ފްރާންސްގެ ނީސްއަށް ކުޅެމުން އަންނަ އިޓަލީގެ ފޯވާޑް މާރިއޯ ބަލޮޓެލީ މާސޭއަށް ބަދަލުވުމާ ގާތަށް ގޮސްފައިވާ ކަމަށް ރިޕޯޓްތައް ބުނެފިއެވެ.

ފްރާންސްގެ ނޫސްތަކުން ބުނީ، މާސޭއިން ބަލޮޓެލީގެ ސޮއި ހޯދުމާ ގާތަށް ގޮސްފައިވާ ކަމަށާއި، ކުރިޔަށް އޮތް ދުވަސްތަކުގައި އެއްބަސްވުމުގެ ކަންތައްތައް ފުރިހަމަކުރަން އެ ކްލަބުން މަސައްކަތް ކުރަމުން އަންނަކަމަށެވެ.

ގިނަ ކްލަބްތަކުން ބަލޮޓެލީ ހޯދުމަށް މަސައްކަތް ކުރަމުން އަންނަ ނަމަވެސް މިދިޔަ މަހު ފަހުކޮޅު އޭނާ ބުނީ، ޓްރާންސްފާއާމެދު އަދި އޭނާ ނުވިސްނާ ކަމަށެވެ.

ބައެއް ރިޕޯޓްތައް ބުނާގޮތުން ޖެނުއަރީ ޓްރާންސްފާ ގައި އޭސީ މިލާނަށް ބަލޮޓެލީ ދިޔުމަކީ ކައިރި ކަމެކެވެ. އަދި ޖެނުއަރީ ޓްރާންސްފާގައި ބަލޮޓެލީ އޭސީ މިލާނަށް ނުގޮސްފި ނަމަ، މި ސީޒަނަށް ފަހު ޔަގީން ކަމާ އެކު އޭނާ އެ ކްލަބަށް ބަދަލުވާނެ ކަމަށްވެސް ރިޕޯޓްތައް ބުނެއެވެ.

އިންޓަ މިލާން، އޭސީ މިލާން، މެންޗެސްޓާ ސިޓީ އަދި ލިވަޕޫލަށް ވެސް ކުޅެފައިވާ ބަލޮޓެލީ ނީސް އަށް ބަދަލުވީ 2016 ވަނަ އަހަރުގެ އޯގަސްޓް މަހުގައެވެ. އޭނާ ވަނީ މިހާތަނަށް އެޓީމަށް ކުޅުނު 76 މެޗުގައި 43 ލަނޑު ކާމިޔާބުކޮށްފައެވެ.

އިންޓަ މިލާނާ އެކު ތިން ލީގުގެ ތަށި ކާމިޔާބުކޮށްފައިވާ ބަލޮޓެލީ ވަނީ އެ ކްލަބާ އެކު ޔުއެފާ ޗެމްޕިއަންސް ލީގު ވެސް ކާމިޔާބުކޮށްފައެވެ. އަދި އޭނާ ވަނީ ސިޓީއާ އެކު ޕްރިމިއާ ލީގު އަދި އެފްއޭ ކަޕް ވެސް ކާމިޔާބުކޮށްފައެވެ.

އިޓަލީއާ އެކު 2012 ވަނަ އަހަރު ޔޫރޯގެ ދެވަނަ ހޯދި ބަލޮޓެލީ ވަނީ ގައުމީ ޓީމަށް ކުޅުނު 36 މެޗުގައި 14 ލަނޑު ކާމިޔާބުކޮށްފައެވެ.

މީގެ އިތުރުން އޭނާ ވަނީ 2010 ވަނަ އަހަރުގެ ގޯލްޑެން ބޯއި އެވޯޑް އަދި 2012 ވަނަ އަހަރުގެ އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.