އެވަޓަންގެ ގެއްޔޭ ހޯދަން ޕީއެސްޖީން މަސައްކަތް ކުރަނީ
ގެއްޔޭ ހޯދަން ޕީއެސްޖީން ހުށައެޅީ 22 މިލިއަން ޑޮލަރު
ެއެވަޓަންއަށް ކުޅެމުން އަންނަ ސެނެގާލްގެ އިދްރިއްސާ ގެއްޔޭ
އިނގިރޭސި ޕްރިމިއަރ ލީގުގެ އެވަޓަންއަށް ކުޅެމުން އަންނަ ސެނެގާލްގެ އިދްރިއްސާ ގެއްޔޭ ހޯދަން ޕީއެސްޖީން މަސައްކަތް ކުރަމުންދާކަން އެވަޓަންގެ ކޯޗު މާކޮސް ސިލްވާ ކަށަވަރުކޮށްދީފިއެވެ.
ސިލްވާ ބުނީ ގެއްޔޭ ހޯދަން ޕީއެސްޖީން ހުށައެޅި 22 މިލިއަން ޑޮލަރުގެ ހުށައެޅުމަށް އެވަޓަންއިން ނޫނެކޭ ބުނެފައިވާ ކަމަށެވެ. ގެއްޔޭއަކީ ޓީމަށް ވަރަށް މުހިންމު ކުޅުންތެރިއެއް ކަމުން، ގެއްޔޭ ވިއްކާލެވެން ނެތް ކަމަށް ސިލްވާ ވަނީ ބުނެފައެވެ.
ނަމަވެސް ގެއްޔޭއަށް ހުށައެޅި އަގު މާ ކުޑަ ކަމަށް ބުނުމަށް ފަހު ސިލްވާ ވަނީ ކުޅުންތެރިޔާއަށް އެކަށީގެންވާ އަގެއް ހުށައަޅައިފި ނަމަ ވިއްކާލަން ތައްޔާރަށް ތިބި ކަހަލަ އިޝާރާތެއް ދީފައެވެ. އެއްމެ ފަހު ގޮތް ނިންމާނީ ކްލަބުން ކަމަށް ވެސް ސިލްވާ ވަނީ ބުނެފައެވެ.
ޕީއެސްޖީން ގެއްޔޭ ހޯދުމުގެ މަސައްކަތް ކުރަމުން އަންނަނީ، އެ ޓީމަށް ކުޅެމުން އަންނަ މިޑްފީލްޑަރުންގެ ތެރެއިން މަރކޯ ވެރާޓީއަށް އަނިޔާ ލިބިފައިވުމާއި ގުޅިގެންނާއި، ލަސާނާ ޑިއާރާ މި ސީޒަންގެ ފަހުން ރިޓަޔަރ ކުރަން ނިންމާފައި ވުމުންނެވެ. މީގެ އިތުރުން އެ ޓީމަށް ކުޅެމުން އަންނަ ފަރަންސޭސީ މިޑްފީލްޑަރު އެޑްރިއަން ރަބިއޯ ކޮންޓްރެކްޓް އާ ކުރަން ދެކޮޅު ހެދުމާއި ގުޅިގެން، އޭނާއަށް ވަނީ ފުރަތަމަ އެގާރައިން ފުރުސަތު ދިނުން ހުއްޓާލާފައެވެ،
ގެއްޔޭގެ އިތުރުން ޕީއެސްޖީން ރަޝިޔާގެ ޒެނިތްއަށް ކުޅެމުން އަންނަ ލިއަންދްރޯ ޕަރޭޑެސް ހޯދުމުގެ މަސައްކަތް ކުރަމުންދާ ކަމަށް ވެސް ފްރާންސުގެ ބައެއް ނޫސްތަކުން ވަނީ ރިޕޯޓްކޮށްފައެވެ.
