ޑރ. ޝަހީމް ޕީޕީއެމްއިން ވަކިވެވަޑައިގެން، ސިޔާސީ ކަންކަމާ ދުރަށް
9 ޖެނުއަރީ 2019 | ބުދަ 08:02ޝަހީމްވަނީ އޯއަސީގެ ސެކެޓްރީ ޖެނެރަލްގެ މަގާމަށް ހަމަޖައްސާފައި
ކުރީގެ އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު
ނިމިދިޔަ ރިޔާސީ އިންތިހާބުގައި ރައީސް އަބުދުﷲ ޔާމީން އަބްދުލްގައްޔޫމްގެ ރަނިން މޭޓް އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ޕީޕީއެމްއިން ވަކިވެވަޑައިގެން ސިޔާސީ މަސައްކަތާއި ދުރަށް ޖެހިވަޑައިގެންފިއެވެ.
ރައީސް ޔާމީންގެ ވެރިކަމުގައި އެ މަނިކުފާނުގެ އެންމެ އަރިސް ބޭފުޅުއްގެ ގޮތުގައި މަސައްކަތް ކުރެއްވި ޝަހީމް ވީޓީވީގެ ފަސްމަންޒަރު ޕްރޮގްރާމްގައި ވާހަކަފުޅު ދައްކަވަމުން ވިދާޅުވީ ޕީޕީއެމްއިން މިދިޔަ ހަފްތާގެ ތެރޭގައި ވަކިވެވަޑައިގެންފައިވާ ކަމަށާއި، ޕީޕީއެމުން ވަކިވެވަޑައިގެންނެވީ އެއްވެސް ބަޔަކާއި މައްސަލައެއް އޮވެެގެން ނޫންކަމަށެވެ. ޕީޕީއެމްއިން ވަކިވެވަޑައިގެންނެވިޔަސް އެއްވެސް ސިޔާސީ ޕާޓީއަކާއެކު މަސައްކަތް ކުރުމުގެ ވިސްނުމެއް ނެތް ކަމަށް ޝަހީމް ވަނީ ވިދާޅުވެފައެވެ.
ޝަހީމް މީގެ ކުރިން ވެސް ސިޔާސީ ހަޔާތް ނިންމާލެއްވި އެވެ. ނަމަވެސް އަލުން ސިޔާސީ ހަޔާތް ފެއްޓެވީ ޕީޕީއެމްއަށް ވަދެވަޑައިގެން، ޔާމީންގެ ރަނިން މޭޓަކަށް ވުމަށްޓަކަ އެވެ.
ޝަހީމް ސިޔާސީ ހަޔާތް ނިންމަވާލެއްވިއިރު، އޭނާގެ ގާތް އެކުވެރިއެއް ކަމުގައިވާ މުހައްމަދު ދީދީ ވަނީ ސިޔާސީ ޕާޓީއެއް އުފެއްދެވުމުގެ މަސައްކަތް ފައްޓަވާފަ އެވެ. ނޭޝަނަލް ރިފޯމް ޕާޓީއަށް ވަނުމުގެ ދައުވަތު ޝަހީމްއަށް ލިބިވަޑައިގެންފައިވާ ކަމަށާއި، ނަމަވެސް އެކަމާއި މެދު އަދި ގޮތެއް ނުނިންމަވާ ކަމަށް އޭނާ ވިދާޅުވި އެވެ.
އޯގަނައިޒޭޝަން އޮފް އިސްލާމިކް ކަންޓްރީސް (އޯއައިސީ)ގެ ސެކެޓްރީ ޖެނެރަލްގެ އެޑްވައިޒަރުގެ މަގާމަށް ޑރ. ޝަހީމް ހަމަޖައްސަވާފައިވާއިރު، އެ މަސްއޫލިއްޔަތު އަދާކުރެއްވުމަށް ސައުދީ އަރަބިއްޔާ އަށް އޭނާ ވަރަށް އަވަހަށް ފުރާވަޑައިގަންނަވާނެ އެވެ.
