ނައިޖީރިއާގެ އާޢްމު އިންތިޚާބާއި މަޖިލީހުގެ އިންތިޚާބު ހަފްތާއަކަށް ފަސްކޮށްފި

ނައިޖީރިއާގެ ރިޔާސީ އިންތިޚާބާއި ގާނޫނުހަދާ މަޖިލީހުގެ އިންތިޚާބު ހަފްތާއަކަށް ފަސްކޮށްފިއެވެ.

އިންތިޚާބު ފަސްވިކަން އިންޑިޕެންޑެންޓް އިލެކްޝަން ކޮމިޝަނުން އިއުލާނުކުރީ ހޮނިހިރު ދުވަހު ވޯޓް ނެގުމަށް އެންމެ ފަސް ގަޑިއިރަށް ވެފައިވަނިކޮށެވެ.

"ތާވަލާ އެއްގޮތަށް އިންތިޚާބު ކުރިޔަށް ގެންދިއުމަކީ ކުރެވޭނެކަމެއް ނޫން" ކޮމިޝަންގެ ޗެއަރމަން މަހްމޫދު ޔަކުބޫ ވިދާޅުވިއެވެ.

ލޮޖިސްޓިކް މަސައްކަތްތައް ނުކުރެވިގެން ކަމަށް ބުނެ ފަސްކުރި އިންތިޚާބު މިހާުރު ބޭއްވުމަށް ނިންމާފައިވަނީ ފެބްރުއަރީ 23 ވާ ހޮނިހިރު ދުވަހުއެވެ.

އިންތިޚާބު ފަސްކުރިކަން އިއުލާނު ކޮށްފައިވަނީ ވެރިރަށް އަބޫޖާގައި ހުންނަ އިންޑިޕެންޑެންޓް އިލެކްޝަން ކޮމިޝަނުގެ އިދާރާގައި ބޭއްވި ކުއްލި ބައްދަލުވުމަކަށްފަހުއެވެ.

އިންތިޚާބު ބޭއްވުމަށް ބޭނުންވާ ސާމާނު އެ ގައުމުގެ 36 ސްޓޭޓްގެ ތެރެއިން ބައެއް ސްޓޭޓްތަކަށް ނުލިބޭކަމަށް ވެސް ޔަކުބޫ ވިދާޅުވިއެވެ.

ރިޔާސީ އިންތިޚާބުގައި 73 ކެނޑިޑޭޓުން ވާދަކުރާއިރު އިންތިޚާބުގެ ކެމްޕެއިންގައި ލީޑުކުރައްވަނީ މިހާރުގެ ރައީސް އުމުރުފުޅުން 76 އަހަރުފުޅުގެ މުހައްމަދު ބުހާރީއާއި އޭނާގެ ވާދަވެރިޔާ ކުރީގެ ރައީސް އުމުރުފުޅުން 72 އަހަރުފުޅުގެ އަތިކު އަބޫބަކްރުއެވެ