ދިވެހި ސިފައިންގެ ގައުމީ ލަވަ އަލްބަމް މިފަހަރު ވަރަށް ތަފާތު، ބަހުރުވައަކުން ލަވައެއް!

ގައުމީ ޖޯޝު އާކޮށްލައި، ގައުމީ ލޭ ކައްކުވާލުމަށް ދިވެހި ސިފައިން ވަރުގެ ބައެއް ނެތެވެ. ސިފައިން ނެރޭ ލަވަތަކަކީ ގައުމު ދެކެ ލޯބިވާ މީހުންގެ ގައިން ހީބިހި ނަގައިގެންދާ ފަދަ ގައުމީ ރޫހާއި ފޯރި އާލާކޮށްދޭ ލަވަތަކެކެވެ. ސިފަވަންތަކަން ދައްކުވައިދޭ ލަވަތަކެކެވެ. ގައުމަށްޓަކައި ގުރުބާންވުމާއި، ގައުމާއި ދީނުގެ ހިމާޔަތުގައި ސިފައިން ދެމި ތިބިކަމުގެ ޔަގީންކަން ލަވަތައް މެދުވެރިކޮށް ރައްޔިތުންނާ ހަމައަށް ކޮންމެ އަހަރަކުވެސް ސިފައިން ދަނީ ގެނެސްދެމުންނެވެ.

ކޮންމެ އަހަރެއްގެ ގައުމީ ދުވަހާއި ދިމާކޮށް ގައުމީ ލަވައިގެ އަލްބަމެއް ސިފައިން ނެރެމުން އަންނަތާ މިއީ 16 ވަނަ އަހަރެވެ. މިއަހަރުގެ ލަވަ އަލްބަން ހޮނިހިރު ދުވަހު ނެރުނުއިރު، މިއީ އެންމެ ތަފާތު އަހަރޭ ބުނުން ދޮގަކަށް ނުވާނެ އެވެ. އެހެން އަހަރުތަކުގައި ލަވަތައް ހުރީ ބަހުރުވައިންނެވެ. އެހެން ނަމަވެސް، މިފަހަރުގެ އަލްބަމުގައި، ރާއްޖޭގައި އާންމުކޮށް މީހުން ވާހަކަ ދައްކައި އުޅޭ މައިގަނޑު ކޮންމެ ބަހުރުވައަކުން ލަވައެއް ހިމެނެ އެވެ.

ސިފައިން މިއަހަރު ނެރުނު ގައުމީ ލަވަ އަލްބަމުގައި ހިމެނެނީ 8 ލަވަ އެވެ. އައްޑޫ ބަހުރުވައިން ލަވައަކާއި، ފުވައްމުލަކު ބަހުރުވައިން ލަވައަކާއި، ހުވަދު އަތޮޅު އުތުރުބުރީ ބަހުރުވައިން ލަވައަކާއި، ހުވަދުއަތޮޅު ދެކުނު ބުރީ ބަހުރުވައިން ލަވައަކާއި، ހިރިލަންދޫ ބަހުރުވައިން ލަވައަކާއި، ހައްދުންމަތީ ބަހުރުވައިން ލަވައަކާއި، ނައިފަރު ބަހުރުވައިން ލަވައެއްގެ އިތުރުން މާލޭ ބަހުރުވައިން ލަވައެކެވެ.

މި ލަވަތަކުން ރާއްޖޭގެ އެކިކަންކޮޅުތަކުގައި ވާހަކަ ދައްކައި އުޅޭ ބަހުރުވަތަކުގެ ތަފާތުތައް ވަރަށް ރަނގަޅަށް އެނގެ އެވެ. ބަހުރުވަތައް ރަނގަޅަށް ނޭނގޭ މީހުންނަށް މަޖާ ކަމަކަށްވެސް ވެދާނެ އެވެ. އެހެންނަމަވެސް، މިއީ ސިފައިން ކޮށްފައިވާ ތައުރީފު ހައްގު މަސައްކަތެކެވެ.

މި އަލްބަމަށް ޅެން ހައްދަވައި ދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް އުމަރުގެ އިތުރުން ހަސަން ލަބީބުއާއި، ފަތުހުﷲ ސާލިޙުއާއި، އަބްދުﷲ އަފީފުއާއި، ދިވެހި ބަހުގެ އެކަޑަމީގެ ރައީސް އަޝްރަފް އަލީއާއި، އިންފޮމޭޝަން ކޮމިޝަނަރ އަބްދުލް ޢަޒީޒު ޖަމާލު އަބޫބަކުރުއާއި، ޢަބްދުލްޖަލީލް އިސްމާއީލު އަދި މުހައްމަދު އަބްދުލް ޣަނީއެވެ.

އައްޑޫ ބަހުރުވައިގެ ލަވަ: އަފިރިންގެ އަޒުމު

ފުވައްމުލަކު ބަހުރުވައިގެ ލަވަ: ހަމަ ނަމޫނާ

ހުވަދު އަތޮޅު އުތުރުބުރީ ބަހުރުވައިގެ ލަވަ: ހިޒުމަތެ ކެރެންނައު މިގައުމާއި މި ދީނަޓެ

ހުވަދު އަތޮޅު ދެކުނުބުރީ ބަހުރުވައިގެ ލަވަ: އަހަންނާންނައްކޫ ދިވެހީންނެ

ހިރިލަންދޫ ބަހުރުވައިގެ ލަވަ: މިނިވަންކަމުގެ އުފާ

ހައްދުންމަތީ ބަހުރުވައިގެ ލަވަ: ގައުމަށް ކެރަން ޚިދުމަތް ދެމީގެން ދާޅެވެ

ނައިފަރު ބަހުރުވައިގެ ލަވަ: މުވާތިނުވޭ

މާލޭ ބަހުރުވައިގެ ލަވަ: ގައުމީ ނިދާ