ހުދެއިދާއިން ހުރިހާ ފަޅިއެއްގެ ހަނގުރާމަވެރިން ބޭލުމަށް އދގެ މަންދޫބު ގޮވާލައްވައިފި

ޔަމަނުގައި ހަނގުރާމަ ކުރަމުންދާ ހުރިހާ ފަރާތަކުން އެ ފަރާތެއްގެ ފައުޖުތައް ހުދެއިދާއިން ބޭލުމަށް އދ. އިން ޔަމަނަށް ކަނޑައަޅުއްވާފައި ހުންނަވާ މަންދޫބު މާޓިން ގްރިފިތްސް ގޮވާލައްވައިފިއެވެ.

ޔަމަނުގައި ބަނޑުހައި ހޫނުކަން ތަހައްމަލް ކުރަމުންދާ އެތައް މިލިއަން ބަޔަަކަށް ދިރިތިބުމަށް އެއްޗެއް ލިިބެން އޮތް މަގަކީ ޕޯޓް ސިޓީ ހުދެއިދާ ކަމަށްވާއިރު ގްރިފްތްސް މިހެން ގޮވާލައްވާފައިވަނީ އެ ތަނުގެ ހާލަތު އިތުރަށް ދަށަށް ދާ ކަމަށް އެހީދޭ އޭޖެންސީތަކުން އިންޒާރުކޮށްފައިވަނިކޮށެވެ.

މިމަހުގެ ތެރޭގައި ޔަމަނަށް ކުރެއްވި ތިންވަަނަ ދަތުރުފުޅުގައި ވެރިރަށް ސަންއާއަށް ގްރިފިތްސް ވަޑައިގެންފައި ވަނީ ހޯމަ ދުވަހުއެވެ.

ހަނގުރާމަވެރިން ބޭލުމަށް ހުށަހެޅި ޓައިމްލައިނާއި އަދި ކުށްވެރިން ބަދަލުކުރުމަށް ހުށަހެޅި ހުށަހެޅުމަށް ބަދަލުތަކެއް އައިސްފައި އޮތްނަމަވެސް އެ ކަނޑައެޅި އުސޫލުތައް އަދިވެސް އެ ގޮތަށް އޮތްކަމަށް އޭނާ ފާހަގަކުރެއްވިއެވެ.

ޔަމަނުގައި ހަނގުރާމަކުރަމުންދާ ޕާޓީތަކުން ސްވިޑްންގައި މިދިޔަ މަހު ވަނީ އެެއްބަޔަކު އަނެއްބަޔަކަށް އިތުބާރު އިތުރުކުރުމަށް ޚާއްސަ ފިޔަވަޅުތަކެއް އެޅުމަށް އެއްބަސްވެފައެވެ.

އޭގެ ތެރޭގައި ހުދެއިދާއިން ހޫޘީ ހަނގުރާމަވެރިން ބޭލުމަށްފަހު އެ ސިޓީއަށް ވަދެނުކުމެވުން ވަގުތީ ގޮތުން މިނިވަން ބައެއްގެ ކޮންޓްރޯލްގެ ދަށުގައި ބޭއްވުމަށް އެއްބަސްވެވުނެވެ.

މީގެ އިތުރުން ދެ ފަރާތުން ޖުމްލަ 16،000 ކުށްވެރިންގެ ނަންތައް ހުށަހަޅާފައިވާއިރު ޔަމަނުގެ ސަރުކާރާއި ހޫޘީން އުއްމީދު ކުރި ގޮތުގައި ޖެނުއަރީ 15ގައި ކުށްވެރިން ބަދަލުކުރުން ފެށޭނެއެވެ.

ޔަމަނުގެ ހަނގުރާމަ ފެށިގެން ދިޔައީ ޔަމަނުގެ ހޫޘީން އެގަމުގެ ވެރިރަށް ސަންއާ ހިފައި ރައީސް އަބްދު ރައްބޫ މަންސޫރު ހާދީގެ ވެރިކަން ވައްޓާލި ހިސާބުންނެވެ.

އޭގެ ފަހުން ހަނގުރާމަ އިތުރަށް ހޫނުވީ އެ ސަރުކާރު ދިފާއުކޮށްދިނުމަށް 2015 ވަނަ އަހަރު ސައުދީ އަރަބިއާ އާއި ޔޫއޭއީ އިސްވެ އޮވެ އަސްކަރީ ކޯލިޝަނެއް ހަދައި ހޫޘީންނާ ދެކޮޅަށް ހަމަލާދޭން ފެށުމުންނެވެ.