ޕާކިސްތާނާއެކު ސައުދީން 20 ބިލިއަން ޑޮލަރުގެ ވިޔަފާރީގެ އެއްބަސްވުންތަކުގައި ސޮއިކޮށްފި
18 ފެބުރުއަރީ 2019 | ހޯމަ 05:14ވަލީއަހުދާއި އެކު، އެ ގައުމުގެ ކެބިނެޓް މިނިސްޓަރުންނާއި ބޮޑެތި ވިޔަފާރިވެރިންނާއި ވެސް ވަނީ ބައިވެރިވެ ވަޑައިގަންނަވާފަ
ޕާކިސްތާނުގެ ބޮޑުވަޒީރު އިމްރާން ޙާން އަދި ވަލީއަހުދު މުހައްމަދު ބިން ސަލްމާން
ސައުދީ ވަލީއަހުދު މުހައްމަދު ބިން ސަލްމާން ޕާކިސްތާނަށް ކުރައްވަމުން ގެންދަވާ ފުރަމާނަ ދަތުރުފުޅުގައި، ޕާކިސްތާނާއި އެކު 20 ބިލިއަން ޑޮލަރުގެ ވިޔަފާރީގެ އެއްބަސްވުންތަކުގައި ސޮއިކޮށްފިއެވެ.
ވަލީއަހުދު މުހައްމަދު ޕާކިސްތާނުގެ ވެރިރަށް އިސްލާމްއާބާދަށް ވަޑައިގެންނެވީ އާދިއްތަ ދުވަހުގައެވެ. ވަލީއަހުދަށް މަރުހަބާ ކިޔާފައި ވަނީ ޕާކިސްތާނުގެ ބޮޑުވަޒީރު އިމްރާން ޙާންއެވެ. އަދި ބޮޑު ވަޒީރުގެ ރަސްމީ ގެކޮޅަށް ވަލީއަހުދާއި އެކު ކާރުކޮޅު ދުއްވާފައި ވަޑައިގެންނެވީ ބޮޑުވަޒީރު އަމިއްލަފުޅަށެވެ.
ސައުދީ ވަލީއަހުދާއި އެކު، އެ ގައުމުގެ ކެބިނެޓް މިނިސްޓަރުންނާއި ބޮޑެތި ވިޔަފާރިވެރިންނާއި ވެސް ވަނީ ބައިވެރިވެ ވަޑައިގަންނަވާފައެވެ. އިމްރާންއާއި އެކު ބޭއްވި ބައްދަލުކުރެއްވުމަށް ފަހު ވަލީއަހުދު ވިދާޅުވެފައި ވަނީ ކުރިޔަށް އޮތް ތަނުގައި ވެސް ޕާކިސްތާނާއި އެކު ވިޔަފާރީގެ ގުޅުން އިތުރު ކުރާނެ ކަމަށް ވަނީ ވިދާޅުވެފައެވެ.
ވަލީއަހުދުގެ ދަތުރުފުޅާއި ގުޅިގެން އިސްލާމްއާބާދުގެ ގިނަ މަގުތަކަކާއި ވައިގެ ސަރަހައްދު ވަނީ ބަންދުކޮށްފައެވެ. އަދި ބައެއް ހިސާބުތަކުން މުއާސަލާތީ ހިދުމަތް ވެސް ވަނީ ކަނޑާލާފައެވެ. ހޯމަ ދުވަހަކީ ރަސްމީ ބަންދު ދުވަހެއް ކަމަށް ވެސް ޕާކިސްތާނުން ވަނީ ކަނޑައަޅާފައެވެ.
ވަލީއަހުދު މުހައްމަދު ވެގެން ދާނީ އިމްރާން ޙާން ވެރިކަމަށް އައި ފަހުން ޕާކިސްތާނުގެ ބޮޑުވަޒީރުގެ ރަސްމީ ގެކޮޅުގައި އުޅުއްވާ ފުރަތަމަ މެހެމާނަށެވެ. ބޮޑުވަޒީރުކަމާއި ހަވާލުވެވަޑައިގެން އިމްރާން ވަނީ ބޮޑުވަޒީރުގެ ރަސްމީ ގެކޮޅުގައި ދިރިއުޅުއްވަން ދެކޮޅު ހައްދަވާފައެވެ.
ސައުދީއާއި އެކު ޕާކިސްތާނުން އެއްބަސްވުންތަކުގައި ސޮއިކޮށްފައި މި ވަނީ އެ ގައުމުގެ އިގްތިސާދީ ހާލަތު ވަރަށް ހީނަރުވެފައިވާ ދަނޑިވަޅެއްގައެވެ. އެގޮތުން އެ ގައުމުގެ ދަރަނިން ސަލާމަތްވުމުގެ ގޮތުން ޕާކިސްތާނުން ވަނީ އިންޓަނޭޝަނަލް މަނިޓަރީ ފަންޑުގެ އެހީއަކަށް އެދިފައެވެ.
