މި މަޖިލީހަށް މުއައްސަސާތައް ސާފު ކުރެވިދާނެތޯ؟
ނުފޫޒުގައި ތިބި މެމްބަރުންނަށް އިންސާފުން ކުރެވިދާނެތޯ؟
ހިނގަމުންދާ 18 ވަނަ ރައްޔިތުންގެ މަޖިލީހުގެ ބައެއް މެމްބަރުން
އަލަށް އިންތިހާބުކުރާ މަޖިލީހަކީ ނަޒާހަތްތެރި، ނުފޫޒެއް ނެތް، ފަސްބައިގައި ކިލަނބު ކަމެއް ނެތް މެމްބަރުން ތިބޭނެ މަޖިލީހަށް ހަދާނެ ކަމަށް އެމްޑީޕީން ވަނީ ވައުދުވެފައެވެ. ވައްކަމާއި ފަސާދައިން ދައުލަތް ސާފު ކުރުމަކީ އެ މަޖިލީހުގެ އެންމެ މުހިއްމު ޒިންމާ ކަމުގައި ދަނީ ބުނަމުންނެވެ. އެ މަސައްކަތް މިހާރު އޮތް މަޖިލީހަށް ނުކުރެވެން ވީ ކީއްވެގެންތޯއެވެ؟ މަޖިލީހުގެ ސާފު މެޖޯރިޓީ އޮތީ ސަރުކާރަށެވެ. ސަރުކާރުގެ 47 މެމްބަރުން މަޖިލީހުގައި އެބަ ތިއްބެވެ. ރިޔާސަތުގައި އިންނެވީ ކޯލިޝަންގެ ޕާޓީތަކުގެ ތެރެއިން ލީޑަރެކެވެ. އެހެންކަމުން ފަސޭހަކަމާ އެކު، މުއައްސަސާތައް ޖަވާބުދާރީކޮށް، އިސްލާހު ކުރެވޭނެއެވެ.
ބައެއް މީހުން ބުނާ ގޮތުން މިހާރު ހިނގަމުންދާ މަޖިލީހުން މުއައްސަސާތައް ފަސޭހައިން އިސްލާހެއް ނުކުރެވޭނެއެެވެ. ސަބަބަކީ ކޮރަޕްޝަނާއި ފަސާދައިގައި ޖެހިފައިވާ މެމްބަރުން، ސަރުކާރުގެ ހިޔަނީގައި ތިބުމެވެ. ކަޅު ފައިސާގައި ޖެހިފައިވާ މީހުން ކޯލިޝަންގެ ޕާޓީއަކަށް ޖަމާވެފައި ތިބުމެވެ. އަނިޔާވެރިކަމަށް ބާރު އަޅައި، އަމުރު މައުރޫފު ހިންގި އެފަދަ ވެރިން ވަކި ޕާޓީތަކަށް ޖަމާވެ، "ބަރާވެފައި" ތިބުމެވެ. ނުފޫޒު ގަދަ ލީޑަރެއް މަޖިލީހުގެ ރިޔާސަތަށް ސަވާރުވެގެން ހުރިހާ ހިނދަކު، އެ މަޖިލިން ނުފޫޒުން ސަލާމަތް ނުވާނެ ކަމަށް ބައެއް މީހުން ބުނެއެވެ.
މިނިވަން މައްސަސާތައް އިސްލާހުކުރުމުގެ މަސައްކަތް ސަރުކާރުން ފަށައިފިނަމަ، ކޯލިޝަން ޕާޓީތަކަށް "ބައި އަޅަން" ޖެހިދާނެ ކަމަށް ވެސް އެބަ ބުނެއެވެ. ނުފޫޒުގަދަ ލީޑަރެއްގެ ނުފޫޒު، ސަރުކާރުގެ ވުޒާރާތަކަށް ފޯރާފައިވާ ގޮތަށް، މުއައްސަސާތަކުން ހުސްވާ ގޮނޑިތަކަށް ވެސް އެ ނުފޫޒު އަރާހަމަ ކޮށްފާނެ ކަމަށް އެބަ ބުނެއެވެ.
