ރައީސް ޔާމީންގެ ސިޔާސީ ތާއީދު އެ ދަނީ ފުނޑެމުން، ސައުދުގެ ނިންމެވުމަށް މަރުހަބާ: ރައީސް ނަޝީދު
2 އެޕްރީލު 2017 | އާދީއްތަ 21:45ރައީސް ޔާމީނަށް މަޖިލީހުގައި އޮތް ތާއީދުވެސް ދަނީ ފުނޑެމުން
ރައީސް ނަޝީދު
ރައީސް ޔާމީންގެ ސިޔާސީ އަދި މަޖިލީހުގައި އޮތް ތާއީދުވެސް އެ ދަނީ ފުނޑެމުން ކަމަށް ކުރީގެ ރައީސް މުހައްމަދު ނަޝީދު ވިދާޅު ވެއްޖެއެވެ.
ރައީސް ނަޝީދު މިހެން ވިދާޅުވީ، ގއ. ވިލިނގިލީ ދާއިރާގެ މެމްބަރު ސައުދު އިސްލާހީ މަސައްކަތްތަކުގައި އިދިކޮޅު ފަރާތްތަކާއެކު މަސައްކަތް ކުރައްވަން ނިންމެވިކަން އިއުލާން ކުރެއްވިތާ ކުޑަ އިރުކޮޅެއްގެ ތެރޭގައި އާދިއްތަ ދުވަހުގެ ރޭ ކުރެއްވި ޓުވީޓެއްގައެވެ.
ރައީސް ނަޝީދުގެ ޓުވީޓުގައި ރައްޔިތުންނާ އެއްކޮޅަށް މަސައްކަތް ކުރައްވަން ނިންމެވީތީ މެމްބަރު ސައުދަށް މަރުހަބާ ދަންނަވާ ކަމަށް ވިދާޅުވެފައިވެއެވެ.
ރައީސް ނަޝީދުއާއި، ރައީސް މައުމޫންއާއި، ޝެއިޚް އިމްރާން އަދި އޮނަރަބަލް ގާސިމް އިބްރާހިމް ގުޅިވަޑައިގެން ފައްޓަވާފައިވާ އިސްލާހީ މަސައްކަތާއެކު މެމްބަރު ސައުދު ކުރިއަށް ވަޑައިގަންނަވަން ނިންމެވިކަން އިއުލާން ކުރެއްވީ އާދިއްތަ ދުވަހުގެ ރޭ އިރާކޮޅުގެ ވަގުތެއްގައެވެ.
