އެމްއެމްޕީއާރުސީއިން ވަނީ 1.3 ބިލިއަން ރުފިޔާގެ ޚިޔާނާތުގައި ހިމެނޭ މީހުން އިއްޔެ އާންމުކޮށްފައި
ރައީސް ސޯލިހު
އެމްއެމްޕީއާރުސީގެ ތަގުގީގީ ރިޕޯޓު އޭސީސީން ބުރާސްފަތި ދުވަހު ހާމަކޮށްފައިވާއިރު، އެ ރިޕޯޓުގައި ހިމަނާފައިވާ މިސަރުކާރަށް ނިސްބަތްވާ ބައެއް ބޭފުޅުން ގޭގައި މަޑުކުރަން އެންގުމަކީ ކޮރަޕްޝަނަށް މި ސަރުކާރުގެ ތެރެއިން އެއްވެސް ފުރުސަތެއް ނޯންނާނެކަންކަމަށް ބުނެ ރައީސް އިބްރާހިމް މުހައްމަދު ސޯލިހަށް ތައުރީފު ކޮށްފިއެވެ.
އެމްއެމްޕީއާރުސީގެ ޚިޔާނާތް އާންމުކޮށް ފައިވާއިރު އޭގައި އެންމެ ގިނަ ފައިސާ ވަދެފައިވާ އެސްއޯއެފްގެ މުއާމަލާތްތަކެއްގައި ހިމެނިވަޑައިގަންނަވާ ޔޫތު މިނިސްޓަރު އަހުމަދު މަހުލޫފާއި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ގޭގައި މަޑުކުރައްވަން ވަނީ އަންގަވާފައެވެ. އެ ޚިޔާނާތުގައި މަޖިލިހުގެ ބައެއް މެމްބަރުންނާއި އަމިއްލަ ކުންފުނިތަކުން ވެސް އެސްއޯއެފާ އެކު ޑޮލަރުގެ މުއާމަލާތްތައް ހިންގާފައިވެ އެވެ.
އެކަމާއި ގުޅިގެން ކުރީގެ ބަންޑާރަ ނައިބު ހުސްނުއް ސުއޫދު ކުރެއްވި ޓްވީޓުގައި ވިދާޅުވީ ރައީސް ނިންމެވި އެ ނިންމެވުމުން ދެއްވި ފަދަ ރަނގަޅު މެސެޖެއް މި ގައުމުގެ ވެރިއަކު މި ގަރުނުގައި ވެސް ދެއްވާފައި ނެތް ކަމަށާއި އެމަނިކުފާނަށް ސާބަސް ދަންނަވާކަމަށެވެ.
ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ފަރާތުން ހިންނަވަރު ދާއިރާ އަށް ވާދަކުރައްވާ ޖީހާން މަހްމޫދްގެ ކެމްޕެއިން ލޯންޗްކޮށް ދެއްވަމުން ރައީސް ސޯލިިހު ވިދާޅުވީ، އޭސީސީން މިއަދު އެމްއެމްޕީއާރުސީގެ 1.3 ބިލިޔަން ރުފިޔާގެ ކޮރަޕްޝަނުގެ ރިޕޯޓް އާންމު ކުރުމަކީ ރަނގަޅު ކަމެއް ކަމަށެވެ. ނަމަވެސް އެ މައްސަލަ ބަލާ ނިމުނުތަ ތިން އަހަރު ވަންދެން އެ ރިޕޯޓް ހާމަނުކޮށް ބޭއްވީ ކީއްވެގެންތޯ ސުވާލު އުފެދޭ ކަމަށް ރައީސް ސޯލިހު ބުރާސްފަތި ދުވަހުގެ ރޭ ވަނީ ވިދާޅުވެފައެވެ.
ރައީސް ސޯލިހު ވަނީ ކޮރަޕްޝަނާ ދެކޮޅަށް ކުރަންޖެހޭ ހުރިހާ ކަމެއް އެމަނިކުފާނުގެ ސަރުކާރުން ކުރާނެ ކަމުގެ ޔަގީންކަން ދެއްވާފަ އެވެ. އެގޮތުން އެމްއެމްޕީއާރުސީ ހިޔާނާތުގެ ރިޕޯޓުގައި ހުރި ވަކިވަކި މީހުންގެ މައްސަލަތައް ބަލާ ކުއްވެރި ނުވާ މީހަކު ހުރިނަމަ، އޭނާގެ ކުށެއް ނެތް ކަމަށް ކަނޑައަޅައި ދިނުމަށް ވެސް ރައީސް ސޯލިހު އޭސީސީ އަށް ގޮވާލެއްވި އެވެ.
