ޖުމްލަ 3.4 މިލިއަން ޑޮލަރު ގަތުމަށް ބުކިންގ ހަދާފައިވޭ: ބީއެމްއެލް
ދުވާލަކު 200 ކަސްޓަމަރުންނަށް ޑޮލަރު ދޫކޮށްފައިވޭ
ބޭންކް އޮފް މޯލްޑިވްސް ޑޮލަރު ދޫކުރާ ކައުންޓަރު
ވޭތިވެދިޔަ އެއްމަސް ދުވަހުތެރޭ، 7000 ދަތުރުވެރިން ޖުމްލަ 3.4 މިލިއަން ޑޮލަރު ގަތުމަށް ބުކިންގ ހަދާފައިވާ ކަމަށް ބޭންކް އޮފް މޯލްޑިވްސްއިން ބުނެފި އެވެ.
ޑޮލަރު ދޫކުރުމަށް އެއަރޕޯޓްގައި ގާއިމްކޮށްފައިވާ ކައުންޓަރުން އެވްރެޖްކޮށް ދުވާލަކު 200 ކަސްޓަމަރުންނަށް ޑޮލަރު ދޫކޮށްފައިވާ ކަމަށް ބީއެމްއެލްގެ ތަފާސް ހިސާބުތަކުން ދައްކައެވެ.
ޑޮލަރު ވިއްކުމުގެ އާ ނިޒާމަށް އަމަލުކުރަން ފަށާފައިވަނީ މިދިޔަ ޖެނުއަރީ މަހުގެ 8 ވަނަ ދުވަހުގައެވެ. ބޭންކުންވަނީ މި ނިޒާމުގެ ތެރެއިން ޑޮލަރު ގަނެގެން ރާއްޖެއިން ބޭރަށް ދަތުރުކުރި ފުރަތަމަ ދިހަ ދަތުރުވެރިންނަށާއި އެއްހާސް ވަނަ ކަސްޓަމަރަށް ބޯނަސް ގިފްޓެއްގެ ގޮތުގައި މީހަކަށް 100 ޑޮލަރު ހަދިޔާކޮށްފައެވެ.
ބީއެމްއެލްގެ އޮންލައިން ބުކިންގ ނިޒާމުގެ ސަބަބުން ޑޮލަރު ގަތުމަށް ބޭންކްތަކުގެ ބޭރުގައި ކިޔޫ ހަދައިގެން ތިބެންޖެހުން ނިމުމަކަށް އައިސް އާންމުންގެ ބޮޑު ތަރުހީބެއް މި ނިޒާމަށް ލިބުނު ކަމަށާއި އަދި ކަސްޓަމަރުންނަށް ފަސޭހަކަމާއެކު އަވަހަށް އެއަރޕޯޓުން ޑޮލަރު ލިބޭނެ ގޮތް ހަމަޖެހިގެން ދިޔަ ކަމަށް ބީއެމްއެލްއިން ބުންޏެވެ.
އެއަރޕޯޓުން ޑޮލަރު ދޫކުރަން ފެށުމުން މި ނިޒާމު ނަހަމަގޮތުގައި ބޭނުންކުރުން އެއްކޮށްހެން ހުއްޓުވާލެވި، މިގޮތަށް ދޫކުރާ ޑޮލަރު ލިބެނީ އަސްލު ދަތުރުވެރިންނަށްކަން ކަށަވަރުވެގެން ދިޔަ ކަމަށް ބީއެމްއެލްއިން ވަނީ ބުނެފައެވެ.
ބޭންކުން ދަނީ ޚާއްސަ އެހީއަށް ބޭނުންވާ ފަރާތްތަކާ ދުވަސްވީ މީހުންނަށް ޑޮލަރު ދޫކުރުމުގައި ޚާއްސަ އިސްކަމެއް ދެމުން ކަމަށްވެސް ބީއެމްއެލް އިން ބުންޏެވެ.
