ލަސްނުކޮށް މެސީ ރިޓަޔާކުރާނެ ކަމަށް އުންމީދުކުރަން: އާބެލޯއާ
13 ފެބުރުއަރީ 2019 | ބުދަ 09:28މެސީގެ ކުޅުމަކީ އެއްވެސް ގޮތަކަށް ޝައުގުވެރިވާ ކުޅުމެއް ނޫން
އާބެލޯއާ (ކ) އަދި މެސީ (ވ)
ބާސެލޯނާއަށް ކުޅެމުން އަންނަ އާޖެންޓީނާގެ ފޯވާޑް ލިއޮނެލް މެސީ ލަސްނުކޮށް ރިޓަޔާކުރާނެ ކަމަށް އުންމީދުކުރާ ކަމަށް ރެއާލް މެޑްރިޑްގެ ކުރީގެ ޑިފެންޑަރު އަލްވަރޯ އާބެލޯއާ ބުނެފިއެވެ.
މާސާ އަށް ދިން އިންޓަވިއުއެއްގައި އާބެލޯއާ ބުނީ، ބާސާއަށް އޭނާ ވަރަށް އިހުތިރާމްކުރާ ކަމަށާއި، ނަމަވެސް އެޓީމަށް ކުޅޭ މެސީގެ ކުޅުމަކީ އޭނާއަށް އެއްވެސް ގޮތަކަށް ޝައުގުވެރިވާ ކުޅުމެއް ނޫން ކަމަށެވެ.
އެގޮތުން އާބެލޯއާ ބުނީ މެސީ ރިޓަޔާކުރުމަކީ އޭނާ ދެކެން ބޭނުންވާ ދުވަހެއް ކަމަށާއި، އެދުވަސްތައް މިހާރު ވެސް ގުނަމުން އަންނަ ކަމަށެވެ.
މީގެ އިތުރުން އާބެލޯއާ ބުނީ، އޭނާއަކީ އެންޓި ބާސާ މީހެއް ނޫން ކަމަށާއި، ނަމަވެސް ރެއާލް އަށް ފައިދާކުރާތީ އަބަދުވެސް ބާސާ ބަލިވާތަން ދެކެން ބޭނުންވާ ކަމަށެވެ. އަދި ޗެމްޕިއަންސް ލީގުން ބާސާ މިފަހަރު ކަޓާނެ ކަމަށް އުންމީދުކުރާ ކަމަށް ވެސް އޭނާ ވަނީ ބުނެފައެވެ.
ރެއާލްގެ އިސްކޯއަކީ އޭނާގެ އެއް ނަމްބަރު ފޭންކަން ފާހަގަކުރަމުން އާބެލޯއާ ބުނީ، ރެއާލްގައި އިސްކޯ ދިގު މުއްދަތަކަށް މަޑުކުރުމަކީ އޭނާ އަބަދުވެސް އެދޭ އެދުން ކަމަށާއި، އެކަން އެގޮތަށް ހިނގާނެ ކަމަށް އުންމީދުކުރާ ކަމަށެވެ.
ރެއާލްއާ އެކު ހަތް އަހަރު ހޭދަކޮށްފައިވާ އާބެލޯއާ ވަނީ އެ ކްލަބަށް އޭނާ ކުޅުނު 233 މެޗުގައި ހަ ލަނޑު ކާމިޔާބުކޮށް، އެ ކްލަބާ އެކު ސްޕެނިޝް ލަލީގާ، ކޮޕާޑެލްރޭ ދެފަހަރު، ޔުއެފާ ޗެމްޕިއަންސް ލީގު ދެފަހަރު، ފީފާ ކްލަބް ވޯލްޑް ކަޕް، ޔުއެފާ ސުޕާ ކަޕް އަދި ސްޕެނިޝް ސުޕާ ކަޕް ކާމިޔާބުކޮށްފައެވެ.
ސްޕެއިން ގައުމީ ޓީމަށް 56 މެޗު ކުޅެފައިވާ އާބެލޯއާ ވަނީ ގައުމީ ޓީމާއެކު 2010 ވަނަ އަހަރު ވޯލްޑް ކަޕް ކާމިޔާބުކުރުމުގެ އިތުރުން ދެފަހަރު ޔޫރޯވެސް ކާމިޔާބުކޮށްފައެވެ.
