މެކްސިކޯގެ ތެޔޮހޮޅިއެއް ގޮވައި 21 މީހުން މަރުވެއްޖެ
19 ޖެނުއަރީ 2019 | ހޮނިހިރު 08:07ތެޔޮ ހޮޅިތަކުން ވައްކަންކުރަނީ ކާޓެލްތަކުން ކަމަށް އިދާރާތަކުން ބުނޭ
ތެޔޮހޮޅި ގޮވާފައިވަނީ ވަގަށް ތެޔޮ ނަގަން އުޅުމުގެ ތެރޭކަމަށް ބެލެވޭ
މެކްސިކޯގައި ހުކުރު ދުވަހު ތެޔޮ ހޮޅިއެއް ގޮވައި މަދުވެގެން 21 މީހުން މަރުވެ 71 މީހުން ޒަޚްމްވެއްޖެކަމަށް އެ ގައުމުގެ ފެޑެރަލް އިދާރާތަކުން ބުނެފިއެވެ.
ތެޔޮހޮޅި ގޮވާފައިވަނީ ތެޔޮ ނެގުމަށް މީހުން ޖަމާވެފައިވަނިކޮށެވެ. ހޮޅި ގޮވާފައިވަނީ ވަގަށް ތެޔޮ ނަގަން އުޅެނިކޮށްކަމަށް ބެލެވެ އެވެ.
މެކްސިކޯގެ ޓީވީތަކުން ގެނެސްދިން ވީޑިއޯ ފުޓޭޖްތަކުން ފެންނަ ގޮތުގައި އީވަލްވޯ ސްޓޭޓްގައި ހިނގި މިހާދިސާގައި ތެޔޮ ހޮޅިން ލީކުވަމުންދިޔަ ތެލާއެކު ޖައްވުގެ ތެެރެއަށް އަލިފާންގަނޑުއަރާފައިވެއެވެ. މީހުން އެހީއަށްއެދި ހަޅޭއްލަވަމުންދިޔަ އަޑުއިވެއެވެ.
އެ ސިޓީގެ ގަވަރުނަރު އޮމަރު ފަޔާދް މެކްސިކޯގެ ޓީވީ ސްޓޭޝަނެއްގައި ވިދާޅުވީ ކުއްލި ހާލަތުގައި މަސައްކަތްކުރާ މީހުންގެ ތެރެއިން 20 މީހެއް ހަށިގަނޑު ހޯދިފައިވާކަމަށެވެ. އިތުރު 71 މީހުން ޒަޚްމްވެފައިވާކަމަށް ގަވަރުނަރު ވިދާޅުވިއެވެ.
މެކްސިކޯގައި ގާއިމްކޮށްފައިވާ ޕެޓްރޯލް އުފުލާ ޕައިޕް ވިއުގައިން ޕެޓްރޯލް ވަގަށް ނެގުން ހުއްޓުވުމުގެ ގޮތުން، މުހިއްމު ބައެއް ޕައިޕްތައްވަނީ ބަންދުކޮށްފައެވެ.
އެކަމާގުޅިގެން ތެޔޮ ލިބުން ދަތިވެފައިވާއިރު މެކްސިކޯގެ ރައީސް މެނުއެލް ލޮޕޭޒް އޮބްރަޑޯރ މިދިޔަ ހަފްތާގައި ވިދާޅުވީ ޕެޓްރޯލް ލިބުމުގައި ދަތިތަކެއް ނޫޅޭ ކަމަށާއި، ދިމާވެގެން އުޅެނީ ޕެޓްރޯލް ޑިސްޓްރިބިއުޝަންއަށް ގެނައި ބަދަލެއްގެ ސަބަބުން ފެން މަތިވެގެން އުޅޭ މައްސަލަތަކެއް ކަމަށެވެ.
އޮބްރަޑޯރ ވިދާޅުވީ މި ވައްކަންތަކުގެ ސަބަބުން މިދިޔަ އަހަރު އެކަނިވެސް އެ ގައުމަށް 3 ބިލިއަން ޑޮލަރުގެ ގެއްލުން ލިބިފައިވާ ކަމަށެވެ.
