އިސްލާމްދީނަށް ފުރައްސާރަކުރާ ފަރާތްތަކާމެދު ފިޔަވަޅު އަޅާނަން: އިސްލާމިކް މިނިސްޓްރީ
20 ޖެނުއަރީ 2019 | އާދީއްތަ 07:35ދީނީ މައުލޫމާތު އޮޅުން ފިލުވުމަށް ބޭނުންވާ ފަރާތްތަކަށް މިނިސްޓްރީއަށް ވަޑައިގެން އެފަދަ މައުލޫމާތު ސާފު ކުރެވޭނެ
އިސްލާމިކް މިނިސްޓްރީ
އިސްލާމް ދީނަށް މަލާމާތްކޮށް ފުރައްސާރަކުރާ ފަރާތްތައް ހޯދައި ކަމާބެހޭ މުއައްސަސާތަކާ ގުޅިގެން އެކަންތައްތައް ހުއްޓުވުމަށް މަސަތްކަތްކުރާނެކަމަށް އިސްލާމިކް މިނިސްޓްރީން ބުނެފިއެވެ.
އާދިއްތަ ދުވަހު އިސްލާމިކް މިނިސްޓްރީން ނެރުނު ބަޔާނެއްގައި ބުނީ، ފަހަކަށް އައިސް ބައެއް މީހުންގެ ފަރާތުން ސޯޝަލް މީޑީއާ އާއި ނޫސް މަޖައްލާތަކުގެ ނާޖާއިޒު ފައިދާ ނަގައި އިސްލާމްދީނާ ގުޅޭގޮތުން ސައްހަ ނޫން މައުލޫމާތު ފަތުރަމުންދާކަމަށާއި، އެކަމުގެ ޝަކުވާ މިނިސްޓްރީއަށް ލިބެމުންދާކަމަށެވެ.
މީގެއިތުރުން އެބަޔާނުގައި ބުނެފައިވަނީ ދިވެހިރާއްޖޭގެ ދައުލަތުގެ ދީނަކީ އިސްލާމްދީންކަމަށާއި، ދީނާ ހިލާފް ވަހަކަދެއްކުމުގެ ސަބަބުން އިސްލާމީ މުޖުތަމައުގައި އެއްބައިވަންތަކަން ގެއްލި އިސްލާމީ ވަހުދަތު ގެއްލިގެންދާނެކަމަށެވެ.
އެހެންކަމުން ފޮރުވިގެން ތިބެ ދީނުގެ ނަމުގައި ހަރުކަށިކަމާއި، އަނިޔާވެރިކަމަށް ހިތްވަރުދީ މީހުންގެ މުދަލާއި، ފުރާނައަށް ޝަރުޢީ ހަމަތަކުން ބޭރުން ގެންލުން ދޭނެކަމުގެ އިންޒާރު ދިނުން ފަދަ އިސްލާމްދީން އެކަންކަމުން ބާރިއާވެގެންވާ ކަންކަން ކުރާ ފަރާތްތަކާ މެދުވެސް ފިޔަވަޅު އަޅަން މަސަތްކަތްކުރާނެ ކަމަށް އިސްލާމިކް މިނިސްޓްރީން ނެރުނު ބަޔާނުގައި ވަނީ ބުނެފައެވެ.
ދީނީ މައުލޫމާތު އޮޅުން ފިލުވުމަށް ބޭނުންވާ ފަރާތްތަކަށް އިސްލާމިކް މިނިސްޓްރީއަށް ވަޑައިގެން އެފަދަ މައުލޫމާތު ސާފު ކުރެވޭނެ އިންތިޒާމް ހަމަޖެހިފަވާނެކަމަށާއި، މީސް މީޑިޔާގައި އެފަދަ އިސްލާމްދީނުގެ ސަފުތައް ރޫޅިގެންދާ ފަދަ އެއްވެސް ވާހަކައެއް ނުދެއްކުމަށް އިސްލާމިކް މިނިސްޓްރީން ވަނީ އިލްތިމާސްކޮށްފައެވެ.
މީގެ އިތުރުން އިސްލާމީ ވަހުދަތު ހިފެހެއްޓުމައްޓަކައި ކަމާބެހޭ މުއައްސަސާތަކުން ކުރަންޖެހޭ މަސަތްކަތް ކުރުމަށްވެސް ވަނީ އިލްތިމާސް ކޮށްފައެވެ.
