ގައުމީމަޖިލީހުގައި މަޝްވަރާކުރީ އަދާލަތަށް 5 ދާއިރާ ދިނުމަށް
އުއްމީދަކީ އެޕާޓީއަށް މަޖިލީހުގެ އެންމެ ގިނަ ގޮނޑި ހޯދޭނެ ގޮތް ހޯއްދެވުން ކަމަށް ނަޝީދު ވިދާޅުވި
އެމްޑީޕީގެ ރައީސް މުހައްމަދު ނަޝީދު(ކ) އަދި އަދާލަތު ޕާޓީގެ ރައީސް ޝެއިޚް އިމްރާން
ކުރިއަށް އޮތް މަޖިލިސް އިންތިހާބުގައި އެމްޑީޕީއާ އެކުގައި މަސައްކަތް ކުރަން އަދާލަތު ޕާޓީން އެދިފައިވާތީ އެ ޕާޓީއަށް ފަސް ދާއިރާ ދިނުމަށް ގައުމީ މަޖިލީހުގައި މަޝްވަރާ ކޮށްފިއެވެ.
އަންގާރަ ދުވަހު މާބުލް ހޮޓެލްގައި ކުރިއަށް ގެންދިޔަ އެމްޑީޕީގެ ގައުމީ މަޖިލީހުގެ މަޝްވަރާގައި ގައުމީ މަޖިލީހުގެ މެމްބަރުން ދެއްކެވި ވާހަކަތަކުގައި ފަސް ދާއިރާއެއް ދިނުމުގައި އެދާއިރާތަކަށް މިވަގުތު ޓިކެޓް ދެވިފައިވާ ކެންޑިޑޭޓުންނާއި އެދާއިރާގެ އެމްޑީޕީ މެމްބަރުންނާއި ވާހަކަ ދެއްކުމަށް ފަހު ގޮތެއް ނިންމުމަށް ވަނީ މަޝްވަރާ ކުރެވިފައެވެ.
ގައުމީ މަޖިލިސް ނިންމަވާލެއްވުމަށް ފަހު އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ އެމްޑީޕީއިން ދޫކޮށްލުމަށް ނިންމާފައިވާ ދާއިރާތަކަށް ވާދަކުރުމަށް ޓިކެޓް ލިބިފައިވާ ފަރާތްތަކާއި ދާއިރާގެ ކޮމިޓީތަކާ މަޝްވަރާކޮށް ހައްލު ހޯދުމަށް ގައުމީ މަޖިލީހުން މިއަދު އެމަނިކުފާނަށް ބާރު ދީފައިވާ ކަމަށެވެ.
" ގައުމީ މަޖިލީހުގެ ރޫހަކީ އަދާލަތާއިއެކު އެކުގައި ތިބެ ކުރިއަށް އޮތް ރައްޔިތުންގެ މަޖިލީހުގައި ވާދަކުރުން." ރައީސް ނަޝީދު ވިދާޅުވިއެވެ.
އަދާލަތު ޕާޓީއަށް އެމްޑީޕީގެ ސިޔާސަތުތައް ގަބޫލު ކުރެވޭ ކަމަށް ވިދާޅުވެ ރައީސް ނަޝީދު ވިދާޅުވީ އަދާލަތަށް ފަސް ދާއިރާ ދިނުމަށް މަޝްވަރާ ކުރަން ނިންމާފައިވާއިރު ދާއިރާތައް ދޫކޮށްލުމަށް ޕާޓީގެ ގައުމީ މަޖިލީހަށް ނުނިންމޭނެ ކަމަށެވެ. އެހެން ނަމަވެސް ދާއިރާތަކަށް ޓިކެޓް ލިބުނު ކެންޑިޑޭޓުންނާއި މަޝްވަރާކޮށް އެކަމަށް ގޮތެއް ހޯދިދާނެ ކަމަށް ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީ އިން މަޖިލިސް އިންތިހާބުގައި ދޫކުރާނީ ކޮން ދާއިރާތަކެއް އަދި ކަނޑަނެޅޭ ކަމަށެވެ.
އެނގިފައިވާ ގޮތުގައި އެމްޑީޕީއިން އަދާލަތު ޕާޓީއަށް ދިނުމަށް ގައުމީ މަޖިލީހުން މަޝްވަރާކުރަން ނިންމާފައިވާ ފަސް ދާއިރާ ތަކަކީ ނިލަންދޫ ދާއިރާ، ވައިކަރަދޫދާއިރާ، މަހިބަދޫ ދާއިރާ، ފުވައްމުލަކު ދެކުނު ދާއިރާ އަދި މަކުނުދޫ ދާއިރާއެވެ.
ނަޝީދު ވިދާޅުވީ އެމަނިކުފާނުގެ އުއްމީދަކީ އެޕާޓީއަށް މަޖިލީހުގެ އެންމެ ގިނަ ގޮނޑި ހޯދޭނެ ގޮތް ހޯއްދެވުން ކަމަށާއި އެކަން ކުރަންޖެހެނީ ޕާޓީގެ ހިންގާ ގަވައިދާ އެއްގޮތަށް ކަމަށެވެ.
އަދި ސަރުކާރު އެކުލަވާލަން އެޕާޓީން އެހެން ޕާޓީތަކާއިއެކު އޮތް އެއްބަސްވުމާއި ޚިލާފެއް ނުވާނެ ކަމަށް އެމަނިކުފާނު ވިދާޅުވިއެވެ.
