ފެނަކަ ސްޓެލްކޯގެ ދަށަށް ބަދަލުކުުރުމުގެ ތެރޭގައި "ޕްރްކެޓިކަލް އަދަދަކަށް" މުވައްޒަފުން ނެގުމަށްފަހު ބާކީ ތިބި މުވައްޒަފުން ވަކިކުުރުމަށް ރައީސް އޮފީހުން އަންގައިފި

ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ ދަށަށް ފެނަކަ ކޯޕަރޭޝަން ލިމިޓެޑް ބަދަލުކުރުމުގެ ތެރޭގައި "ޕްރެކްޓިކަލް އަދަދަކަށް" މުވައްޒަފުން ނެގުމަށްފަހު ބާކީ ތިބި މުވައްޒަފުން ވަކިކުރުމަށް ރައީސް އޮފީހުން ފިނޭންސް މިނިސްޓްރީއަށް އަންގައިފި އެވެ. 

މިކަން އަންގާފައިވަނީ ރައީސް އޮފީހުގެ ޕްރިންސިޕަލް ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯ އަހުމަދު ހަބީބު ސޮއިކުރައްވާ ފިނޭންސް މިނިސްޓަރު ހަސަން ޒަރީރަށް ފޮނުއްވި ސިޓީއެއްގަ އެވެ. 22 ސެޕްޓެމްބަރުގައި އެގޮތަށް އަންގައި ރައީސް އޮފީހުން ފޮނުވި ސިޓީގެ ކޮޕީއެއް ރާއްޖެއެމްވީއަށް ލިބިފައިވާއިރު، މިއީ ސައްހަ ސިޓީއެއްކަން އެކި މަސްދަރުތަކުން ވަނީ ކަށަވަރު ކޮށްދީފަ އެވެ.

Advertisement

އެގޮތުން މި ސިޓީގައި ބުނެފައިވަނީ، ސަރުކާރު ހިއްސާވާ ކުންފުނިތަކުގެ ހަރަދުތައް ކުޑަކޮށް، ހިންގުން ހަރުދަނާކުރުމުގެ އިތުރުން، އުފެއްދުންތެރިކަން އިތުރުކުރުމަށްޓަކައި، ރައީސް ގެންނަވަން ނިންމަވާފައިވާ ބަދަލުތައް ތަންފީޒުކުރުމަށް އެކުލަވާލައްވާފައިވާ ވަގުތީ ކޮމިޓީން 2026 ސެޕްޓެމްބަރު 19 ވަނަ ދުވަހު ބައްދަލުވުމެއް ބާއްވާފައިވާ ކަމަށެވެ. 

މި ބައްދަލުވުމުގައި، މަޝްވަރާ ކުރެވުނު ކަންތައްތަކުގެ ތެރެއިން ކުރިއަށް ގެންދެވުމަށް ރައީސް މުއިއްޒު ވިދާޅުވި ކަންކަމަކީ ފެނަކަ ސްޓެލްކޯއާ އެއްކޮށްލުމުގެ މަރުހަލާގައި ވަކި އަދަދަކަށް މުވައްޒަފުން ވަކިކުރުމަށް ނިންމުމުގެ ބަދަލުގައި އޮޕަރޭޝަނަށް ބޭނުންވާނެ އެންމެ ޕްރެކްޓިކަލް އަދަދަކަށް މުވައްޒަފުން ނެގުމަށްފަހު ސްޓެލްކޯގެ އައު އޮނިގަނޑުގެ ތެރެއަށް އެ މުވައްޒަފުން ހަމަޖައްސައި، ބާކީ ތިބި މުވައްޒަފުން ވަކިކުރުން ކަމަށް ސިޓީގައި ބުނެފައިވެ އެވެ. 

ހަމައެއާއެކު، ފެނަކައިގެ މުވައްޒަފުން ސްޓެލްކޯއަށް ބަދަލުކުރާއިރު، މިހާރު ލިބެމުންދާ ޖުމްލަ މުސާރައަށް ވުރެ ކުޑަވެގެން ނުވާނެ ކަމަށާއި 2027 ވަނަ އަހަރުގެ ރަމަޟާން މަހުގެ ކުރިން ފެނަކައިން ހިދުމަތްދޭ ރަށްތައް ސްޓެލްކޯގެ ދަށަށް ބަދަލުކޮށް ނިންމުމަށް ސިޓީގައި އަންގާފައިވެ އެވެ. 

މީގެ އިތުރުން، އައްޑޫ ސިޓީ އަދި ފުވައްމުލައް ސިޓީގެ ފެނާއި ނަރުދަމާގެ ހިދުމަތް މާލެ ވޯޓަރ ސުވަރޭޖް ކޮމްޕެނީ ޕްރައިވެޓް ލިމިޓެޑް ( އެމްޑަބްލިއުއެސްސީ) މެދުވެރިކޮށްދިނުމަށާއި، ކަރަންޓް ހިދުމަތް ސްޓެލްކޯ މެދުވެރިކޮށް ދިނުމަށް އަންގާފައިވެ އެވެ.  

އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސަރުކާރުގެ ހިއްސާ އެންމެ މަދުވެގެން 90 އިންސައްތަ އަށް އިތުރުކުރުމަށް ފިނޭންސް މިނިސްޓްރީން މިހާރު ހުށަހަޅާފައިވާ ކަލްކިއުލޭޝަންތައް އިތުރަށް ފުރިހަމަ ކުރުމަށްފަހު، ކޮމިޓީއަށް އޮޕްޝަންތަކާއެކު އަލުން ހުށަހެޅުމަށް އަންގާފައިވެ އެވެ. 

މި ސިޓީގައި އިތުރަށް ބުނެފައިވަނީ މި ނިންމުންތައް ތަންފީޒުކުރުމަށް ފިނޭންސް މިނިސްޓްރީން ކުރަން ޖެހޭ އެންމެހާ ކަންކަން ކަމާގުޅޭ ފަރާތްތަކާ މަޝްވަރާކޮށްގެން ގާނޫނާއި ގަވާއިދާ އެއްގޮތްވާ ގޮތުގެ މަތިން ކުރިއަށް ގެންދިޔުމަށެވެ.