މުއިއްޒުގެ ހެޔޮފުޅުކަން ދައްކަން އަނެއްކާވެސް އުނބަށް
4 އޮކްޓޯބަރު 2026 | އާދީއްތަ 11:16ބޭރުގެ ޓްރެވަލް އެޖެންޓުންގެ އަތުން ޓެކްސް ނަގަން ޖީއެސްޓީ ގާނޫނަށް ގެނައި އިސްލާހާ ގުޅިގެން ފަތުރުވެރިކަމުގެ ސިނާއަތުގެ ކަންބޮޑުވުންތައް އިތުރުވުމުން، އެ ނިންމުން ބަދަލުކުރަން ރައީސުލްޖުމްހޫރިއްޔާ ނިންމަވައިފި. ސަރުކާރުން މި ބަދަލު ގެންނަން ނިންމީ މި ގާނޫނަށް އަމަލުކުރަން ފެށިތާ ކުޑަ ދުވަސްކޮޅެއްގެ ތެރޭގައި، ރާއްޖޭގެ އިގުތިސާދަށް ނޭދެވޭ އަސަރުތަކެއް ކޮށްފާނެކަމުގެ ބިރު އޮތުމުން. އެހެންކަމުން، ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް އިސްލާހު ގެންނާނެކަމަށް ޓޫރިޒަމް މިނިސްޓަރު ވަނީ ހާމަކުރައްވާފައި
ރައީސް ޑރ. މުހައްމަދު މުއިއްޒު އަދި ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން | ޓްރާންސްޕޯޓް މިނިސްޓްރީ
އެއްބަޔަކު ބުނަނީ ހަމަ ނޭނގެނީ އެވެ. އަނެއް ބަޔަކު ބުނަނީ ބޯހަރީ އެވެ. ދެން ތިބި މީހުން ބުނަނީ މަވެތި ކަމާއި ގަދަބަދަވިކަން ދެއްކުމުން ލިބޭ އިންތިހާ ދަރަޖައިގެ ގެއްލުން ކަމަށެވެ.
މިއީ މިއަދު ރާއްޖޭގެ ރައީސުލްޖުމްހޫރިއްޔާ ކަމުގައި ހުންނެވި ޑރ. މުއިއްޒު އަށް މީހުން ބުނެ އުޅޭ ބައެއް ބަސްތަކެވެ. މުއިއްޒާއި މުއިއްޒުގެ ސަރުކާރާމެދު ބައެއް އާއްމުން ދެކޭ ގޮތެވެ.
މިގޮތައް މީހުން ބުނާ ގިނަ ސަބަބަތަކުގެ ތެރެއިން އެއްކަމަކީ، ކުރުކޮށް ފޮނިކޮށް ސާފު ސީދަލަށް ބުނާ ނަމަ "އުނބަށް ޖެހުމެވެ. ގަދަފައި ވިއްދާފައި ކުރާން ނިންމިކަންތައް އިހުއޮތްގޮތައް ބަދަލު ކުރުމެވެ. ކަމުގެ ތަޖުރިބާކާރުންނާއި ކަންކަމުގެ މާހިރުން އެހެން އެކަންކަން ނުކުރުމަށް ގޮވަގޮވާ އޮއްވާ ވެސް ކުރުމަށްފަހު އިހު އޮތްގޮތައް ބަދަލުކުރުމެވެ.
ޔޯލަ ވާހަކަތަކުން ބުނެވޭގޮތުގައި ވަށަފަރު މީހުން އުނބަށް ޖެހީ ރަނގަޅަކަށެވެ. އުކާލި އުނބުތައް އަނބުރާ ގޮސް ނަގައިގެން އެބޭނުންކުރި އެވެ. އޭގެން އެ މީހުންނަށް ފައިދާ ކުރި އެވެ. އެކަމަކު ވަށަފަރަށް އުފަން މުއިއްޒު މިޖައްސަވާ އުނބާއެކު އޮންނަނީ ބޮޑުތަނުން ގޯސްވެ ގައުމަށާއި ރައްޔިތުންނަށް ގެއްލުންވެފަ އެވެ.
