ޗެލްސީގެ ކުޅުންތެރިން ތިބީ އެކުގައި ކަން ނޭނގޭ ކަމަށް އެ ކްލަބުގެ ކޯޗު މައުރީޒިއޯ ސާރީ ބުނެފިއެވެ.

ޔުނައިޓެޑު އަތުން 0-2 ގެ ނަތީޖާއިން ޗެލްސީ ބަލިވި މެޗަށް ފަހު ނޫސްވެރިންނަށް މައުލޫމާތު ދެމުން ސާރީ ބުނީ، ކުޅުންތެރިން އެކުގައި ތިބިކަން އޭނާއަށް ނޭނގޭ ކަމަށާއި، ނަމަވެސް އުންމީދަކީ އެކުގައި ތިބުން ކަމަށެވެ.

ސާރީ ބުނީ، ކުޅުންތެރިންނާއެކު އޮންނަ ގުޅުމަށް ވުރެ އޭނާއަށް މުހިންމީ ރަނގަޅަށް ކުޅެ، ނަތީޖާ ނެރުން ކަމަށެވެ. އަދި މިވަގުތު ކުޅުންތެރިންނާއެކު އޮތް ގުޅުން ރަނގަޅު ކަމަށް ވެސް އޭނާ ވަނީ ބުނެފައެވެ.

ސާރީ ބުނީ، ޗެލްސީން ގިނަ ކަންތައްތަކެއް ރަނގަޅު ކުރަން ޖެހޭ ކަމަށާއި، ކުރިޔަށް އޮތް ދުވަސްތަކުގައި އެކަމަށް ބުރަކޮށް މަސައްކަތް ކުރަން ޖެހޭ ކަމަށެވެ.

ޗެލްސީގެ ކޯޗުކަމުން ސާރީ ވަކިކޮށް، އެ މަގާމަށް ރެއާލް މެޑްރިޑްގެ ކުރީގެ ކޯޗު ޒައިނުއްދީން ޒިދާން ގެންނަން އުޅޭ ކަމަށްވެސް އަންނަނީ އަޑުތައް ފެތުރެމުންނެވެ.

ޗެލްސީގެ ކޯޗުކަމާ މިދިޔަ އަހަރުގެ ޖުލައި މަހު ސާރީ ހަވާލުވެފައިވާއިރު، އޭނާގެ އިރުޝާދުގެ ދަށުން ޗެލްސީން ވަނީ މިހާތަނަށް 42 މެޗު ކުޅެފައެވެ. އޭގެ ތެރެއިން 27 މެޗުން އެޓީމު މޮޅުވެފައިވާއިރު، ނުވަ މެޗުން ވަނީ ބަލިވެފައެވެ. ބާކީ ހަ މެޗު ނިމުނީ އެއްވަރުވެގެންނެވެ.

މި ސީޒަނުގެ ޕްރިމިއާ ލީގުގައި މިހާތަނަށް ޗެލްސީން 26 މެޗު ކުޅެފައިވާއިރު، އޭގެ ތެރެއިން މޮޅުވެފައި ވަނީ 15 މެޗުންނެވެ. ބާކީ ހަ މެޗުން އެޓީމު ބަލިވެފައިވާއިރު، އަނެއް ފަސް މެޗު ނިމުނީ އެއްވަރުވެގެންނެވެ.