އިންޑިޔާ އިން ދީފައިވާ ދެ ހެލިކޮޕްޓަރު އަލުން ބޭނުންކުރަން ފަށައިފި
3 ޖެނުއަރީ 2019 | ބުރާސްފަތި 11:30ހެލިކޮޕްޓަރުން ގެނެސްފައިވަނީ ޅ. ކުރެންދޫ ހާލުބޮޑު ބަލި މީހެއް
އިންޑިޔާ ސަރުކާރުން ދީފައިވާ ހެލިކޮޮޕްޓަރު
އިންޑިޔާ ސަރުކާރުން ހަދިޔާކޮށްފައިވާ ދެ ހެލިކޮޕްޓަރު ބޭނުންކުރުން ހުއްޓާލާފައި އޮންނަތާ ގިނަ ދުވަސްތަކެއް ފަހުން އަލުން ބޭނުންކުރަން ފަށައިފިއެވެ.
ހެލިކޮޕްޓަރު ބޭނުންކުރުން ހުއްޓާލީ، ރައީސް އަބްދުﷲ ޔާމީންގެ ވެރިކަމުގެ ފަހުކޮޅުގައި އިންޑިއާ ސަރުކާރާއި ދިވެހި ސަރުކާރުގެ ގުޅުން ގޯސްވެ ހެލިކޮޕްޓަރުތައް އަނބުރާ ގެންދިއުމަށް އިންޑިއާ ސަރުކާރަށް އެންގުމާ ގުޅިގެންނެވެ.
ހެލިކޮޕްޓަރުތައް ބޭނުންކޮށްގެން އެމްއެންޑީއެފް އިން ބުރާސްފަތި ދުވަހު މާލެ ގެނެސްފައި ވަނީ ޅ. ކުރެންދޫ އިން ހާލުބޮޑު ބަލި މީހެކެވެ. އުމުރުން ދުވަސްވެފައިވާ ހާލު ބޮޑު ބަލިމީހާ އިތުރު ފަރުވާއަށް މާލެ ގެނައި ހެލިކޮޕްޓަރު ޖައްސާފައި ވަނީ ބުރާސްފަތި ދުވަހު މެންދުރު އުސްފަސްގަނޑު ސަރަހައްދަށެވެ.
އިދިދެކޮޅު ފަރާތްތަކުން ބުނެފައި ވަނީ، އިންޑިޔާ ސަރުކާރުން ހެލިކޮޕްޓަރުތައް ބޭނުންކުރަނީ ޖާސޫސްކުރަން ކަމަށެވެ.
ނަމަވެސް އެމްއެންޑީއެފް އިން ބުނެފައި ވަނީ އިންޑިޔާގެ ހެލިކޮޕްޓަރު ރާއްޖޭގައި ބޭނުންކުރަމުން އަންނަނީ ރާއްޖޭގެ އިގްތިސާދީ ސަރަހައްދު ބެލެހެއްޓުމާއި، ހިއުމަނިޓޭރިއަން އެސިސްޓެންޓް ގްރައުންޑްގައި ކަމަށެވެ. ބަލި ހާލު ބޮޑުވެގެން އެތައް ބަޔަކު އުފުލައި، އެ މީހުންގެ ފުރާނަ ސަލާމަތްކުރަން ހެލިކޮޕްޓަރުތަކުގެ ބޭނުންކޮށްފައިވާ ކަމަށް އެމްއެންޑީއެފްއިން ވަނީ ބުނެފައެވެ.
