ކެންޔާގެ ވެރިރަށް ނައިރޯބީގެ ހޮޓަލަކަށް ދިން ހަމަލާގައި 21 މީހުން މަރުވެއްޖެ

ކެންޔާގެ ވެރިރަށް ކަމަށްވާ ނައިރޯބީގެ ހޮޓަލަކަށް ދިން ހަމަލާގައި 21 މީހުން މަރުވެފައިވާ ކަމަށް އެ ޤައުމުގެ ރިޕޯރޓްތަކުން ބުނެފިއެވެ.

ކެންޔާ ފުލުހުންގެ އިންސްޕެކްޓަރ ޖެނެރަލްއާ ހަވާލާދީ އެ ޤައުމުގެ މީޑިއާ ރިޕޯރޓްތަކުން ބުނެފައި ވަނީ މަރުވި މީހުންގެ ތެރޭގައި ފުލުސް އޮފިސަރެއް ވެސް ހިމެނޭ ކަމަށެވެ. އޭގެ އިތުރުން އެމެރިކާގެ ރައްޔިތަކާއި އިނގިރޭސިވިލާތުގެ ރައްޔިތެއް ވެސް މި ހާދިސާގައި މަރުވެފައި ވެއެވެ.

މި ހާދިސާގައި 28 މީހުންނަށް ސީރިއަސް ޒަހަމްތަކެއް ލިބިފައިވާއިރު، ހާދިސާއާ ގުޅިގެން ކެންޔާގެ ރައީސް ނެރުނު ބަޔާނެއްގައި ބުނެފައި ވަނީ ހަމަލާގައި ބައިވެރިވި ހުރިހާ ޓެރަރިސްޓުުން މަރާލާފައިވާ ކަމަށާއި، 700 އަށް ވުރެ ގިނަ އާންމުން ރައްކާތެރި ހިސާބުތަކަށް ބަދަލު ކޮށްފައިވާ ކަމަށެވެ.

އެ ހަމަލާގެ ޒިންމާ ސޯމާލިއާގެ ޖަމާއަތެއް ކަމަށްވާ އަލް ޝަބާބުން ނަގާފައިވާއިރު، 2015 ވަނަ އަހަރު ވެސް އެ ޖަމާއަތުން ވަނީ ކެންޔާގެ ކޮލެޖަކަށް ހަމަލާދީ 148 މީހުން މަރާލާފައެވެ. އަދި 2014 ވަނަ އަހަރު ވެސް ކެންޔާގެ ބަހެއް ހައިޖެކްކޮށް 28 މީހުން މަރާލާފައި ވެއެވެ.

ކެންޔާ އިން 2011 ވަނަ އަހަރު ސޯމާލިއާއާ ދެކޮޅަށް ހިންގި އަސްކަރީ އޮޕަރޭޝަންތަކަށް ފަހު ސޯމާލިއާގެ މައި ޓާގެޓަކަށް ކެންޔާ ވެފައިވާ ކަމަށް އެޤައުމުގެ ރިޕޯރޓުތައް ބުނެއެވެ.