ދިރާސީ އާ އަހަރަށް މިނިސްޓްރީ އާއި ސްކޫލުތައް އޮތީ ތައްޔާރުވެފައި: މިނިސްޓަރ
10 ޖެނުއަރީ 2019 | ބުރާސްފަތި 14:09މިއަހަރައް އިތުރު 153 ބިދޭސީ ޓީޗަރުން ބޭނުންވެގެން ސްކޫލްތަކުން އެދިފައިވޭ
ސްކޫލް ދަރިވަރުންތަކެއް
ދިރާސީ އާ އަހަރަކަށް މިނިސްޓްރީ އާއި ސްކޫލްތަކުން ވަނީ ވަރަށް ބޮޑަށް ތައްޔާރުވެފައި ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
އެޑިޔުކޭޝަން މިނިސްޓްރީގައި ބްރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ އަތޮޅުތެރޭގެ ބައެއް ސްކޫލްތަކުގެ އާބާތުރަ ފިލުވުމުގެ މަސައްކަތް ނިމިފައި ވާކަމަށާއި އަދި ސްކޫލްތަކަށް ބޭނުންވާ ގޮނޑި, މޭޒް ފަދަ ތަކެތި ވެސް ހަމަކޮށްފައިވާ ކަމަށެވެ.
މީގެ އިތުރުން މިއަހަރައް އިތުރު 153 ބިދޭސީ ޓީޗަރުން ބޭނުންވެގެން ސްކޫލްތަކުން އެދިފައިވާއިރު ދަތުރުފަތުރު ކުރުމުގެ ބައެއް ކަހަލަ މައްސަލަތައް ދިމާވުމުގެ ސަބަބުން ބައެއް ޓީޗަރުންނަށް ރާއްޖެ އައުމަށް ދަތިތަކެއް ކުރިމަތިވެފައިވާ ކަމަށް މިނިސްޓަރު ވިދާޅުވިއެވެ.
އެޑިއުކޭޝަނުން ބުނީ ގްރޭޑް 1-7 ދެމެދުގެ ގްރޭޑްތަކުގެ ދަރިވަރުންނަށް ބޭނުންވާ ޓެކްސްޓް ފޮތްތައް މިހާރު ހުރިހާ ސްކޫލަކަށް ފޮނުވާފައިވާއިރު ގްރޭޑް 8 އާއި 9ގެ ދަރިވަރުންގެ ފޮތްތައް މިއަދު މިނިސްޓްރީއަށް ލިބޭނެ ކަމަށާއި ސްކޫލްތައް ހުޅުވުމުގެ ކުރިން ދަރިވަރުންނަށް ހަވާލު ކުރެވޭނެ ކަމަށެވެ. ނަމަވެސް ބައެއް ސްކޫލްތަކުން ދަށް ގްރޭޑްގެ ބައެއް ޓެކްސްޓް ފޮތްތައް ދަރިވަރުންނާ ހަވާލުކޮށްފައެއް ނުވެއެވެ. އެ ފޮތްތައް ސްކޫލް ހުޅުވޭ ދުވަހު ހަވާލުކުރެވޭނެ ކަމަށް ސްކޫލްތަކުން ބުނެފައި ވެއެވެ.
ސަރުކާރުގެ ފުރަތަމަ 100 ދުވަހު ކުރުމަށް ނިންމާފައިވާ ކަންކަމުގެ ތެރޭގައި ހިމެނޭ ހެނދުނުގެ ނާސްތާ ޕްރޮގްރާމް ހިންގުމަށް ހަމަޖެހިފައިވާ 25 ސްކޫލުގެ ތެރެއިން 22 ސްކޫލެއްގައި މި ޕްރޮގްރާމް ކުރިއަށް ގެންދިއުމުގެ ހުރިހާ އިންތިޒާމެއް ހަމަޖެހިފައިވާ ކަމަށް ވެސް މިނިސްޓަރު ވިދާޅުވިއެވެ. އަދި ބާކީ ތިން ސުކޫލްގެ ކަންކަން މިއަދު ހަމަޖެހިގެންދާނެ ކަމަށް ވެސް ވިދާޅުވިއެވެ.
މި އަހަރު ޕްރީ ސްކޫލުން ފެށިގެން ގްރޭޑް 12 އާ ހަމައަށް 73،035 ދަރިވަރުން ކިޔަވާނެ އެވެ. އަދި ރާއްޖޭގެ 213 ސުކޫލެއްގައި 9800 އަށް ވުރެ ގިނަ ޓީޗަރުން މަސައްކަތްކުރާނެއެވެ.
ސްކޫލްތަކާއި އެޑިއުކޭޝަން މިނިސްޓްރީ ތައްޔާރުވެފައިވާ ކަމަށް މިނިސްޓްރީން ބުނި ނަމަވެސް ބައެއް ސްކޫލްތަކުގެ އެކްޓިވިޓީ ޔުނީފޯމް ނުލިބުމުގެ މައްސަލަތައް ވަނީ ފެންމަތިވެފައެވެ. ހާއްސަކޮށް ބަދަލުތައް ގެނައި ސްކޫލްތަކުގެ އެކްޓިވިޓީ ޔުނީފޯމް ނުލިބޭކަން ފާހަގަކޮށްލެވެއެވެ. އެ ގޮތުން ކަލާފާނު ސްކޫލްގެ އެކްޓިވިޓީ ޔުނީފޯމް ބަދަލުވެފައިވާ އިރު ގިނަ ކުދިންނަށް ޔުނިފޯމް ލިބިފައި ނުވާތީ މިދިޔަ އަހަރު ވެސް ބޭނުންކުރި ޔުނީފޯމް ބޭނުންކުރެވޭނެ ކަމަށް އެ ސްކޫލުން ވަނީ ބެލެނިވެރިންނަށް އަންގާފައެވެ. ނަމަވެސް ޔުނީފޯމް ބަދަލުވެފައިވާތީ މިދިޔަ އަހަރުގެ ޔުނީފޯމް އެއްލާލުމުން އެކްޓިވިޓީ ޔުނީފޯމް ނެތް ކަމަށް ބުނެ ބައެއް ބެލެނިވެރިން ދަނީ ޝަކުވާކުރަމުންނެވެ.