މިފަހަކު އެފަދަ އުނބަކަށް އަނެއްކާ ވެސް އެވަނީ މުއިއްޒު ޖައްސަވާފަ އެވެ. އުނބަށް ޖެހުމާއި ގުޅުވާ ދެކެވޭ ވާހަކަ ރައްދުކުރާ ވަށަފަރަށް ވެސް ހުތުރު ގޮތަކަށެވެ.
ޑޮލަރުގެ މައްސަލަ ހައްލުކުރާނަމޭ ހިތާ ސީދާ ކުޅެންފެށީ ފަތުރުވެރިކަމާ އެވެ. ރިސޯޓުތައް ހިންގާ އޯނަރުންނަށް ކުޑައިމީސްކޮށް ވާހަކަދެއްކެވުމުގެ އިތުރުން ލިބޭ އާމްދަނީގެ 40 އިންސައްތަ ސަރުކާރަށް މާރުކުރަން އެ ވަނީ ޖައްސުވާފަ އެވެ. އަހާލުމެއް ކިޔާލުމެއް ނެތި އެވެ. އެއާއެކުއެކީގައި ކުޅެގަތީ ބޭރުގެ ޓުއަރ އޮޕަރޭޓަރުންނާ އެވެ. ދެންވާނެ ގޮތަކާމެދު ވިސްނާލުމެއް ނެތި އެވެރިން އަތުން ޓެކްސް ނަގަން ނިންމާ އެކަން އިއުލާނުކުރެއްވީ އެވެ.
ކަންތަކާޖެހުނީ އެހާ ހިސާބުންނެވެ. ބޭރުގެ ޓުއަރ އޮޕަރޭޓަރުން އެ ތެދުވީކީ ތިޔަހެނެއް ނޫނެވެ. ކަންބޮޑުވުންތައް ފާލުކޮށްފައި ނިންމާލީކީއެއް ނޫނެވެ. ދިވެހިންގެ އިގުތިސާދުގެ މައިލޭނާރުކަމުގައިވާ ފަތުރުވެރިކަމަށް ބޮޑު ލޮޅުމެއް އައިސްދާނެ ކަމުގެ ސިގްނަލްތައް ދޭންފެށީ އެވެ. ސާފު ސީދާ މުތުލަގަށް އެމީހުން އެދިނީ ރާއްޖެއަށް ފަތުރުވެރިން ފޮނުވުން ހުއްޓާލަން ޖެހިދާނެ ކަމުގެ އިންޒާރެވެ.
އެ ވާހަކަތައް އެހެން ބުނެ ދިވެހި ސަރުކާރަށް ކެނޑިނޭޅި ފޮނުވަމުން އެ ދިޔައީކީ މަދު ސިޓީއެއް ނޫނެވެ. އެންމެ ގައުމެއް ދެގައުމެއް ނޫނެވެ. އެތައް ގައުމަކުންނެވެ. އެކަމަކު ސަރުކާރުން އޮތީ ނީވޭ ކަންފަތް މައްޗަށް ޖަހާލައިގެ "ތަށަށް ކިޔަނީ މަރިޔަނބުހޭ ވެސް" އަހާ ނުލަ އެވެ.
ގަދަފައި ވިއްދާފައި ހިފަހައްޓާ ލެވުނީ ކުޑަ ދުވަސްކޮޅަކަށެވެ. ފަސްމުގޫ އަތުން ދޫވެ މުޅި ނަނުބައި އަތްމަތިން ބީވެދާނެ ކަމުގެ ބިރާ ކުރިމަތިވީމާ ތެޅިގެންފައި އެ ނިންމީ އެ ނިންމުން ބަދަލުކުރާށެވެ. ޓެކްސް ނަގަން ފެށިތާ އެންމެ ތިންވަނައަށްވީ ދުވަހު އެ އިއުލާނުކުރެއްވީ އެ ގާނޫނަށް ބަދަލު ގެންނެވުމަށް ރައީސް މުއިއްޒު ނިންމެވި ވާހަކަ އެވެ.
