ސައުދީން އިސްރާއީލާއި އެކު އިޤުތިޞާދީ ގުޅުން ޤާއިމް ކުރަނީ

އިޤުތިޞާދީ ގުޅުން ޤާއިމް ކުރުމާއި ގުޅޭގޮތުން ސައުދީ އަރަބިއާ އާއި އިސްރާއީލުން ރަސްމީ މަޝްވަރާތައް ފަށައިފިއެވެ.

ސައުދީ އާއި އިސްރާއީލުގެ އިތުރުން އެމެރިކާގެ އޮފިޝަލުންނާއި ހަވާލާދީ އިސްރާއީލުގެ ނޫސްތަކުގައި ބުނެފައިވަނީ، ސައުދީ އާއި އިސްރާއީލާއި ދެމެދު އިޤުތިޞާދީ ގުޅުން ފަށާނީ ލުއި ގުލުންތަކާއި ހުއްދަތަކުން ކަމަށެވެ. އެގޮތުން، އިސްރާއީލުގެ ވިޔަފާރިވެރިން ސައުދީގައި ވިޔަފާރި ކުރުމުގެ ހުއްދަ ދިނުމާއި، އިސްރާއީލުގެ ޤައުމީ އެއާލައިނަށް ސައުދީގެ ވައިގެ ސަރަޙައްދަށް ވަނުމުގެ ހުއްދަ ދިނުން ހިމެނެއެވެ.

ސައުދީގެ ބައެއް އޮފިޝަލުންނާއި ހަވާލާދީ އިނގެރޭސިވިލާތުގެ ނޫސްތަކުން ބުނެފައިވަނީ، މިއީ އެމެރިކާގެ ރައީސް ޑޮނާލްޑް ޓްރަމްޕްގެ އިސްނެންގެވުމުގެ މަތިން، މެދުއިރުމައްޗަށް ސުލްޙަ ގެނައުމަށް ކުރަމުންދާ މަސައްކަތުގެ މުހިއްމު ބައެއް ކަމަށެވެ.

އެމެރިކާގެ ބައިވެރިވުމާއި އެކު ސައުދީ އާއި އިސްރާއީލުގެ ގުޅުން ބަދަހިވާ މައްސަލައިގައި އެމެރިކާގެ ސަރުކާރުގެ ތެރޭގައި ވަނީ ދެބަސްވުންތައް އުފެދިފައެވެ. އެގޮތުން، ސައުދީ އާއި އިސްރާއީލުގެ ގުޅުން ބަދަހިވެގެން ދިއުމަކީ، އިސްރާއީލާއި ފަލަސްޠީނާއި ދެމެދު ސުލްޙަ ޤާއިމް ކުރުމަށް ކޮށާލެވޭ މަގަކަށް ވެގެން ދާނެ ކަމަށް، ސައުދީ ވަލީ އަހުދުގެ ނައިބު، މުޙައްމަދު ބިން ސަލްމާނާއި ގާތް ގުޅުމެއް ބާއްވަވަމުން އަންނަ، ޓްރަމްޕްގެ މުޝީރު އަދި ދަނބިދަރިކަލުން ޖެރާޑް ކްރުޝްނަރ ދެކިލައްވައެވެ. ނަމަވެސް ޓްރަމްޕް ސަރުކާރުން މެދުއިރުމައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު، ޖޭސަން ގްރީންބްލެޓް ދެކިލައްވާ ގޮތުގައި ފަލްސްޠީނާއި އިސްރާއީލުގެ މިނިވަން ކަމަކީ، ސުލްޙަ ޤާއިމް ކުރުމަށް ޒަމާނުއްސުރެ ބޭނުންކުރަމުން އައި އުކުޅުތައް ބޭނުންކޮށްގެން މެނުވީ ގެނެވޭނެ ސުލްޙައެއް ނޫނެވެ.

އެމެރިކާގެ އެހީތެރިކަމާއިއެކު ސައުދީން އިސްރާއީލާއި އެކު ވިޔަފާރީގެ މަޝްވަރާތައް ފަށާފައިވާއިރު، މި މަޝްވަރާތަކާއިމެދު ފަލަސްޠީނުގެ ރައްޔިތުން ވަނީ ކަންބޮޑުވުން ފާޅުކޮށްފައެވެ. އެގޮތުން، މި މަޝްވަރާތަކުގެ ސަބަބުން ފަލަސްޠީނު މިނިވަން ކުރުމުގެ މަސައްކަތަށް އަހައްމިއްޔަތުކަމެއް ނުދެވި، އަރަބި ޤައުމުތަކުން އިސްރާއިލާއި އެއްކޮޅަށް އަރާފާނެކަމުގެ ބިރު އޮތްކަމަށް އެފަރާތްތަކުން ބުނެއެވެ.

ފަލަސްޠީނުގެ މިނިވަންކަމަށް ތާއީދުކުރާ ހަމާސް ފަދަ ޖަމާޢަތްތަކާއި ގުޅުން ބާއްވާ ކަމަށް ބުނެ، ދާދިފަހުން ގަލްފުގެ ބައެއް ޤައުމުތަކުން ޤަތަރާއި ގުޅުން ކަނޑާލުމާއިއެކު، އިސްރާއީލުގެ ޑިފެންސް މިނިސްޓަރު ވަނީ ގަލްފު ޤައުމުތަކުގެ އެ ނިންމުމަކީ އެ ޤައުމުތަކާއި އިސްރާއީލާއި ދެމެދު ގުޅުން ރަނގަޅު ކުރުމަށް އެޅުނު މުހިއްމު ފިޔަވަޅެއްގެ ގޮތުގައި ސިފަ ކުރައްވާފައެވެ.