ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ މީޑިއާ ގުރޫޕު ޕީއެންސީގެ ބެލުމުގެ ދަށަށް ގެނެސް ހިސޯރުކޮށްފިއެވެ.
''ޕިޕީއެމް މީޑިއާ ގްރޫޕު''ގެ ނަމުގައި ހަދާފައިވާ ވައިބަރ ގުރޫޕްގެ ނަން ''ކޮންގްރެސް މީޑިއާ'' ގެ ނަމަށް ބަދަލުކޮށްފައި ވަނީ ބުދަ ދުވަހުއެވެ.
ޕީޕީއެމް މީޑިއާ ގްރޫޕްގެ ނަން ކޮންގްރެސް މީޑިއާ އަށް ބަދަލުކޮށްފައިވަނީ ޕީޕީއެމްގެ ސެކްރެޓަރީ ޖެނެރަލް މުހައްމަދު ހުސައިން ޝަރީފް (މުންދު)އެވެ.
މުންދު ކޮންގްރެސް އަށް ސޮއިކުރެއްވީތޯ ބަލާލުމަށް ރާއްޖެއެމްވީން ގުޅާލުމުން ފޯނަށް ޖަވާބު ދެއްވާފައިނުވާތީ އިތުރު މައުލޫމާތު ސާފުވާ ގޮތް ވަނީ ނުވެފައެވެ. ޕީއެންސީ އަކީ ކުރީގެ ރައީސް ޔާމީން އިސްވެ ހުންނަވައިގެން އުފެއްދެވުމަށް މަސައްކަތް ކުރައްވަމުން އަންނަ ޕާޓީއެކެވެ. އެ ޕާޓީން ވަނީ 4000 މެމްބަރުން ހަމަކޮށް މެމްބަރޝިޕް ފޯމް ބުދަ ދުވަހު އިލެކްޝަންސް ކޮމިޝަނަށް ހުށައަޅާފައެވެ.
ޕީޕަލްސް ނޭޝަނަލް ކޮންގްރެސްގެ ނަމުގައި ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށައަޅާފައި ވަނީ މިދިޔަ އަހަރުގެ ޑިސެމްބަރު މަހުއެވެ.
