ރައީސް އޮފީހުން އެންގުމުން، ޑެޕިއުޓީ އޭޖީގެ މަޤާމުން އުޝާމް އިސްތިއުފާ ދެއްވައިފި
އިސްތިއުފާ ދެއްވާފައިވަނީ ބުރާސްފަތި ދުވަހު
ޑެޕިއުޓީ އޭޖީގެ މަޤާމާ އުޝާމް ހަވާލުވެވަޑައިގަންނަވަނީ
އެޓާރނީ ޖެނެރަލް އޮފީހުގެ، ޑެޕިއުޓީ އެޓާރނީ ޖެނެރަލްގެ މަޤާމުން އަހުމަދު އުޝާމް އިސްތިއުފާދެއްވައިފި އެވެ.
އެ މަޤާމުން އުޝާމް އިސްތިއުފާ ދެއްވާފައިވަނީ ބުރާސްފަތި ދުވަހުއެވެ.
އުޝާމް ވިދާޅުވީ، ރައީސް އިބްރާހިމް މުހައްމަދު ސޯލިހް ވެރިކަމާ ހަވާލުވެ ވަޑައިގަތުމަށްފަހުވެސް ޑެޕިއުޓީ އޭޖީގެ މަޤާމުގައި ހުންނެވީ ރައީސްގެ އެދިލެއްވުމެއްގެ މައްޗަށް ކަމަށާއި، އަދި އިސްތިއުފާދެއްވާފައިވަނީ ރައީސް އޮފީހުގެ އެދިލެއްވުމެއްގެ މައްޗަށް ކަމަށެވެ.
ޑެޕިއުޓީ އޭޖީގެ މަޤާމަށް ރައީސް އިބްރާހިމް މުހައްމަދު ސޯލިހު ވަނީ ބުދަ ދުވަހު (އިއްޔެ) އާ ބޭފުޅަކު އައްޔަނު ކުރައްވާފައެވެ. އެގޮތުން އެ މަޤާމަށް އައްޔަންކުރައްވާފައި ވަނީ ޚަދީޖާ ޝަބީނެވެ.
ޑެޕިއުޓީ ސޮލިސިޓާ ޖެނަރަލްގެ މަޤާމުގައި ހުންނަވަނިކޮށް އުޝާމް ޑެޕިއުޓީ އެޓާރނީ ޖެނެރަލްގެ މަޤާމަށް އައްޔަނު ކުރައްވާފައިވަނީ 15 އޯގަސްޓް 2013 ގައެވެ. އޭގެ ކުރިން އުޝާމް ވަނީ ޑެޕިއުޓީ ސްޓޭޓް އެޓާނީއެއްގެ މަޤާމުވެސް ފުރުއްވާފައެވެ.
އޭގެ އިތުރުން، އުޝާމް ވަނީ ރައީސް މުހައްމަދު ނަޝީދުގެ ސަރުކާރުގައި ދައުލަތާ ދެކޮޅަށް އެކި ފަރާތްކުން ކޯޓަށް ހުށަހަޅާ މައްސަލަތަކުގައި ދައުލަތުގެ ދިފާއުގައި ވެސް ކޯޓުގައި ވަކާލާތު ކުރައްވާފައެވެ.
