ޖެޕީގެ ސެކްރެޓަރީ ޖެނެރަލްގެ މަގާމު ސަމީރު ދޫކޮށްލައްވައިފި
ސަމީރު މިހާރު ހުންނެވީ ރައީސުލް ޖުމްހޫރިއްޔާގެ އޮފީހުގެ މިނިސްޓަރުގެ މަގާމުގައި
ޖުމްހޫރީ ޕާޓީގެ ތިންވަނަ ކޮންގްރެސްގައި ސަމީރު ވާހަކަދައްކަވަނީ
ޖުމްހޫރީ ޕާޓީ (ޖޭޕީ)ގެ ސެކްރެޓަރީ ޖެނެރަލްގެ މަގާމުން އަހުމަދު ސަމީރު އިސްތިއުފާ ދެއްވައިފި ކަމަށް އެ ޕާޓީން ބުދަ ދުވަހު ބުނެފިއެވެ.
ސަމީރު އެ މަގާމުން ވަކިވެވަޑައިގަތުމުން އެ މަގާމަށް މިހާރު އައްޔަންކޮށްފައި ވަނީ ރައީސް ޔާމީންގެ ވެރިކަމުގައި ހެލްތު މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވުމަށް ފަހު 2018ގެ ފްބުރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރާ އެކު މަގާމުން އިސްތިއުފާ ދެއްވި ހުސެއިން ރަޝީދެވެ.
މީގެ އިތުުރުން ޖުމްހޫރީ ޕާޓީގެ ސެކްރެޓަރީ ޖެނެރަލްގެ ނައިބުގެ މަގާމަށް މީގެ ކުރިން ޕްރިންސިޕަލްކަން ކުރައްވާފައިވާ މޫސާ މުޝްތާގު އައްޔަންކުރައްވާފައިވާ ކަމަށެ ވެސް އެ ޕާޓީން ބުނެފައި ވެއެވެ.
ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރުކަން ވެސް ކުރައްވާފައިވާ ސަމީރުގެ އިސްތިއުފާއާ ގުޅޭ ގޮތުން ޖޭޕީ އިން ބުނެފައި ވަނީ އޭނާ މަގާމުން ވަކިވެ ވަޑައިގެންނެވީ ދައުލަތުގެ މުހިއްމު މަސައްކަތްތަކަކާ ހަވާލުވެވަޑައިގަތުމުން ދުވަހުން ދުވަހަށް ޕާޓީގައި ކުރަންޖެހޭ މަސައްކަތްތައް ކުރެއްވުމަށް ދަތިވާތީ ކަމަށެވެ.
