ރޮޒެއިނާ އާއި ހިސާންގެ ދެމަފިރިކަނބަލުން ވެސް އެމްޑީޕީގެ ޓިކެޓް ކަށަވަރު!
ރޮަޒައިނާ ކާމިޔާބު ކުރެއްވީ އެމްޑީޕީގެ މީދޫ ދާއިރާގެ ޓިކެޓު، އަދިި ނާޝިޒް ކާމިޔާބު ކުރެއްވީ ކިނބިދޫ ދާއިރާގެ ޓިކެޓު
(ކ-ވ) ހިސާން ހުސައިން، އިބްރާހިމް ނާޒިލް، ރޮޒައިނާ އާދަމް އަދި މުހައްމަދު ނާޝިޒް
އެމްޑީޕީގެ ޕްރައިމަރީގެ ޓިކެޓް މީދޫ ދާއިރާގެ މެމްބަރު ރޮޒެއިނާ އާދަމްގެ ދެމަފިރިންނާއި ރައީސް މުހައްމަދު ނަޝީދުގެ ގާނޫނީ ވަކީލް ހިސާން ހުސައިންގެ ދެމަފިރިން ކަށަވަރުކުރައްވައިފި އެވެ.
އައްޑޫ މީދޫ ދާއިރާގެ ޕްރައިމަރީގައި އިމާދު ސޯލިހުއާއި ހަސަން ޝާހިދުއާ ވާދަކުރައްވާ ރޮޒައިނާ ކާމިޔާބު ކުރެއްވީ ޖުމްލަ 693 ވޯޓުންނެވެ. ރޮޒައިނާއާއި އެއްމެ ގާތުން ވާދަކުރެއްވި އިމާދު ސޯލިހުއަށް ލިބިވަޑައިގެންނެވީ 415 ވޯޓެވެ. ހަސަން ޝާހިދުއަށް ލިބިވަޑައިގެންނެވީ 121 ވޯޓެވެ. ރޮޒައިނާ ރައްޔިތުންގެ މަޖިލީހަށް ފުރަތަމަ އިންތިޚާބުވީ 2009 ވަނަ އަހަރު ތުލުސްދޫ ދާއިރާގެ މެމްބަރެއްގެ ގޮތުގަ އެވެ.
ރައްޔިތުންގެ މަޖިލީހުގެ އަލިފުށީ ދާއިރަގެ މެމްބަރުކަން ކުރިން ކުރެއްވި ރޮޒައިނާގެ ފިރިކަލުން މުހައްމަދު ނާޝިޒު މިފަހަރު ޕްރައިމަރީގައި ވާދަކުރެއްވީ ކިނބިދޫ ދާއިރާއަށެވެ. ކިނބިދޫ ދާއިރާގެ ރައީސްގެ މަގާމުގައި ވެސް ހުންނެވި ނާޝިޒު ޓިކެޓް ހޯއްދެވީ ކިނބިދޫއަށް ނިސްބަތްވާ ދެބޭފުޅުން ކަމުގައިވާ މުހައްމަދު އައިމަންއާއި ހުސައިން ޝަރީފުއާ ވާދަކުރެއްވުމަށް ފަހު އެވެ.
މަޖިލީހުގެ ތުޅާދޫ ދާއިރާގެ އެމްޑީޕީ ޓިކެޓް ގާނޫނީ ވަކީލާ ހިސާން ހުސައިން ކާމިޔާބު ކުރެއްވީ އެ ދާއިރާއަށް ދެން ވާދަކުރެއްވި ހަތަރު ބޭފުޅުން ބަލިކުރެއްވުމަށް ފަހު، ބޮޑު ތަފާތަކުންނެވެ. ހިސާންގެ ފިރިކަލުން އިބްރާހިމް ނާޒިލް މަޖިލީހުގެ ހިތަދޫ ދެކުނު ދާއިރާގެ އެމްޑީޕީ ޓިކެޓު ކާމިޔާބު ކުރެއްވީ އެ ދާއިރާގެ މަޖިލިސް މެމްބަރު އަލީ ނިޒާރު ވާދަކޮށްގެންނެވެ.
ނިޒާރުއަށް 599 ވޯޓު ލިބިވަޑައިގެންނެވި އިރު، ނާޒިލްއަށް ލިބިވަޑައިގަތީ 806 ވޯޓެވެ. ނާޒިލްއަކީ އެމްޑީޕީގެ ހިތަދޫ ދެކުނު ދާއިރާގެ ރައީސްއެވެ.
އެމްޑީޕީގެ ޕްރައިމާރީގައި މި ދެ ޖޯޑަށް ކާމިޔާބު ލިބިވަޑައިގެންނެވި އިރު، ޓިކެޓު ހޯއްދަވަން ދެން ވާދަކުރެއްވި ޖޯޑު ކަމުގައިވާ އަބްދުﷲ ޖާބިރު އާއި ދިޔާނާ ސައީދަށް މި ފަހަރުގެ އެމްޑީޕީގެ ޕްރައިމަރީގައި ވަނީ ނާކާމިޔާބު ލިބިވަޑައިގެންފަ އެވެ. ޖެހުނީ ނާކާމިޔާބީއާއި ކުރިމަތިލައްވައި ވަޑައިގަންނަވަން ޖެހިފައެވެ. ޖާބިރު ވާދަކުރެއްވި ކާށިދޫ ދާއިރާގެ ޕްރައިމަރީ ކާމިޔާބު ކުރެއްވީ އަބްދުﷲ ރިފްއަތެވެ. ދިޔާނާއާއި ވާދަކުރެއްވި ވިލިނގިލީ ދާއިރާގެ ޓިކެޓު ހޯއްދެވީ ހާރޫން ރަޝީދުއެވެ.
