އެމްއާރުއެމްގެ ނަމުގައި މައުމޫނު އާ ސިޔާސީ ޕާޓީއެއް އުފައްދަވަނީ
މިއީ މައުމޫނު އިސްވެ ހުންނެވައިގެން އުފައްދަވާ ތިން ވަނަ ޕާޓީ
ކުރީގެ ރައީސް މައުމޫނު:-އެމަނިކުފާނު އާ ސިޔާސީ ޕާޓީއެއް އުފައްދަވަން ވަނީ ނިންމަވާފައި
ކުރީގެ ރައީސް މައުމޫނު އަބްދުލް ގައްޔޫމް އާ ސިޔާސީ ޕާޓީއެއް އުފައްދަވަން ނިންމަވައިފި އެވެ.
އާ ސިޔާސީ ޕާޓީއެއް އުފައްދަވަން ނިންމަވާފައިވާކަން މައުމޫނު އިއުލާން ކުރެއްވީ މިހާރު އެމަނިކުފާނު ބާއްވަމުން ގެންދަވާ ނޫސްވެރިންގެ ބައްދަލުވުމުގައި އެވެ.
އެމްއާރުއެމްގެ ނަމުގައި ސިޔާސީ ހަރަކާތެއް ހިންގަވަމުން ގެންދަވާ މައުމޫނު ވަނީ އާ ޕާޓީގެ ނަމަކަށްވާނީ މޯލްޑިވްސް ރިފޯމް މޫވްމެންޓް (އެމްއާރުއެމް) ކަމަށް ވިދާޅުވެފަ އެވެ.
ކުރިން ދެ ޕާޓީއެއް އުފައްދަވަފައިވާ މައުމޫނު ވިދާޅުވީ ފުރުސަތު ލިބިވަޑައިގެންފި ނަމަ އާ ސިޔާސީ ޕާޓީގެ މަގާމެއްވެސް ފުރުއްވަފާނެ ކަމަށެވެ. މައުމޫނު އެންމެ ފުރަތަމަ އުފެއްދެވީ ޑީއާރުއާރުޕީ އެވެ. އެމަނިކުފާނުގެ ވެރިކަމުގައި އުފެއްދެވި ސިޔާސީ ޕާޓީގައި ހުންނެވުމަށްފަހު ސިޔާސީ މައިދާނުން ދުރަށް ޖެހިވަޑައިގެންފައިކަން އިއުލާން ކުރެއްވި އެވެ. ނަމަވެސް އަލުން ސިޔާސީ މަސައްކަތްޕުޅަށް ނިކުމެވަޑައިގެން މަސައްކަތްޕުޅު ފެއްޓެވުމާއި ޑީއާރުޕީގައި ޖެހުނު ހަމަނުޖެހުންތަކަށްފަހު އެ ޕާޓީ ދޫކުރައްވާ ޕީޕީއެމްގެ ނަމުގައި އާ ޕާޓީއެއް އުފެއްދެވި އެވެ.
ޕީޕީއެމްގެ ރައީސްއަކަށް ހުންނަވަނިކޮށް، އެ މަނިކުފާނު އެ މަގާމުން ވަކިކޮށް، ސިވިލް ކޯޓަށް ހުށަހަޅައިގެން ޕާޓީ ހިންގެވުމުގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު އަބްދުﷲ ޔާމީން ނެންގެވި އެވެ.
ރައްޔިތުންގެ މަޖިލީހުގެ އިންތިޚާބު ބޯމަތިވެފައިވާއިރު މައުމޫނަށް ތާއިރު ކުރައްވާ މެމްބަރުން، އިންތިޚާބުގައި އެމްއާރުއެމްގެ ނަމުގައި ވާދަ ނުކުރައްވާނެ ކަމަށް އެ މަނިކުފާނު ވިދާޅުވި އެވެ. ބައެއް ދާއިރާތަކަށް މައުމޫނުގެ ތާއިދާއެކު ބޭފުޅުން ވާދަކުރައްވާނެ އެވެ.
