ނައިބު ރައީސް ހިލާލީގެއަށް ބަދަލުވެވަޑައިގެންފި

ނައިބު ރައީސް ފައިސަލް ނަސީމްއާއި އެ މަނިކުފާނުގެ އާއިލާ، ހިލާލީގެއަށް ބަދަލުވެ ވަޑައިގެންފިއެވެ.

ނިމިދިޔަ އަހަރުގެ ނޮވެމްބަރުމަހު މަގާމުގެ ހުވާ ކުރައްވާފައިވާއިރު ނައިބު ރައީސް އާއި އާއިލާ ދިރިއުޅުއްވުމަށް ދައުލަތުން ހަމަޖެއްސެވި ގެކޮޅަށް ބަދަލުވެ ވަޑައިގެންނެވިފައި މިވަނީ މަގާމާ ހަވާލުވެވަޑައިގެންނެވިތާ ދެ މަހެއްހާ ދުވަސްވާން ކައިރިވެފައިވަނިކޮށެވެ. އެ މަނިކުފާނު ހިލާލީގެ އަށް ބަދަލުވެވަޑައިގަތީ ހޯމަ ދުވަހު ހަވީރު 5:00 ގަ އެވެ.

ނައިބު ރައީސް ފައިސަލްގެ ތިން ފިރިހެން ބޭފުޅުން ތިއްބަ އެވެ.

ނިމިދިޔަ ވެރިކަމުގައި ތިން ނައިބް ރައީސް ފެނިގެން ގޮސްފައިވާއިރު, ޑރ. މުހައްމަދު ޖަމީލް އަހްމަދު ފިޔަވައި، އެހެން ބޭފުޅުން ދިރިއުޅުއްވާފައިވަނީ އަމިއްލަފުޅު ގެކޮޅުގައާއި ރެހެންދި ފްލެޓްގައެވެ. އަދި ރައީސް އަބްދުﷲ ޔާމީންވެސް ވެރިކަމުގެ ކުރީކޮޅު އުޅުއްވާފައިވަނީ އޭރު އަމިއްލަފުޅު ގެކޮޅުކަމުގައިވާ ގ ދޫވެހީގައި މުސާރައިގެވެސް ދެބައިކުޅަ އެއްބައި ނަންގަވައިގެންނެވެ.

އޭގެ ފަހުން އެގެ މަރާމާތުކުރައްވައި އެގެއާއި ލާޖައްސައި ބޮޑު ބިމެއް ބައްލަވައިގަނެ އެގެ އިމާރާތް ކުރައްވަމުންދާއިރު މުސާރަ އެއްކޮށް ނަންގަވައި ވެރިކަން ނިމުމާހަމައަށް ދިރުއުޅުއްވާފައިވަނީ ހިލާލީގޭގައެވެ.

ހިލާލީގެއަށް ނައިބް ރައީސް ފައިސަލް ނަސީމް ބަދަލުވެ ވަޑައިގެންފައިވާއިރު އެގެއަށް އެ މަނިކުފާނު ބަދަލުވެ ވަޑައިގެންފައިއެވަނީ މަރާމާތުތަކަކަށްފަހުއެވެ.

ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅަށް މި އަހަރު ހަރަދު ކުރުމަށް ބަޖެޓްކޮށްފައި ވަނީ 2.5 މިލިއަން ރުފިޔާއެވެ. ރައީސް ސޯލިހު ދިރިއުޅުއްވާ ރަސްމީ ގެކޮޅަށް މިއަހަރު ހަރަދު ކުރުމަށް ބަޖެޓްކޮށްފައި ވަނީ 31.5 މިލިއަން ރުފިޔާއެވެ.

މިހާރު އޮތް ސަރުކާރުގެ މައި ޕާޓީއަކީ އެމްޑީމީކަމަށްވާއިރު އެ ޕާޓީގެ ފުރަތަމަ ވެރިކަމުގައިވެސް ރައީސުލް ޖުމްހޫރިއްޔާ މުލީއާގޭގައި ދިރިއުޅުއްވާފައިވާއިރު ނައިބް ރައީސް ދިރިއުޅުއްވާފައިވަނީ ހިލާލީގޭގައެވެ.

ރައީސް އިބްރާހިމް މުހައްމަދު ޞާލިހް މުލީއާގެއަށް ބަދަލުވެވަޑައިގެންފައިވަނީ މިދިޔަ އަހަރުގެ ނޮވެމްބަރުމަހުގެ 30 ވަނަ ދުވަހުއެވެ.