މެލޭޝިއާގައި ހިނގި ނުރައްކާތެރި އެކްސިޑެންޓެއްގައި ދިވެހި އަންހެން ދަރިވަރަކު ނިޔާވެއްޖެ
4 އޮކްޓޯބަރު 2026 | އާދީއްތަ 17:50މެލޭޝިއާގައި މަތީ ތައުލީމު ހާސިލުކުރަމުންދިޔަ އައްޑޫ ސިޓީ ހިތަދޫގެ 21 އަހަރުގެ އަންހެން ދަރިވަރަކު، ސަންވޭ ސަރަހައްދުގައި ހިނގި ނުރައްކާތެރި ކާރު އެކްސިޑެންޓެއްގައި ނިޔާވެއްޖެ. މި ހާދިސާގައި ކާރުގައި އިން އިތުރު ދިވެއްސަކަށް ވެސް އެކިވަރުގެ އަނިޔާ ލިބިފައިވާއިރު، މި ހިތާމަވެރި ހާދިސާއާ ގުޅިގެން މެލޭޝިއާގައި ދިރިއުޅޭ ދިވެހި ކޮމިއުނިޓީއަށް ވަނީ ބޮޑު ސިހުމެއް ލިބިފައި
މެލޭޝިއާ ސަންވޭ ސަރަހައްދުގައި ހިނގި ނުރައްކާތެރި ކާރު އެކްސިޑެންޓު | ސޯޝަލް މީޑިއާ
މެލޭޝިއާގެ ކުއާލަލަމްޕޫރު ކައިރީގައި އޮންނަ ސަންވޭ ސަރަހައްދުގައި ހިނގި ނުރައްކާތެރި ކާރު އެކްސިޑެންޓެއްގައި ދިވެހި އަންހެން ދަރިވަރަކު ނިޔާވެއްޖެ އެވެ.
މި ހާދިސާގައި ނިޔާވެފައިވަނީ އައްޑޫ ސިޓީ ހިތަދޫއަށް ނިސްބަތްވާ އުމުރުން 21 އަހަރުގެ އަންހެނެކެވެ.
މި ހާދިސާއާ ގުޅޭގޮތުން ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) މީޑިއާތަކަށް މައުލޫމާތު ދެއްވަމުން ވިދާޅުވީ، ނިޔާވި އަންހެން ކުއްޖާއަކީ މެލޭޝިއާގައި މަތީ ތައުލީމު ހާސިލުކުރަމުން ދިޔަ ދަރިވަރެއް ކަމަށެވެ. މި ހިތާމަވެރި ހާދިސާ ހިނގާފައިވަނީ އޭނާ މޯލްއަކަށް ދިއުމަށްފަހު އެނބުރި ގެޔަށް ދިޔަ މަގުމަތީގައި ކަމަށް ރިޕޯޓުތައް ބުނެ އެވެ.
މި އެކްސިޑެންޓް ހިނގި ވަގުތު ކާރުގައި އިތުރު ދިވެއްސަކު ވެސް އިނެވެ. އެ މީހާއަށް ވެސް އެކިވަރުގެ އަނިޔާ ލިބިފައިވާ ކަމަށް މައުލޫމާތު ލިބިފައިވީ ނަމަވެސް، އޭނާއާ ގުޅޭ އިތުރު ތަފްސީލެއް އަދި މިހާތަނަށް ރަސްމީ އިދާރާތަކުން ހާމަކޮށްފައެއް ނުވެ އެވެ.
މެލޭޝިއާއަކީ ގިނަ އަދަދެއްގެ ދިވެހި ދަރިވަރުންނާއި އާއިލާތައް ދިރިއުޅެމުންދާ ގައުމަކަށް ވާއިރު، މި ހާދިސާގެ ސަބަބުން އެ ގައުމުގައި ދިރިއުޅޭ ދިވެހި ކޮމިއުނިޓީއަށް ވަނީ ބޮޑު ސިހުމަކާއި ހިތާމައެއް ލިބިފަ އެވެ.
