ވިޔަފާރީގެ ދާއިރާ އިތުރަށް ކުރިއެރުވުމަށް "ޕްރައިވެޓް އިންވެސްޓްމަންޓް"ތަކަށް އިސްކަން ދެއްވާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ސްރީލަންކާ އަށް ކުރައްވަމުން ގެންދަވާ ތިން ދުވަހުގެ ދަތުރުފުޅުގައި ސްރީލަންކާ މޯލްޑިވްސް ބިޒްނަސް ފޯރަމްގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އެ މަނިކުފާނުގެ ވެރިކަމުގައި  ވިޔަފާރީގެ ދާއިރާ ފުޅާ ކުރުމަށްޓަކައި ޕްރައިވެޓް އިންވެސްޓްމަންޓްތަކަށް ޚާއްސަ އިސްކަމެއް ދެއްވާނެ ކަމަށެވެ. ރައީސް ސޯލިހު ވިދާޅުވީ ޕްރައިވެޓް އިންވެސްޓްމަންޓްތަކައް ވިޔަފާރީގެ ދާއިރާ ހުޅުވާލާއިރު، ބޭންކިންގެ ނިޒާމު ރަނގަޅު ކުރަންޖެހޭ ކަމަށް ދެކިވަޑައިގަންނަވާ ކަމަށެވެ. އެގޮތުން ރާއްޖޭގެ ގިނަ ރަށްތަކުގައި ބޭންކްތައް ނެތްކަން ފާހަގަކުރައްވާ ރައީސް ސޯލިހު ވިދާޅުވީ، ބޭންކް ނެތް ރަށްތަކުގައި ބޭންކްތައް ގާއިމްކުރުމުގެ މަސައްކަތް ފައްޓަވާނެ ކަމަށެވެ.

ރައީސް ސޯލިހު ވިދާޅުވީ އެ މަނިކުފާނުގެ ސިޔާސަތަކީ ދުނިޔޭގެ ގައުމުތަކަށް ރާއްޖެ ހުޅުވާލައި، ދުނިޔޭގެ ގައުމުތަކުގެ ވިޔަފާރިވެރިން ވިޔަފާރިކުރަން ބޭނުންވާ ގައުމަކަށް ދިވެހިރާއްޖެ ހެއްދެވުން ކަމަށެވެ. ފާއިތުވި އަހަރުތަކުގައި ދުނިޔޭގެ ގައުމުތަކުގެ ވިޔަފާރިވެރިންގެ އިތުބާރު ރާއްޖެއާ މެދު ގެއްލިފައިވާއިރު، އެ އިތުބާރު އަލުން ހޯއްދަވައި ދެއްވުމަށް މަސައްކަތް ކުރައްވާނެކަން އެ މަނިކުފާނު ފާހަގަކުރެއްވިއެވެ.

ރާއްޖެއަކީ ދުނިޔޭގެ ވިޔަފާރިވެރިންނަށް ހުޅުވާލާފައިވާ ގައުމަކަށް ހައްދަވާނެ ކަމަށް އިޝާރާތް ކުރައްވާ ވާހަކަފުޅު ދައްކަވަމުން ރައީސް ސޯލިހު ވިދާޅުވީ ޕްރައިވެޓް ސެކްޓަރގެ އިގްތިސާދު ކުރިއެރުވުމަށް ގިނަ ބަދަލުތަކެއް ގެންނަންޖެހިފައިވާކަން ގަބޫލުފުޅު ކުރައްވާ ކަމަށާއި، އެ ބަދަލުތައް ގެންނަވާނެ ކަމަށެވެ.

ސްރީލަންކާ އާއި ރާއްޖެއާ ދެމެދު އޮތް ގާތްގުޅުމަށް އަލިއަޅުއްވާލައްވާ ވާހަކަދައްކަވުން ރައީސް ސޯލިހު ވިދާޅުވީ ރާއްޖެއާ އެކު ވިޔަފާރީގެ ގުޅުންތައް ބަދަހިކުރަން އެންމެ ފަސޭހަ އެއްގައުމަކީ ސްރީ ލަންކާ ކަމަށެވެ. ސަބަބެއް ކަމަށް އެ މަނިކުފާނު އިޝާރާތްކުރައްވާފައިވަނީ އެއްގޮތް ގިނަ ކަންތައްތަކެއް މި ދެ ގައުމުގެ ދެ މެދުގައި ހުރުމާއި ދެ ގައުމުގެ މީހުން ކެއުމުގައި ބޭނުންކުރާ ބާވަތްތައް އެއްގޮތްވުމެވެ. އެންމެ ގިނަ ދިވެހިންނާ ބައްދަލުކުރެވޭ ގައުމަކީ ސްރީ ލަންކާ ކަމަށް ވެސް އެ މަނިކުފާނު ވިދާޅުވިއެވެ.

މި ރަސްމިއްޔާތުގައި ސްރީލަންކާގެ ވިޔަފާރީގެ ދާއިރާގައި ފުންނާބު އުސްފަރާތްތަކުން ވަނީ ބައިވެރިވެވަޑައިގެންފައެވެ. ރައީސް ސޯލިހު ވަނީ ސްރީލަންކާގެ މަޝްހޫރު "މަގާ" ކުންފުނީގެ ސީއީއޯ ސުރެން އަބޭވިކްރަމަ އާއި އެލްއޯއެލްސީގެ އިސް ދެ ފަރާތް ކަމަށްވާ ކަމަންތާ އަމަރްސޭކަރަ އަދި އިޝާރާ ނަނާޔަކަރައާ ބައްދަލުކުރައްވާފައެވެ. މީގެ އިތުރުން ރާއްޖޭގެ ވިޔަފާރީގެ ދާއިރާގައި އިސްކޮށް ހަރަކާތްތެރިވާ ފަރާތްތަކުން ވެސް ވަނީ މި ބައްދަލުކުރެއްވުމުގައި ބައިވެރިވެވަޑައިގެންފައެވެ.

ދެ ގައުމުގެ ދެމެދުގައި ކުރެވޭ ވިޔަފާރީގެ ގުޅުންތައް ބަދަހިކުރުމަށް ރައީސް ސޯލިހު ކުރައްވާ މަސައްކަތްޕުޅުގެ އަގު ވަޒަންކުރައްވާ ސްރީލަންކާގެ ބިޒަންސް ކައުންސިލުން ރައީސް ސޯލިހުއަށް ވަނީ ހަނދާނީ ފިލާއެއް ހަދިޔާކުރައްވާފައެވެ.

ސްރީލަންކާގައި 25000-30000 ދެމެދުގެ އަދަދެއްގެ ދިވެހިން ވަޒަންވެރިވެގެން އުޅޭ ކަމަށް ސްރީލަންކާގައި ހުންނަ ދިވެހި އެމްބަސީގެ ތަފާސް ހިސާބުތަކުން ދައްކައެވެ.