ބޭންކިންގ އެންޑް ފައިނޭންސްގެ ދާއިރާއިން މަތީ ތަޢުލީމް ހާސިލު ކުރުމަށް ބޭނުންވާ ފަރާތްތަކަށް "ބީއެމްއެމްއެލް ރިވެލި" ނަމުގައި ހާއްސަ ޕްރޮގްރާމެއް ބޭންކް އޮފް މޯލްޑިވްސް އިން އިފްތިތާހު ކޮށްފިއެވެ.
ބީއެމްއެލް ރިވެލި ޕްރޮގްރާމްގެ ދަށުން ވިލާ ކޮލެޖާ ގުޅިގެން ބޭންކުން ފުރަތަމަ ތަޢާރަފް ކޮށްފައިވަނީ ޑިޕްލޮމާ އިން ބޭންކިންގ އެންޑް ފައިނޭންސްގެ ކޯހެކެވެ. މި ކޯހުގެ މަގްސަދަކީ ޒުވާނުންނާއި އަދި ބޭންކިންގ ދާއިރާއިން ކުރިށްދާން ބޭނުންވާ ފަރާތްތަކަށް، އެ ދާއިރާއިން ކުރިއަށް ދިޔުމަށް ބޭނުންވާ ތަޢުލީމާއި ހުނަރު ދަސްކޮށްދީ އަދި ރާއްޖޭގެ ބޭންކިންގ ޞިނާއަތަށް ބޭނުންވާ ތައުލީމީ ގާބިލް ޒުވާނުން އުފެއްދުމެވެ.
މި ޑިޕްލޮމާގެ ކަރިކިއުލަމް އެކުލަވާލާފައި ވަނީ ބޭންކް އޮފް މޯލްޑިވްސް އާއި މޯލްޑިވްސް މަނިޓަރީ އޮތޯރިޓީ އަދި ވިލާ ކޮލެޖާ ގުޅިގެންނެވެ. މި ކޯސް ކުރިއަށް ގެންދިޔުމުގައި އުގަންނައި ދިނުމުގެ ގޮތުން ވިލާ ކޮލެޖަށް ލިބިފައިވާ ތަޖުރިބާގެ އިތުރުން ދާއިރާ އާ ގުޅޭ ޕްރޮފެޝަނަލް އެހީތެރިކަން ބޭންކުގެ ފަރާތުން ދިނުމަށް ވަނީ ހަމަޖެހިފައެވެ. އެގޮތުން ބޭންކިންގ ދާއިރާގައި ތަޖުރިބާ ހުރި ބީއެމްއެލްގެ މުވައްޒަފުން މި ކޯހުގައި ކިޔަވައި ދިނުމަށް ވަނީ ހަމަޖެހިފައެވެ. އަދި މީގެ އިތުރުން ގެސްޓް ސްޕީކަރސްގެ ގޮތުގައި ވެސް ބޭންކިންގ ދާއިރާގެ ތަޖުރިބާ ހޯއްދަވާފައިވާ މުވައްޒަފުން ހިމެނޭނެއެވެ. މި ޕްރޮގްރާމް ވެގެންދާނީ ބޭންކުގެ މުވައްޒަފުންގެ އިތުރުން މި ދާއިރާއިން މަތީ ތައުލީމް ހާސިލް ކުރުމަށް ބޭނުންވާ ޒުވާނުންނަށް ވެސް ލިބޭނެ ވަރަށް ރަނގަޅު ފުރުސަތަކަށެވެ.
"ބީއެމްއެލްގެ އަބަދުވެސް އަމާޒަކީ ޤާބިލު، މަސައްކަތްތެރި އަދި ކަސްޓަމަރުން އެދޭފަދަ ޚިދުމަތެއް ބޭންކުގެ ވިޔަފާރީގެ ތަސައްވުރާ އެއްގޮތްވާގޮތުގެ މަތިން ފޯރުކޮށްދޭނެ މުވައްޒަފުން ތަކެއް އުފެއްދުން. ބީއެމްއެލް ރިވެލި ޕްރޮގްރާމާއެކު ބޭންކިންގ ދާއިރާއިން ކުރިއަށް ދާން ބޭނުންވާ ފަރާތްތަކަށް ދާއިރާ އާ ގުޅޭ ތައުލީމާއި ތަމްރީނު ފޯރުކޮށްދެވިގެންދާނެ" މި ޕްރޮގްރާމް އާ ގުޅޭ ގޮތުން ވިލާ ކޮލެޖާއި ބޭންކާ ދެމެދު ވެވޭ އެމްޔޫއޯގައި ސޮއިކުރުމަށް ބޭއްވުނު ހަފްލާގައި ވާހަކަ ދައްކަވަމުން ބޭންކުގެ ޑެޕިއުޓީ ސީއީއޯ މުޙައްމަދު ޝަރީފް ވިދާޅުވިއެވެ.
ބޭންކް އޮފް މޯލްޑިވްސް އަކީ ރާއްޖޭގެ އެންމެ ބޮޑު ބޭންކުގެ އިތުރުން ރާއްޖޭގައި އެންމެ ގިނަ މުވައްޒަފުން މަސައްކަތްކުރާ ކުންފުނިތަކުގެ ތެރޭގައި ވެސް ހިމެނޭ ކުންފުންޏެކެވެ. އަދި ބޭންކުގެ މުވައްޒަފުންގެ ބޮޑު ނިސްބަތަކީ ފަޚްރުވެރިކަމާއެކު މަސައްކަތްކުރަމުން އަންނަ ދިވެހިންނެވެ. މުވައްޒަފުންގެ ކަންކަމުގައި ބޭންކުން ގެންގުޅޭ ކުރިއަރާފައިވާ ސިޔާސަތުތަކާއި މީހުން ބިނާކުރުމުގައި ގެންގުޅޭ އުސޫލްތަކާ ގުޅިގެން ވޯލްޑް އެޗްއާރުޑީ ކޮންގްރެސް އާއި އެމްޕްލޯޔަރ ބްރޭންޑިންގ އިންސްޓިޓިއުޓް އިން ދޭ ޝަރުފުވެރި އެވޯޑް " އޭޝިޔާސް ބެސްޓް އެމްޕްލޯޔަރ ބްރޭންޑް އެވޯޑް" ބޭންކް އޮފް މޯލްޑިވްސް އިންވަނީ ޖެހިޖެހިގެން ދެ އަހަރު ހޯދާފައެވެ.
