ފާރުގެ މައްސަލައިގައި ރައީސް ޓްރަމްޕް ކުއްލި ހާލަތު އިއުލާން ކުރައްވަނީ
15 ފެބުރުއަރީ 2019 | ހުކުރު 09:53ފާރުގެ މައްސަލައިގައި ސަރުކާރު ހުއްޓުމަކަށް އައި
ސަރަހައްދީ ރޮނގުގައި ފާރު ރޭނުމަކީ ރައީސް ޓްރަމްޕްގެ ރިޔާސީ ވައުދެއް
އެމެރިކާއާއި މެކްސިކޯއާއި ދެމެދު އެޅުމަށް ރައީސް ޓްރަމްޕް ނިންމަވާފައިވާ ފާރުގެ މަސައްކަތަށް ބޭނުންވާ ފައިސާ ހަމަ ޖެއްސުމަށް ކުއްލި ހާލަތު އިއުލާން ކުރައްވާނެކަމަށް ވައިޓް ހައުސްއިން ބުނެފިއެވެ.
މި ފިޔަވަޅާއެކު ގާނޫނު ހަދާ މަޖިލީހުގެ ރުހުން ލިބިވަޑައިނުގަތް ނަަމަވެސް ރައީސް ޓްރަމްޕްއަށް ފާރުގެ މަސައްކަތް ކުރިޔަށް ގެންދެވޭނެއެވެ. ގާނޫނު ހަދާ މަޖިލީހުންވަނީ ފާރުގެ މަސައްކަތް ކުރިޔަށް ގެންދިއުމަށް ބަޖެޓް ދިނުމަށް ދެކޮޅު ހަދާފައެވެ.
ޑެމޮކްރޭޓުންގެ އިސް ބޭފުޅުންވަނީ ރައީސް ޓްރަމްޕް ބާރުގެ ބޭނުން ނަަހަމަގޮތުގައި ހިއްޕަވަނީ ކަމަށް ތުހުމަތުކުރައްވާ އެ މަނިކުފާނުގެ އަމަލަކީ ގާނޫނުގެ ބާރު ކަނޑުވާލުމެއްކަމަށް ސިފަކުރައްވާފައެވެ. ރިޕަބްލިކަން ޕާޓީގެ އެތައް މެމްބަރުންނެއްވެސްވަނީ ކަންބޮޑުވުން ފާޅުކުރައްވާފައެވެ.
އެމެރިކާއާއި މެކްސިކޯ ގުޅޭ ސަރަހައްދީ ރޮނގުގައި ފާރެއް ބިނާކުރެއްވުމަކީ ރައީސް ޑޮނަލްޑް ޓްރަމްޕްގެ ކެމްޕެއިންގެ މައިގަނޑު އެއްވައުދެވެ.
ކުއްލި ނުރައްކަލުގެ ހާލަތު އިއުލާނު ކުރެެއްވުމުން ރައީސް ޑޮނަލްޑް ޓްރަމްއަށް ގާނޫނީ ގޮޮތުން އެއްވެސް ގޮންޖެހުމަކާ ނުލައި ރިޔާސީ އިތުރު ބާރުތައް ބޭނުންކުރެއްވޭއިރު ފާރުގެ މަޝްރޫއަށް ބޭނުންވާ އެތައް ބިލިއަން ޑޮލަރެއް ހަމަޖެއްސެވޭނެއެވެ.
ފާރުގެ ޚަރަދު ނުހިމަނައި ކޮންގްރެސްއިން ފާސްކޮށްފައިވާ ބިލް ތަސްދީގު ކުރައްވާނެކަމަށް ރައީސް ޓްރަމްޕްވަނީ ބުރާސްފަތި ދުވަހު އެއްބަސްވެ ވަޑައިގެންފައެވެ. ފާރުގެ ޚަރަދު ހިމަނައިގެން ބިލް ފާސް ކުރުމަށް ރައީސް ޓްރަމްޕް ބާރު އަޅުއްވަމުން ގެންދެވުމާއެކު ޑެމޮކްރޭޓުން ދިޔައީ އެކަމަށް ދެކޮޅު ހަދަމުންނެވެ. ނަތީޖާއެއްގެ ގޮތުން ބިލް ފާސްނުކުރެވި ދައުލަތުން ޚަރަދު ކުރުން ހުއްޓި އެމެރިކާގެ ތާރީޚުގައި މިހާތަނަށް އެންމެ ދިގު މުއްދަތަކަށް ސަރުކާރު ހުއްޓުމަކަށް އައިސްފައިވާ ފަހަރަށް މި ފަހަރުވަނީ ވެގެންގޮސްފައެވެ.35 ދުވަހަށް ސަރުކާރު ހުއްޓި 800،000 މުއްވައްޒަފުންނަށް އެކަމުގެ އަސަރުކޮށްފައިވެއެވެ.
