ރާއްޖޭގައި ބަބްލް ބޭޝް ފުޓުބޯޅަ މުބާރާތެއް ފަށައިފި

ސްރީ ލަންކާގެ އެޑިއުލިންކް އިންޓަރނޭޝަނަލް ކޮލެޖުގެ ސްޓޫޑެންޓް ޔޫނިއަނުން، އިންތިޒާމުކޮށްގެން ބާއްވާ ބަބްލް ބޭޝް ފުޓުބޯޅަ މުބާރާތް ފަށައިފި އެވެ.

ހޮނިހިރު ދުވަހު "ބަބްލް ބޭޝް ޓޯނަމެންޓް" ގެ ނަމުގައި މުބާރާތެއް ވަނީ ފަށައިފަ އެވެ. މި މުބާރާތް ހޮނިހިރު ދުވަހު ހަވީރު ހަތަރެއް ޖެހިއިރު ފަށާފައިވާއިރު، ރާއްޖެއެމްވީ އަށް މައުލޫމާތު ދެމުން މިކަން އިންތިޒާމުކުރުމުގައި އިސްކޮށް ހަރަކާތްތެރިވާ ހުސެއިން އަލީމް ބުނީ 10 ޖަހަންދެން މުބާރާތުގެ ކުޅުން ކުރިޔަށްދާނެކަމަށެވެ.

އެގޮތުން އޭނާ ބުނީ މުބާރާތް ކުރިޔަށްދާ އިރުވެސް ޓީމުތަކަށް ރަޖިސްޓްރީކޮށްގެން ކުޅެވޭނެ ކަމަށާއި، މިހާތަނަށް 1މުބާރާތުގައި 15 އަށްވުރެ ގިނަ ޓީމު ބައިވެރިވެފައިވާ ކަމަށެވެ.

މުބާރާތުގައި ހަތް ކުޅުންތެރިންގެ ޓީމަކަށް ބައިވެރިވެވޭއިރު، ކޮންމެ މެޗެއް ކުރިޔަށްދާނީ 10 މިނެޓުގެ ވަގުތަކަށެވެ. އެހެންނަމަވެސް ފަސް މީހުންގެ ޓީމުތައްވެސް އަންނަނީ ބައިވެރިކުރަމުންނެވެ.

ރާއްޖެއެމްވީ އަށް މައުލޫމާތު ދެމުން މި މުބާރާތުގައި ބައިވެރިވި ޓީމެއްގެ ކުޅުންތެރިޔަކު ބުނީ މިއީ ވަރަށް ތަފާތު ތަޖުރިބާއެއް ކަމަށާއި، މީގެކުރިން އެއްވެސް ވަރަކަށް މި ކުޅިވަރު ކުޅެފައިނުވާ ކަމަށެވެ. އެގޮތުން އޭނާ ބުނީ މިއީ ހީކުރާވަރަށްވުރެ ފަސޭހަ ކުޅިވަރެއް ކަމަށެވެ.

މި މުބާރާތުން އެއްވަނައަށްދާ ޓީމަކަށް 10،000 ރުފިޔާގެ އިނާމެއް ދިނުމަށް ވަނީ ނިންމާފައެވެ. ބަބްލް ފުޓްބޯޅައަކީ ފުޓްބޯޅަ ކުޅޭ ފަރާތްތައް ވައިޖަހާފައިވާ ބޮޑު ޕްލާސްޓިކް ބޯޅައެއްގެ ތެރެއަށް އެރި ތިބެގެން ކުޅޭ ކުޅިވަރެކެވެ.