ރައީސް ސޯލިހު ސްރީލަންކާއަށް ކުރައްވާ ރަސްމީ ދަތުރުފުޅުގައި ފުރާވަޑައިގެންފި
3 ފެބުރުއަރީ 2019 | އާދީއްތަ 04:44ރައީސްގެ މި ދަތުރުފުޅަކީ މި މަހުގެ 3 އިން 5 އަށް ކުރައްވާ ދަތުރުފުޅެއް
2019 ޖެނުއަރީ 24 ވަނަ ދުވަހު ރައީސް އިބްރާހިމް މުހައްމަދު ސާލިހް ރައީސުލްޖުމްހޫރިއްޔާގެ އޮފީހުގައި ނޫސްވެރިންނާ ބައްދަލުކުރައްވަނީ
ސްރީލަންކާގެ މިނިވަން ދުވަހުގެ މުނާސަބަތުގައި ބާއްވާ ޚާއްސަ ހަރަކާތްތައް ޝަރަފުވެރިކޮށް ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ލަންކާއަށް ފުރާވަޑައިގެންފިއެވެ.
ސްރީލަންކާގެ މިނިވަން ދުވަހު ހަފްލާ ޝަރަފްވެރި ކޮށްދެއްވުމަށް އެދި، އެ ޤައުމުން ފޮނުވި ދައުވަތު ރައީސް ސޯލިހު ޤަބޫލުފުޅު ކުރައްވާފައިވާއިރު، މިއީ މިމަހުގެ ތިންވަނަ ދުވަހުން ފެށިގެން ފަސްވަނަ ދުވަހުގެ ނިޔަލަށް ކުރައްވާ ދަތުރުފުޅެކެވެ.
މިއީ ރާއްޖޭގެ ރައީސަކު ލަންކާގެ މިނިވަން ދުވަހުގެ ހަފްލާ ޝަރަފްވެރިކޮށްދެއްވާ ފުރަތަމަ ފަހަރުއެވެ.
ސްރީލަންކާގެ މިނިވަންދުވަހަކީ މި މަހުގެ 4 ވަނަ ދުވަހެވެ.
މި ދަތުރުފުޅުގައި އާދީއްތަ ދުވަހުގެ ހަވީރު ސްރީލަންކާގައި ދިރިއުޅޭ ދިވެހިންނާއި ރައީސް ސޯލިހު ބައްދަލުކުރައްވާނެއެވެ. ލަންކާގައި ދިރިއުޅޭ ދިވެހިންނާއި ރައީސް ސޯލިހު ބައްދަލުކުރައްވާނީ އާދިއްތަ ދުވަހުގެ ހަވީރު 4:30 ގައި ލަންކާގައި ހުންނަ ދިވެހި އެމްބަސީގައެވެ. ސްރީލަންކާގައި އުޅޭ ހުރިހާ ދިވެހިން މި ހަފްލާގައި ބައިވެރިވުމަށް ލަންކާގައި ހުންނަ ދިވެހި އެމްބަސީން ވަނީ ދައުވަތު އަރުވާފައެވެ.
ރާއްޖެއިން ލަންކާއަށް ކަނޑައަޅުއްވާފައިވާ ސަފީރު އުމަރު އަބްދުއްރައްޒާގު ވަނީ މަގާމުގެ ފަތްކޮޅު ސްރީލަންކާގެ ރައީސް މައިތިރިޕާލަ ސިރިސޭނަ އާއި ހުކުރު ދުވަހު ހަވާލުކޮށްފައެވެ.
ރައީސް ސޯލިހުގެ މި ދަތުރުފުޅުގައި ލަންކާގެ ވިޔަފާރިވެރިންނާއި ބައްދަލުކުރެއްވުމަށްވަނީ ހަމަޖެހިފައެވެ. މީގެ އިތުރުން ދެ ގައުމުގެ ދެމެދުގައި މަޝްވަރާ ބައްދަލުވުންތަކެއް ބޭއްވުމަށްވަނީ ހަމަޖެހިފައެވެ.
ރައީސްކަމުގެ މަގާމާއި ހަވާލުވެވަޑައިގެންނެވި ފަހުން ރަސްމީ ދަތުރުފުޅެއްގައި އެ މަނިކުފާނު ލަންކާއަށް ކުރައްވާ މިއީ ފުރަތަމަ ދަތުރުފުޅެވެ. ނަމަވެސް ނުރަސްމީ ދަތުރުފުޅެއްގައި ރައީސް ސޯލިހު ވަނީ މިދިޔަ މަހު ލަންކާއަށް ވަޑައިގެންފައެވެ.
ސްރީލަންކާ އާއި ދިވެހިރާއްޖެއަކީ އަބަދުވެސް ގާތް ގުޅުމެއް އޮންނަ ދެ ގައުމެވެ. ރައީސް ސޯލިހު ނިސްބަތްވެވަޑައިގަންނަވާ ޕާޓީ، އެމްޑީޕީ ރެޖިސްޓްރީ ކުރުމުގެ އަމަލީ މަސައްކަތް ފަށާފައިވަނީވެސް ސްރީލަންކާގައެވެ. ކުރީގެ ރައީސް އަބްދުﷲ ޔާމީން ވެރިކަމުގައި ހުންނެވިއިރު، އިދިކޮޅު ފަރާތްތަކައް ސަރުކާރުން ކުރިމަތިކުރަމުން ދިޔަ ގޮންޖެހުންތަކާއިއެކުވެސް އޭރުގެ އިދިކޮޅު ފަރާތްތަކުގެ އިސްލާހީ މަސައްކަތްތައް، ރާވާ ހިންގުމުގެ މަސައްކަތްތައް ކުރެވެމުންދިޔަ މައިގަނޑު އެއްގައުމަކީވެސް ސްރީލަންކާއެވެ.
މިދިޔަ އަހަރުގެ ނޮވެމްބަރު 17 ގައި ވެރިކަމާއި ހަވާލުވެވަޑައިގެންނެވި ފަހުން ރައީސް ސޯލިހު ކުރައްވާ މިއީ، ރަސްމީ ތިންވަނަ ދަތުރުފުޅެވެ. މީގެ ކުރިން ރަސްމީ ދަތުރުފުޅެއްގައި ވަޑައިގަތީ އިންޑިއާ އަށާއި ޔޫއޭއީ އަށެވެ. އޭގެ ތެރެއިން ފުރަތަމަ ރަސްމީ ދަތުރުފުޅުގައި ވަޑައިގެންނެވީ އިންޑިއާ އަށެވެ.
