ސައުދީ ވަލީއަހުދު މުހައްމަދު ބިން ސަލްމާން، ޕާކިސްތާނަށް ކުރެއްވި ދަތުރުފުޅު ނިންމަވާލެއްވުމަށް ފަހު ދެ ދުވަހުގެ ރަސްމީ ދަތުރުފުޅަކަށް އިންޑިއާއަށް ވަޑައިގަންނަވައިފިއެވެ.

ވަލީއަހުދު މުހައްމަދު އިންޑިއާގެ ނިއު ދިއްލީއަށް ވަޑައިގެންނެވީ އަންގާރަ ދުވަހުގެ ހަވީރުގެ ވަގުތެއްގައެވެ. ވަލީއަހުދަށް މަރުހަބާ ވިދާޅުވަން ވަޑައިގެންނެވީ އިންޑިއާގެ ބޮޑުވަޒީރު ނަރެންދުރަ މޯދީއެވެ.

އިންޑިއާގެ ހާރިޖީ ވުޒާރާއިން ބުނެފައިވަނީ ވަލީއަހުދު މޯދީއާއި އެކު ބާއްވަވާ ބައްދަލުކުރެއްވުންތަކުގައި މަޝްވަރާކުރައްވަން ހަމަޖެހިފައި ވަނީ، ވިޔަފާރިއާއި އިންވެސްޓްމަންޓްގެ ދާއިރާއިންނާއި، ސަލާމަތާއި ރައްކާތެރިކަމާއި ކައުންޓަރ ޓެރަރިޒަމްގެ އިތުރުން އިޔާދަކުރަނިވި ހަކަތައިގެ ދާއިރާއިން ކަމަށެވެ.

މީގެ އިތުރުން ސައުދީ ތެޔޮ ކުންފުނި، އަރަމްކޯއިން އިންޑިއާގެ ތެޔޮ ސާފުކުރާ ރިފައިނަރީތަކަށް ކޮށްފައިވާ އިންވެސްޓްތަކާއި ބެހޭގޮތުން ވެސް މަޝްވަރާކުރަން ވަނީ ހަމަޖެހިފައެވެ. ހާއްސަކޮށް އިންޑިއާގެ ހުޅަނގު އައްސޭރީގައި އެ ކުންފުނިން ހަދަމުން ދިޔަ 44 ބިލިއަން ޑޮލަރުގެ މަޝްރޫއު މަޑުޖެހިފައި އޮތް މައްސަލައަށް ހައްލެއް ހޯދުމަށް މަޝްވަރާކުރާނެ ކަމަށް ވަނީ ބެލެވިފައެވެ.

އިންޑިއާގެ މަހަރާޝްތްރާ ސްޓޭޓްގެ ޗީފް މިނިސްޓަރު ދަވެންދްރަ ފަދްނާވިސް ވަނީ، ދަނޑުވެރިންގެ ޝަކުވާތަކާއި ގުޅިގެން ސައުދީގެ ތެޔޮ ރިފައިނަރީ ޕްރޮޖެކްޓް އެހެން ސަރަހައްދަކަށް ބަދަލުކުރައްވާނެ ކަމަށް ވިދާޅުވެފައެވެ.

ސައުދީއަކީ އިންޑިއާގެ ހަތަރުވަނައަށް އެއްމެ ބޮޑު ވިޔަފާރީގެ ބައިވެރިޔާއެވެ. އެ ގޮތުން މި ދެ ގައުމުން ދަނީ އަހަރަކު 28 ބިލިއަން ޑޮލަރުގެ ވިޔަފާރި އެއް ގައުމު އަނެއް ގައުމާއި އެކު ކުރަމުންނެވެ. މީގެ އިތުރުން ސައުދީގައި އިންޑިއާގެ 2.7 މިލިއަން މީހުން ވަޒީފާ އަދާކުރެއެވެ. ފާއިތުވި 20 ވަރަކަށް އަހަރުގެ ތެރޭގައި މި ދެ ގައުމުން ވަނީ އެއް ގައުމު އަނެއް ގައުމާއި އެކު ވަރަށް ބޮޑަށް ގުޅުން ބަދަހިކޮށްފައެވެ.