ގާނޫނުން ލާޒިމު ނުކުރިޔަސް ރައީސް އޮފީހުގެ ސިޔާސީ ބޭފުޅުންގެ މާލީ ބަޔާން އާންމުކުރަނީ!
3 ޖެނުއަރީ 2019 | ބުރާސްފަތި 06:29އެކަން ކުރަނީ އޭސީސީއާއި ޓްރާންސްޕޭރެންސީ ގެ މަޝްވަރާއާއެކު
ރައީސް އޮފީހަށް އައްޔަނުކުރެއްވި އިސް ވެރިންނާއި ރައީސް ބައްދަލުކުރުން
ރައީސް އޮފީހުގެ އެކިއެކި ސިޔާސީ މަޤާމުތަކުގައި ތިއްބެވި ބޭފުޅުންގެ މާލީ ބަޔާން އަންނަ ހަފްތާގައި އާންމުކުރައްވާނެ ކަމަށް އެ އޮފީހުން ބުނެފިއެވެ.
އާ ސަރުކާރުގެ 100 ދުވަހުގެ ވައުދުތަކުގެ ތެރެއިން ފުރަތަމަ 30 ދުވަހުގައި ހާސިލުވި ކަންކަމާ ގުޅޭގޮތުން މައުލޫމާތު ދެއްވުމަށް ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އިބްރާހިމް މުހައްމަދު ސޯލިހުގެ ތަރުޖަމާނު އިބްރާހިމް ހޫދު ވިދާޅުވީ، އޭސީސީއާއި ޓްރާންސްޕޭރެންސީ މޯލްޑިވްސްގެ މަޝްވަރާއާއެކު، އެ މަޤާމުތަކުގައި ތިއްބެވި ބޭފުޅުންގެ މާލީ ބަޔާން އާންމުކުރަން ނިންމަވާފައިވާ ކަމަށެވެ.
މާލީ ބަޔާނުގައި ހިމަނަންޖެހޭ ކަންކަމުގެ މަޝްވަރާ އެ މުއައްސަސާތަކުން ހޯދަމުންދާ ކަމަށްވެސް ހޫދު ވަނީ ވިދާޅުވެފައެވެ.
ސިޔާސީ މަގާމުތަކަށް އައްޔަންކުރާ ފަރާތްތަކުގެ މާލީ ބަޔާނާއި ކުށުގެ ރެކޯޑް ސާފު ކުރުމަށް ހާއްސަ ފޯމެއް ރައީސް އޮފީހުން ވަނީ ތައާރަފްކޮށްފަ އެވެ.
ވަޒީރުންގެ މަޖިލީހުގެ ކޮންމެ މެމްބަރަކު އަހަރަކު އެއްފަހަރު އެ ބޭފުޅުންގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، ވިޔަފާރީގެ މަސްލަހަތުތަކާއި، އަރަންޏާއި ދަރަނި ހާމަކޮށް ތައްޔާރުކުރާ މާލީ ބަޔާން އޮޑިޓަރ ޖެނެރަލް އަށް ހުށައެޅުމަށް ޤާނޫނު އަސާސީގެ 138 ވަނަ މާއްދާ އިން ވަނީ ލާޒިމުކޮށްފައެވެ. ރައީސުލްޖުމްހޫރިއްޔާ ވެސް ކޮންމެ އަހަރަކު މާލީ ބަޔާން ހުށަހަޅަން ޖެހޭނެ ކަމަށް ގާނޫނުއަސަސީގެ 120 ވަނަ މާއްދާގައި ވަނީ ބުނެފައެވެ. ނަމަވެސް ސިޔާސީ އެހެން މަގާމުތަކުގައި ތިއްބަވާ ބޭފުޅުން މާލީ ބަޔާން ހުށަހެޅުމަކީ ގާނޫނު ލާޒިމުކޮށްފައިވާ ކަމެއް ނޫނެވެ.
