެކި ދެއްކުމަށް އިންޑިއާ އަށް ގޮވާލާފައެވެ. ސައޫދީ އަރަބިއްޔާގެ ވަލީ އަހްދު މުހައްމަދު ބިން ސަލްމާން އޭޝިއާގެ ގައުމުތަކަށް ކުރައްވާ ދަތުރުފުޅުގައި ޕާކިސްތާނަށް ވަޑައިގެންފައިވާއިރު އިންޑިއާއަށް ވެސް ވަޑައިގަތުމަށް ހަމަޖެހިފައި ވެއެވެ.

މި ހަމަނުޖެހުމާ ގުޅިގެން އިންޑިއާއިން ވަނީ ޕާކީސްތާނަށް އެތެރެކުރާ މުދަލުން އިމްޕޯޓް ޑިއުޓީގެ ގޮތުގައި ނަގާ މިންވަރު 200 އިންސައްތަ އަށް ބޮޑުކޮށްފައެވެ. ޕާކިސްތާނުގެ ފޮރިން މިނިސްޓްރީން އަންގާރާ ދުވަހު މިކަން ހައްލުކޮށްދިނުމަށް އދ. ގެ އެހީތެރިކަމަށްވެސް ގޮވާލާފައި ވެއެވެ.

ޕްރިންސްގެ މި ދަތުރުފުޅުގައި މި މައްސަލައާ ގުޅޭ ގޮތުން އިންޑިއާގެ އިސްވެރިންނާއި މަޝްވަރާކޮށް އަދި އިތުރަށް ސައުދީ އަރަބިއްޔާއާއި އިންޑިއާ އާދެމެދުގައި ވިޔަފާރީގެ ގުޅުން އިތުރަށް ބަދަހި ކުރުމާއި ގުޅޭ ގޮތުން ވެސް މަޝްވަރާ ކުރާނެ ކަމަށް މައުލޫމާތު ލިބެއެވެ.