ރާއްޖޭގައި ފަތުރުވެރިން މަރުވަނީ 'އަންޑަރވޯޓަރ ކޭބަލް'ތަކުން ކަރަންޓުޖެހޭތީ ކަމަށް ތުހުމަތުކޮށްފި
21 ޖެނުއަރީ 2019 | ހޯމަ 08:45މި އަހަރު ފެށުނުތާ 21 ދުވަސްވެފައިވާއިރު، މިހާތަނަށް ރާއްޖޭގައި ފަސް ފަތުރުވެރިންވަނީ މަރުވެފަައި
ޕެރެޑައިސް އައިލެންޑް ރިސޯޓް
'ގޮތް ނޭނގޭ' ގޮތަކަށް ރާއްޖޭގައި ގިނަ ފަތުރުވެރިންތަކެއް މަރުވަމުންދާކަމަށް ބުނެ މި ސަރަހައްދަކީ ބަރމިއުޑާ ޓްރައޭންގަލެއްކަމަށް ސިފަކޮށްފިއެވެ.
ބަރމިއުޑާ ޓްރައޭންގަލްއަކީ އެޓްލާންޓިކް އޯޝަންގެ އުތުރުގައި އޮންނަ، ގޮތް ނޭނގޭގޮތަށް ފްލައިޓްތަކާއި ބޯޓުތައް ގެއްލިފައިވާތީ އެގޮތަށް މަޝްހޫރުވެފައިވާ ސަރަހައްދެކެވެ.
'ދަ އައިރިޝް ސަން'އަށް ދީފައިވާ އިންޓަވިއުއެއްގައި ރާއްޖެއަކީ ބަރމިއުޑާ ޓްރައޭންގަލެއްކަމަށް ބުނެފައިވަނީ 2017 ވަނަ އަހަރު ރާއްޖެއަށް ޒިޔާރާތް ކުރި، އަދި 'ކިރިޔާ މަރުނުވެ ސަލާމަތްވި،' އަޔަލޭންޑަށް ނިސްބަތްވާ ލީސާ މޯލްއެވެ.
އޭނާގެ އެއްވެސް ސިއްހީ މައްސަލައެއް ނުހުންނަކަން ފާހަގަ ކުރަމުން ލީސާ ބުނެފައިވަނީ ފިރިމީހާއާއެކު ރާއްޖޭގައި މޫދަށް އެރި އުޅެނިކޮށް އޭނާ ހަބަރުހުސްވީ ކަމަށެވެ. އަދި ސަލާމަތްވީ އެމީހުން ޗުއްޓީ ހޭދަކުރަމުން ދިޔަ ރިސޯޓްގައި ޗުއްޓީ ހޭދަކުރަން އެވަގުތު އުޅުން ދެ ޑޮކްޓަރުންގެ ސަބަބުންކަމަށް އޭނާ ބުންޏެވެ.
މީގެ އިތުރުން، 2017 ވަނަ އަހަރުގެ އޮކްޓޯބަރު މަހުގައި ހިނގި އެހެން ހާދިސާއަކާ އޭނާއަށް ދިމާވި ހާދިސާއާ އޭނާ ވަނީ ގުޅުވާފައެވެ.
2017 ވަނަ އަހަރު ހަނީމޫނަށް ރާއްޖެ އައި އަޔަލޭންޑަށް ނިސްބަތްވާ އެންޑްރޫ ރޮޑީ ވަނީ ގެނބިގެން މަރުވެފައެެވެ. އޭނާގެ އަންހެނުން ޖިލް ކެމްޕިއަންއާއެކު މޫދަށް އެރި އުޅެނިކޮށް މި ހާދިސާ ދިމާވެފައިވަނީ ކައިވެނި ކުރިތާ ތިން ހަފްތާވެސް ނުވަނީހެވެ.
