ރާއްޖޭގައި ޕެރެމޯޓާ އިވެންޓެއް!

ސްކައި ގައިސްއިން އިންތިޒާމު ކޮށްގެން ރާއްޖޭގައި ފުރަތަމަ ފަހަރަށް ޕެރެމޯޓާ އިވެންޓެއް ބާއްވަން ނިންމައިފިއެވެ.

ކުރިއަށް އޮތް މާރޗު މަހު އެކަކުން 14 ގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މި ހަރަކާތުގެ މައިގަނޑު މަގްސަދަކީ ދިވެހިރާއްޖޭގެ ފަތުރުވެރިކަން ކުރިއެރުވުމެވެ. މީގެ އިތުރުން ވެސް ރާއްޖޭގައި ވައިގެ ކުޅިވަރުތަކަށް އާންމުންގެ މަގުބޫލްކަން ހޯދުމެވެ.

ސްކައި ގާއިސްގެ އޮޕަރޭޝަން މެނޭޖާ ހުސެން އަބްދުއްﷲ ރާއްޖެ އެމްވީއަށް މައުލޫމާތު ދެއްވަމުން ވިދާޅުވީ، ދުނިޔޭގެ އެކި ގައުމުތަކުން 10 ޕައިލެޓަކު މި ހަރަކާތުގައި ބައިވެރިވާނެ ކަމަށެވެ.

ހ.އ ތުރާކުނުން ފެށުމަށް ހަމަޖެހިފައިވާ މި ހަރަކާތުގައި މުޅިރާއްޖެ ބާރޑްސް އައި ވިއު ނުވަތަ ދޫންޏެއްގެ ލޮލުން ރާއްޖެ ފެންނަ ގޮތަށް ފޮޓޯއެއް ނެގިގެން ދާނެ ކަމަށް ހުސެން އަބްދުއްﷲ ވިދާޅުވިއެވެ. މި ފޮޓޯތަކުގެ އިތުރުން ފިލްމެއްގެ ގޮތުގައި މި ހަރަކާތްނިމުމުން ރާއްޖެ ފެނިގެންދާނެ ކަމަށް ވެސް އެ ބޭފުޅާ ވިދާޅުވިއެވެ.

15 ދުވަހުގެ ދިގު މި ހަރަކާތް ނިންމުމަށް ހަމަޖެހިފައިވަނީ ސ.ގަމުންނެވެ.

ޓުއަރިޒަމް މިނިސްޓްރީ އާއި ގުޅިގެން ހިންގުމަށް ހަމަޖެހިފައިމިވާ ހަރަކާތުގެ ސަލާމަތީ ކަންކަން ބެލެހެއްޓުމަށްޓަކައި މޯލްޑިވްސް ނެޝަނަލް ޑިފެންސްފޯރސް ހަރަކާތްތެރިވާނެ ކަމަށާއި، އޭވިއޭޝަން ސެކިއުރިޓީގެ ހުއްދަ ވެސް ލިބިފައިވާ ކަމަށް އިންތިޒާމު ކުރާ ސްކައި ގާއިސްއިން މައުލޫމާތު ދެއެވެ.

މި މަހުގެ ދެވަަނަ ދުވަހު ބ.އޭދަފުށީގައި ބާ ބީއާރް ކްރޯލްސް ފައްޓަވައި ދެއްވަމުން ޓުއަރިޒަމް މިނިސްޓަރ އަލީ ވަހީދު ވަނީ ރާއްޖޭގެ ފަތުރު ވެރިކަން ކުރި އެރުވުމަށް މުޅިރާއްޖެ ފެންނާނެ ފޮޓޯއެއް ނެގިގެން ދާނެ ކަމަށް ވިދާޅުވެފައެވެ.

ސްކައި ގާއިސްއިން އިންތިޒާމު ކޮށްގެން ކުރިއަށް ގެންދާ ޕެރަމޯޓާ އިވެންޓް ސްޕޮންސާ ކުރުމުގެ ފުރުސަތު ހުޅުވާލެވިފައިވާ ކަމަށް ސްކައި ގާއިސްއިން މައުލޫމާތު ދެއެވެ.