ލަންކާގައި އުޅޭ ދިވެހިންނާއި ރައީސް ސޯލިހު ބައްދަލުކުރައްވަނީ
1 ފެބުރުއަރީ 2019 | ހުކުރު 14:13ރައީސް ސޯލިހު ލަންކާއަށް ދަތުރުފުޅެއް ކުރައްވަނީ ސްރީލަންކާގެ މިނިވަންދުވަހުގެ ހަފްލާ ޝަރަފްވެރިކޮށްދެއްވުމަށް
ަލަންކާއަށް ރައީސް ސޯލިހު ފުރާވަޑައިގަންނަވާނީ މި މަހުގެ ތިންވަނަ ދުވަހު
ރައީސް އިބްރާހިމް މުހައްމަދު ސޯލިހް، ލަންކާއަށް ކުރައްވާ ދަތުރުފުޅުގައި އެ ޤައުމުގައި ދިރިއުޅޭ ދިވެހި ރައްޔިތުންނާއި ބައްދަލުކުރައްވާނެކަމަށް ރައީސް އޮފީހުން ބުނެފި އެވެ.
ރައީސް ސޯލިހް ލަންކާއަށް ވަޑައިގަންނަވަނީ މި މަހުގެ 3 ވަނަ ދުވަހުން 4 ވަނަ ދުވަހަށެވެ. އެ ދަތުރުފުޅަކީ އެ ޤައުމުގެ މިނިވަންދުވަހުގެ ހަރަކާތްތަކުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
ލަންކާގައި ދިރިއުޅޭ ދިވެހިންނާއި ރައީސް ސޯލިހު ބައްދަލުކުރައްވާނީ ތިންވަނަ ދުވަހުގެ ހަވީރު 4:30 ގައި ދިވެހި އެމްބަސީގައެވެ. ސްރީލަންކާގައި ހުންނަ ދިވެހި އެމްބަސީ ހުންނަނީ ކޮލަމްބޯ 4 މެލްބަން އެވެނިއު 25 ގައެވެ.
ސްރީލަންކާގައި އުޅޭ ހުރިހާ ދިވެހިންނަށް މި ހަފްލާގައި ބައިވެރިވުމަށް ސްރީލަންކާގައި ހުންނަ ދިވެހި އެމްބަސީން ވަނީ ދައުވަތު އަރުވާފައެވެ.
އޭގެއިތުރުން ލަންކާއިން ރާއްޖެއަށް ކަނޑައަޅުއްވާފައިވާ ސަފީރު އުމަރު އަބްދުއްރައްޒާގު ވަނީ މަގާމުގެ ފަތްކޮޅު ސްރީލަންކާގެ ރައީސް މައތިރިޕާލަ ސިރިސޭނަ އާއި މިއަދު ހަވާލުކޮށްފައެވެ.
ސްރީލަންކާގެ މިނިވަންދުވަހަކީ މިމަހުގެ ހަތަރުވަނަ ދުވަހުއެވެ.
ރައީސްކަމުގެ މަގާމާއި ހަވާލުވެވަޑައިގެންނެވިފަހުން ރަސްމީ ދަތުރުފުޅެއްގައި އެ މަނިކުފާނު ލަންކާއަށް ކުރައްވާ މިއީ ފުރަތަމަ ދަތުރުފުޅެވެ. ނަމަވެސް ނުރަސްމީ ދަތުރުފުޅެއްގައި ރައީސް ސޯލިހު ވަނީ މިދިޔަ މަހު ލަންކާއަށް ވަޑައިގެންފައެވެ.
މިދިޔަ އަހަރުގެ ނޮވެމްބަރު 17 ގައި ވެރިކަމާއި ހަވާލުވެވަޑައިގެންނެވި ފަހުން ރައީސް ސޯލިހު ކުރައްވާ މިއީ ރަސްމީ ތިންވަނަ ދަތުރުފުޅެވެ. މީގެ ކުރިން ރަސްމީ ދަތުރުފުޅެއްގައި ވަޑައިގަތީ އިންޑިއާ އަށާއި ޔޫއޭއީ އަށެވެ. އޭގެ ތެރެއިން ފުރަތަމަ ރަސްމީ ދަތުރުފުޅުގައި ވަޑަގެންނެވީ އިންޑިއާ އަށެވެ.
ސްރީލަންކާއަކީ ގިނަ އަދަދެއްގެ ދިވެހިން ދިރިއުޅޭ ގައުމެކެވެ.