އެންޑްރޫ ރޮޑީއާއި ގިލް ކެމްޕިއަން
މީގެ އިތުރުން، މި އަހަރު ފެށުނުތާ 21 ދުވަސްވެފައިވާއިރު، މިހާތަނަށް ރާއްޖޭގައި ފަސް ފަތުރުވެރިންވަނީ މަރުވެފައެެވެ. މި އަހަރު އެންމެ ފުރަތަމަ މަރުވެފައިވަނީ ކ. ދިއްފުށީގައި ހަނީމޫން ހޭދަ ކުރަމުންދިޔަ ފިލިޕީންސްގެ ޒުވާން ދެމަފިރިއެކެވެ. މި މަހު 16 ވަނަ ދުވަހު ވެސް، ޕެރަޑައިސް އައިލެންޑް ރިސޯޓުގައި ގެނބިގެން ޓޫރިސްޓަކު ވަނީ މަރުވެފައެވެ. އަދި ހޮނިހުރު ދުވަހު ދެ މަރު ވަނީ ރިޕޯޓްކޮށްފައެވެ. އެއީ ޕެރެޑައިސް އައިލެންޑްގައި ހިނގި 84 އަހަރުގެ ޗެކް ރިޕަބްލިކަށް ނިސްބަތްވާ މީހެއްގެ މަރަކާއި ސަފާރީއަކުން ޑައިވިންއަށް ދިޔަ ރަޝިއާ ޓޫރިސްޓެއްގެ މަރެވެ.
ކ. ދިއްފުށީގައި ހަނީމޫން ހޭދަކުރަމުންދަނިކޮށް މަރުވި ފިލިޕީންސްގެ ދެމަފިރިން
މި ހާދިސާތަކަށް އިޝާރާތްކޮށް އާދިއްތަ ދުވަހު ދީފައިވާ އިންޓަވިއުގައި ލީސާ ބުނެފައިވަނީ ރާއްޖޭގައި ހިނގަމުންދާ ކުއްލި މަރުތަކާ މެދު ސުވާލު އުފައްދަން ޖެހޭކަމަށެވެ.
އަދި ލީސާއަށް ދިމާވި ހާދިސާގެ ސަބަބުން އަޔަލޭންޑްގެ ސިއްހީ ދާއިރާގައި މަސައްކަތް ކުރާ ފަރާތްތަކެއް ތަހުގީގެއް ފަށާފައިވާއިރު، އެތަނުން އެކަކު ބުނާ ގޮތުގައި 'ކަނޑުއަޑީގައި އަޅާފައިވާ ކޭބަލްތަކުން (ލީސާ)ވަނީ އިލެކްޓްރޮކިއުޓްވެފަ' އެވެ. އަދި އެންޑްރޫއަށް ވެސް ދިމާވެފައިވަނީ މިހެންކަމަށް ގަބޫލު ކުރާކަމަށް އޭނާ ބުނެފައިވާކަމަށް 'ދަ އައިރިޝް ސަން'އިން ރިޕޯޓްކޮށްފައިވެއެވެ.
"ވަރަށް ފަހުން އެލެކްޓްރޯ ފިޒިސިސްޓް ހެދި ޓެސްޓްތަކުގެ ނަތީޖާވަނީ ލިބިފައި، އޭނާ ދެކޭ ގޮތުގައި އަހަރެން އިލެކްޓްރޮކިއުޓްވީ އަދި އެންޑްރޫއަށް ވެސް ދިމާވީ އެފަދައިން، ނަމަވެސް ސާބިތުކުރަން އުނދަގޫ،" ލީސާ ބުނެފައިވެއެވެ.
ނަމަވެސް، ފަތުރުވެރިން މަރުވަމުންދަނީ ގެނބިގެންކަން ކަނޑައަޅަމުންދާކަމަށް ފާހަގަކުރަމުން ލީސާ ބުނީ އޭނާ މި ވާހަކަތައް ދައްކަން ބޭނުންވީ 'އެކަމަށް މީހުން ހޭލުންތެރި ކުރުމަށް' ކަމަށެވެ.
އަދި އެމްއާރްއައި އާއި ސީޓީ ސްކޭންތަކުންވެސް މިފަދައިން ދައްކާކަމަށް ބުނެ، ފުއްޕާމޭގައި ގެނބުމުގެ އަސަރެއްނެތްކަމަށްވެސް ލީސާ ފާހަގަކުރިއެވެ.
ގިނަ ފަތުރުވެރިންތަކެއް މަރުވަމުން ދާތީ، ރާއްޖޭގެ ކޮންމެ ރަށެއްގައި ވެސް ފެތުމަށް ރައްކާތެރި ސަރަހައްދުތައް ކަނޑައެޅުމަށް ނިންމާފައިވާކަމަށް ޓުއަރިޒަމް މިނިސްޓަރ އަލީ ވަހީދުވަނީ ނިމިގެންދިޔަ ހަފްތާގައި އިއުލާންކުރައްވާފައެވެ.
