ހުވަދު އަތޮޅަށް ޔެލޯ އެލާޓް، ބޯކޮށް ވާރޭވެހި ދެ ރަށެއްގައި ފެންބޮޑުވެއްޖެ
ހުކުރު ދުވަހުގެ 7 އިން ފެށިގެން 9 އާއި ހަމައަށް ހުވަދު އަތޮޅަށް ޔެލޯ އެލާޓް ވަނީ ނެރެފައި
ވާދޫގައި ފެން ބޮޑުވެފައި
ހުވަދު އަތޮޅުގެ ބައެއް ރަށްތަކަށް ބޯކޮށް ވާރޭ ވެހެމުންދާއިރު، ދެ ރަށެއްގައި ފެންބޮޑުވެއްޖެ އެވެ.
ރޭ ދަންވަރު ފެށިގެން ވެހެމުންދާ ވާރޭގައި ފެންބޮޑުވެފައި ވަނީ ގދ. ވާދޫ އާއި ތިނަދޫގަ އެވެ.
އެމްއެންޑީއެފުން ބުނި ގޮތުގައި ވާރޭވެހި ތިނަދޫގެ މަގުތަކުގައި ފެން ބޮޑުވެފައިވާތީ، އެ ރަށުގެ ދެ ސަރަހައްދެއްގައި ޕަމްޕު ބަހައްޓައިގެން ފެން ހިންދުމުގެ މަސައްކަތް ތިނަދޫ ފަޔަރ ސްޓޭޝަނުން ކުރަމުންދަނީ ކުރަމުންނެވެ.
ވާދޫއަށް ބޯކޮށް ވާރޭވެހި އެރަށުގެ ބައެއް ގެތަކަށް ފެންވަދެފައިވާ ކަމަށާއި ފަރުނީޗަރަށާއި ގޭތެރޭގައި ގެންގުޅޭ ބައެއް ތަކެއްޗަށް ގެއްލުން ލިބިފައިވާ ކަމަށް އެ ރަށުން ރާއްޖެއެމްވީއާ ވާހަކަ ދެއްކި މީހަކު ބުންޏެވެ.
ދެކުނުގެ އަތޮޅުތަކަށް ރެއިން ފެށިގެން ޔެލޯ އެލާޓް ނެރެފައިވާއިރު، އެލާޓްގެ ވަގުތު މެންދުރު 12 އަށް ވަނީ އިތުރުކޮށްފަ އެވެ.
ދެކުނާއި މެދު ރާއްޖެތެރޭގެ އެކިހިސާބަށް ވިއްސާރަކުރާނެ ކަމަށައި ބައެއް ރަށްތަަކަށް ބޯކޮށް ވާރޭވެހި ގުގުރުން އެކަށީގެންވާކަމަށާއި އުތުރު އަތޮޅުތަކަށް ކެރީގެ އަސަރުފޯރުމަކީ އެކަށީގެންވާކަމެއް ކަމަށް ވެސް މެޓް އޮފީހުން ބުނެ އެވެ.
"ވައިޖެހޭނީ އިރުއުތުރާއި އިރުން، އުތުރާއި މެދުތެރޭ އަތޮޅުތަކަށް ގަޑިއަކު15 މޭލާއި 23 މޭލާއި ދެމެދުގެ ބާރުމިނުގައި، ދެކުނު އަތޮޅުތަކަށް ގަޑިއަކު 7 މޭލާއި 17 މޭލާއި ދެމެދުގެ ބާރުމިނުގައި ވައިޖެހޭނެ. އަދި ވިލާގަނޑުގައި ގަޑިއަކު 40 މޭލު ބާރުމިނަށް ވައިގަދަވުން އެކަށީގެންވޭ." މެޓް އޮފީހުން ބުނެއެވެ.
ރާއްޖޭގެ ކަނޑުތައް އުތުރާއާއި މެދުތެރޭ އަތޮޅުތަކުގެ ކަނޑުތައް ގަދަވާނެ ކަމަށާއި އަދި ދެކުނު އަތޮޅުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ވެސް މެޓް އޮފީހުން ބުނެއެވެ.
