ހުޅުމާލޭގައި އަޅާފައި އޮތް ދޯންޔެއްގެ ތެރެއަށް ކެރޭނެއް ވެއްޓި، ދޭތިވެސް އަޑިއަށް!
28 ޖެނުއަރީ 2019 | ހޯމަ 14:49ކެރޭނު ވެއްޓުނީ ތޮށިގަނޑު މަތީގައި އޮވެފައި ފަހަތަށް ޖަހަން އުޅުމުގެ ތެރޭގައި
ކެރޭނާއި ބޯޓު އަޑިއަށް ގޮސްފައި
ހުޅުމާލޭ ފަޅުތެރޭގައި އޮތް ވެލި އުފުލާ ދޯންޏެއްގެ ތެރެއަށް ކެރޭނެއް ވެއްޓި، ދޭތިވެސް އަޑިއަށް ހިނގައްޖެއެވެ.
ހޯމަ ދުވަހު މެންދުރު ފަހުގެ ވަގުތެއްގައި ހިނގި ހާދިސާއާ ގުޅޭ ގޮތުން ރާއްޖެއެމްވީއަށް މައުލޫމާތު ދެމުން އަޑިއަށް ދިޔަ "ޑެއިޒީ" ދޯނީގެ ކައްޕި އަހްމަދު ހުސައިން ބުނީ، ކެރޭނު ވެއްޓުނީ ތޮށިގަނޑު މަތީގައި އޮވެފައި ފަހަތަށް ޖަހަން އުޅުމުގެ ތެރޭގައި ކަމަށެވެ.
މި ހާދިސާގައި ކެރޭނު ޑްރައިވަރުގެ އަތް މަށައިގެން ދިޔުން ފިޔަވައި، މީހަކަށް އިތުރު އަނިޔާއެއް ލިބިފައި ނުވާ ކަމަށް ދޯނީގެ ކައްޕި ވަނީ މައުލޫމާތު ދީފައެވެ. ކެރޭނު ވެއްޓުމާ އެކު، ޑްރައިވަރަކަށް އިން ބިދޭސީ މީހާ ވަނީ ދޯނި ތެރޭގައި ހުރި ވެލި ބަސްތާތަކެއް މައްޗަށް ފުއްމާލުމަށް ފަހު ސަލާމާތްވެފައެވެ. މި ހާދިސާ ހިނގި ވަގުތު ދޯނީގައި ތިބީ ކައްޕި އާއި ދެ ބިދޭސީންނެވެ.
މުދާ ހުސްކުރުމަށް ފަހު ފުރަން ތައްޔާރުވެފައި އޮތް ޑެއިޒީ ދޯނީގެ ކުރީކޮޅު އެއްކޮށް ހަލާކުވެފައިވާ ކަމަށް ބެލެވޭ ކަމަށް ކައްޕި ވަނީ މައުލޫމާތު ދީފައެވެ.