ފަތުރުވެރިކަމުގެ ދުވަސް ފާހަގަކުރުމަށް ބޭއްވި ޖަލްސާގައި ވާހަކަ ދައްކަވަމުން، ރައީސް މުއިއްޒު އެ ގޮތަށް ނިންމެވިކަން ހާމަކުރެއްވީ ސީދާ ޓުއަރިޒަމް މިނިސްޓަރު މުހައްމަދު އަމީނެވެ.
މި މަހުން ފެށިގެން ބޭރުގެ ޓްރެވަލް އެޖެންޓުންގެ އަތުން ޓެކްސް ނަގާ ގޮތަށް ޖީއެސްޓީ ގާނޫނަށް ގެނައި އިސްލާހަށް އިޝާރާތް ކުރައްވާ މިނިސްޓަރު އަމީން ވިދާޅުވީ މި ބަދަލުތަކާ ގުޅިގެން ފަތުރުވެރިކަމުގެ ދާއިރާގެ އިސް ފަރާތްތަކާއި ޓްރެވަލް އޭޖެންޓުންގެ ވަރަށް ބޮޑެތި ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށެވެ.
އެ ކަންބޮޑުވުންތައް މައިގަނޑު ގޮތެއްގައި ގުޅިފައިވަނީ ކަނޑައެޅިފައިވާ މުއްދަތުތަކާއި އެކަމުގައި ހިމެނޭ އެހެނިހެން ސަބަބުތަކާކަން ފާހަގަކުރައްވާ މިނިސްޓަރު ވިދާޅުވީ އެ މައްސަލަތަކާ ގުޅިގެން އިންޑަސްޓްރީގެ ގިނަ ފަރާތްތަކަކުން ރައީސުލްޖުމްހޫރިއްޔާގެ އަރިހަށް ހުށަހެޅުންތައް ފޮނުވާފައިވާ ކަމަށެވެ. އަދި ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް ރައީސް ނިންމަވާފައިވާކަމަށް މިނިސްޓަރު ވިދާޅުވި އެވެ.
"މިވަގުތު ރައީސް ނިންމަވާފައި ވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ޤާނޫނަށް ވަރަށް އަވަހަށް ބަދަލުތަކެއް ގެނައުމަށް. އެހެންވީމާ މި ވާހަކަ ތިބޭފުޅުންގެ މައުލޫމާތަށް ޓަކައި އަޅުގަނޑު ހަމަ މިރޭ މި ދަންނަވާލީ،" މިނިސްޓަރު އަމީން ވިދާޅުވި އެވެ.
ކޮންމެއަކަސް ކިހާ ސަޅި ހެއްޔެވެ. އަނެއްކާ ވެސް އުނބަށް ޖެއްސެވީ އެވެ. އެކަމަކު މިފަހަރު ވެސް ބޮޑުތަނުން ރާއްޖޭގެ ފަތުރުވެރިކަމަށް ގެއްލުންވި ފަހުންނެވެ. ރިސޯޓުތަކުގެ ބުކިންތަކަށް އެނގުންވި ފަހުންނެވެ. އެވެރިން ނުހަދާށޭ ގޮވަގޮވާ އޮއްވާ ހޭވެސް އަހާނުލައި ނިންމި ނިންމުން ރައީސްގެ ހެޔޮފުޅުކަމުން ބަދަލުކޮށް އުނބަށް ޖެއްސެވިއިރު ވާނެހައެތި މިވަނީ ވެ ނިމިފަ އެވެ. ވަރަށް ސަލާމެވެ.
