ސިޔާސީ ޕާޓީތަކުގެ އައު ގަވައިދު އެކުލަވާލީ ވަކި ޕާޓީއަކަށް އަމާޒުކޮށްގެންނެއް ނޫން: އިލެކްޝަންސް
އައު ގަވައިދުގެ ސަބަބުން ސިޔާސީ ޕާޓީތަކަށް ގިނަ ކަންތައްތަކަކަށް ހައްލު ލިބިގެންދާނެ
އިލެކްޝަންސް ކޮމިޝަންގެ ރައީސް އަހުމަދު ޝަރީފް
ސިޔާސީ ޕާޓީތަކުގެ އައު ގަވައިދު އެކުލަވާލާ ގެޖެޓްކުރީ ވަކި ސިޔާސީ ޕާޓީއަކަށް ޖެއްސުންކުރުމުގެ ގޮތުން ނުވަތަ ވަކި ސިޔާސީ ޕާޓީއަކަށް އަމާޒުކޮށްގެންް ނޫންކަމަށް އިލެކްޝަންސް ކޮމިޝަނުން ބުނެފި އެވެ.
ސިޔާސީ ޕާޓީތަކުގެ ދަރަންޏަށް ޒިންމާވާންޖެހޭގޮތަށް ސިޔާސީ ޕާޓީތަކުގެ އައު ގަވައިދު އެކުލަވާލައި ގެޖެޓްކޮށްފައިވާއިރު، އެ ގަވައިދަކީ ޕީޕަލްސް ނޭޝަނަލް ޕާޓީ ނުވަތަ ކޮންގްރެސް ޕާޓީއަށް އަމާޒުކޮށް، އެ ޕާޓީ އުފެއްދުމަށް ހުރަސްއެޅުމަށް އެކުލަވާލި ގަވައިދެއްކަމަށް އެ ޕާޓީގެ މެމްބަރުން ގެންދަނީ ތުހުމަތުކުރަމުންނެވެ.
އެ ތުހުމަތުތައް ދޮގުކުރައްވާ އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ އެ ގަވައިދު އެކަުލަވާލީ ހުރި މައްސަލަތައް ބެލުމަށްފަހު، ހައްލު ގެންނަންޖެހޭކަންކަން ހިމަނައިގެންކަމަށެވެ. އަދި އެ ގަވައިދަކީ އެއްވެސް ސިޔާސީ ޕާޓީއަކަށް އަމާޒުކޮށް، ޖެއްސުންކުރުމުގެ ގޮތުން ނުވަތަ އެ ނޫންވެސް މަޤްސަދެއްގައި އެކުލަވާލި ގަވައިދެއް ނޫންކަމަށް އޭނާ ވިދާޅުވި އެވެ.
ސަރީފް ވިދާޅުވީ ސިޔާސީ ޕާޓީތަކުގެ ކަންކަން މޮނީޓާކޮށް، ހިންގުމުގެ ކަންކަން ބެލުމަކީ އިލެކްޝަންސް ކޮމިޝަންގެ ޒިންމާއަކަށްވާއިރު، އާއު ގަވައިދު އެކުލަވާލީ ރާއްޖޭގެ ހާލަތަށް ބަލައި، އަދި ވޭތުވެދިޔަ މާޒީގައި ކަންތައްތައްވެފައިވާގޮތަށް ބެލުމަށްފަހުގައިކަމަށެވެ. އެގޮތުން ސިޔާސީ ޕާޓީތަކަށް ދިމާވާ އުދަނގޫތަކަށް ހައްލު ހޯދައިދިނުމަށް އައު ގަވައިދުގައި ހިމަނާފައިވާކަން ޝަރީފް ފާހަގަކުރެއްވި އެވެ.
ޝަރީފް ވިދާޅުވިގޮތުގައި ޕީއެންސީ ނުވަތަ ކޮންގްރެސް ޕާޓީ އުފެއްދުމަށް ހުއްދަދިނުމާއި، ގަވައުދު ގެޖެޓްކުރުމާއި ދިމާވުމަކީ އިއްތިފާޤެއްކަމަށެވެ. އަދި ވިދާޅުވީ އައު ގަވައިދުގެ ސަބަބުން ސިޔާސީ ޕާޓީތަކަށް ގިނަ ކަންތައްތަކަކަށް ހައްލު ލިބިގެންދާނެ ކަމަށެވެ.
ސިޔާސީ ޕާޓީތަކުގެ އާ ގަވާއިދުގައި ވާގޮތުން ޕާޓީއެއް އުފައްދަން ހުއްދަދީފައި ވަނިކޮށް އެހެން ޕާޓީއެއްގެ މުދަލާއި ވަސީލަތް ބޭނުންކޮށްގެން ޕާޓީ އުފައްދާކަން ތަހުގީގަށް ސާބިތުވެއްޖެ ނަމަ ޕާޓީ ހަދަން ދިން ހުއްދަ ބާތިލު ކުރެވޭނެ އެވެ. ރައީސް ޔާމީންގެ ޕީއެންސީ އުފެއްދުމުގެ މަސައްކަތް ކުރިއަށްގެންގޮސް ނޫސްވެރިންގެ ބައްދަލުވުންތައްވެސް ބާއްވައިފައިވަނީ ޕީޕީއެމް އޮފީހުގައެވެ. އެ ސަބަބާއިހުރެ އެ ޕާޓީގެ ހުއްދަ ބާތިލްވާނެކަމަށް ގިނަ ބަޔަކު ގަބުލުކުރެ އެވެ.
