މަޖިލިސް އިންތިހާބަށް ޤައުމީ ލަފާދޭ ކޮމިޓީ އެކުލަވާލައި، ފުރަތަމަ ޖަލްސާ މާދަމާ!

ރައްޔިތުންގެ މަޖިލީހުގެ އިންތިހާބަށް ޤައުމީ ލަފާދޭ ކޮމިޓީއެއް އެކުލަވާލައިފިއެވެ.

އާދިއްތަ ދުވަހު އިލެކްޝަންސް ކޮމިޝަނުން ކުރި ޓްވީޓެއްގައި ބުނެފައިވަނީ ރައްޔިތުންގެ މަޖިލީހުގެ އިންތިހާބަށް ޤައުމީ ލަފާދޭނެ ކޮމިޓީއެއް އެކުލަވާލާފައިވާ ކަމަށެވެ. އަދި އެ ކޮމިޓީގެ ފުރަތަމަ ޖަލްސާ ހޯމަ ދުވަހު (މާދަމާ) އޮންނާނެ ކަމަށްވެސް އެ ޓްވީޓުގައި ބަޔާންކޮށްފައިވެއެވެ.

އަލަށް އުފެއްދި ކޮމިޓީއާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން އިލެކްޝަން ކޮމިޝަނުގެ މެމްބަރު އަހުމަދު އަކްރަމް ވިދާޅުވީ، ކޮމިޓީގައި 26 މެމްބަރުން ހިމެނޭ ކަމަށާއި، ކުރިންވެސް ހިމެނޭ ފަރާތްތަކުގެ އިތުރުން މިފަހަރު 2 ޖަމިއްޔާއެއް އިތުރަށް ހިމަނާފައިވާނެ ކަމަށެވެ. އެގޮތުން އަންހެނުންނަށް ޚާއްސަ ޖަމިއްޔާއަކާއި، ޚާއްސަ އެހީއަށް ބޭނުންވާ ކުދިންނަށް ޚާއްސަ ޖަމިއްުޔާއެއްގެ މަންދޫބުންވެސް ބައިވެރިކުރާނެ ކަމަށެވެ.

އަލަށް އުފައްދާފައިވާ ކޮމިޓީގެ ޗެއަރ އަކަށް ހުންނަވާނީ އިލެކްޝަންސް ކޮމިޝަންގެ ރައީސް އަހުމަދު ޝަރީފް ކަމަށްވެސް އަކްރަމް ވިދާޅުވިއެވެ.

ޖެނުއަރީ 9 ގައި ޝާއިއުކޮށްފައިވާ މަޖިލީހުގެ އިންތިހާބުގެ ޤަވާއިދުގައިވާ ގޮތުން އިންތިހާބަށް ލަފާދޭ ކޮމިޓީގައި ސިޔާސީ ޕާޓީތަކާއި، މޯލްޑިވްސް ޕޮލިސް ސަރވިސްއާއި، މޯލްޑިވްސް މީޑިއާ ކައުންސިލާއި، ޖަމިއްޔާތަކާއި، ހިއުމަން ރައިޓްސް ކޮމިޝަން ފަދަ 12 ފަރާތެއް ތަމްސީލު ކުރާ މަންދޫބުން ހިމެނޭނެއެވެ