އެ ސަބަބާ ހުރެ، މުއައްސަސާތައް މިނިވަން ކުރުމުގެ މަސައްކަތް ސަރުކާރުން ކުރަން ފަސްޖެހެނީއެވެ. އެމްޑީޕީއަށް އެކަން މަޑުޖައްސާލާފައި އެ ވަނީ އެ ސަބަބާ ހުރެ ކަމަށް ވެދާނެއެވެ. ނަޒާހަތްތެރިކަން ނެތް މަޖިލީހަކުން ނަޒާހަތްތެރި، މުއައްސަސާތަކެއް ނުއުފެއްދޭނެއެވެ.
އެމްޑީޕީގެ ޗެއާޕާސަން ނައިބު އިދާރީ އަލީ ނިޔާޒު ވިދާޅުވީ އާ މަޖިލީހުގައި އެމްޑީޕީން އަމަލު ކުރާނެ ތާވަލެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އެ މަސައްކަތުގެ ތާވަލުގެ ތެރޭގައި މިނިވަން މުއައްސަސާތައް އިސްލާހު ކުރުމާއި މެނިފެސްޓޯ ތަންފީޒު ކުރުމަށް ގާނޫނަށް ގެންނަންޖެހޭ ބަދަލުތައް ވެސް ހިމެނޭނެ ކަމަށެވެ.
"އަޅުގަނޑުމެން މިހާރު މި ތައްޔާރުކުރަމުން މިދަނީ އެމްޑީޕީން ރައްޔިތުންގެ މަޖިލީހުގައި ކުރިއަށް އޮތް ފަސް އަހަރު ދުވަހުގެ ތެރޭގައި މަސައްކަތް ކުރާނެ ތާވަލެއް. އިރާދަ ކުރެއްވިއްޔާ އެ މަސައްކަތް އަޅުގަނޑުމެން ކުރާނަން. މި އިންތިހާބަށް ނުކުންނާނީ މަސައްކަތު ތާވަލަކާ އެއްކޮށް. އޭގެ ތެރޭގައި ޔަގީންނުން ވެސް ހިމެނޭނެ، މިނިވަން މުއައްސަސާތައް ޒިންމާދާރު ކުރުވުން،" އެމްޑީޕީގެ ޓިކެޓުގައި ހުޅުމާލެ ދާއިރާއަށް ވާދަ ކުރައްވާ އަލީ ނިޔާޒު ވިދާޅުވިއެވެ.
ވަކި ބަޔަކު ވަކި ގޮތަކަށް އަމަލު ކުރީތީ، ބަދަލު ހިފުމުގެ ރޫހުގައި މިނިވަން މުއައްސަސާތަކުން އެ އުސޫލުން އަމަލުކޮށްގެން ނުވާނެއެވެ. މިނިވަން މުއައްސަސާތަކުން އަމަލު ކުރަން ޖެހޭނީ މިނިވަންކަމާ އެކުގައެވެ. ނުފޫޒެއް ނެތިއެވެ. ވަކި ބަޔަކަށް ތައައްސުބެއް ބާއްވައިގެން ނޫނެވެ.
އެއް ބާރުން އަނެއް ބާރަށް ފާރަވެރިވެ، ރައްޔިތުންގެ ހައްގުތައް ކަަށަވަރު ކުރުމަށް ދައުލަތަކުން ކުރަންޖެހޭ ކަންތައްތައް ކުރެވޭނީ ގާބިލް ބަޔަކު މުއައްސަސާތަކަށް އައްޔަންކޮށްގެންނެވެ. ފަންނީ ގާބިލުކަން ލިބިގެންވާ އިލްމުވެރި ބަޔަކު މުއައްސަސާތަކަށް އައްޔަންކޮށްގެންނެވެ. ގާނޫނުއަސާސީގެ ހަތް ވަނަ ބާބުގައި މިނިވަން، ހަތް މުއައްސަސާއެއް އުފައްދަން ބާރު އެޅި ސަބަބަކީ އެއީއެވެ. ވަކި މީހެއްގެ ނުފޫޒުގައި ތާށިވެ، ބަނދެވިފައިވާ ދައުލަތަށް ދިވެހި ދައުލަތަށް ނުހެދުމަށެވެ.
ދެން ވެސް އެކަން ކުރެވޭނީ މަޖިލީހަށް އިންތިހާބު ކުރާ ބޭފުޅުން އެ ނިޔަތް އޮވެގެންނެވެ. ސާފު ނިޔަތަކާ އެކު، ސާފު ހިތަކުން ދިވެހިންނަށް ހިދުމަތްކޮށްދޭނެ ޖީލެއް އުފައްދައިގެންނެވެ.
