ބަންގްލަދޭޝްގެ އާއްމު އިންތިޚާބު ފަށައިފި

ބަންގްލަދޭޝްގެ އާއްމު އިންތިޚާބުގެ ވޯޓުލުން އާދީއްތަ ދުވަހުގެ ހެނދުނު ފަށައިފިއެވެ.

ޖުމްލަ 40،000 އަށް ވުރެ ގިނަ ވޯޓްލާ މަރުކަޒުގައި ވޯޓުލުން ކުރިޔަށް ގެންދާއިރު މި އިންތިޚާބުގައި ވޯޓްލުމަށް 104 މިލިއަނަށް ވުރެ ގިނަ މީހުން ރަޖިސްޓްރީކޮށްފައި ވެއެވެ.

ބަނގްލަދޭޝްގެ ގަޑިން ހެނދުނު 8:00 ގައި ވޯޓްލުން ފެށިފައިވާއިރު ވޯޓްލާ މަރުކަޒުތައް ބަންދުކުރާނީ ހަވީރު 4:00 ގައެވެ.

ޖެހިޖެހިގެން ތިންވަނަ ދައުރަކަށް ކުރިމަތިލައްވާފައިވާ މިހާރުގެ ބޮޑުވަޒީރު ޝެއިޚް ހަސީނާ ވަނީ ވެރިރަށް ޑާކާގައި ހެނދުނު ވޯޓް ލައްވާފައެވެ.

"އަޅުގަނޑުމެން ޑިމޮކްރަސީ ގަބޫލުކުރަން އަދި ރައްޔިތުންގެ ނިންމުން ބަލައިގަންނާނަން" ހަސީނާ ވިދާޅުވިއެވެ.

ޖަޓިޔާ ސަންގްސާދުގެ ނަން ދީފައިވާ އެ ގައުމުގެ ގާނޫނުހަދާ މަޖިލީހަށް މި އިންތިޚާބުގައި 299 މަންދޫބުން އިންތިޚާބުކުރެއެވެ.

އެއް ދާއިރާއެއްގައި ވޯޓް ނެގުން ކުރިޔަށް ނުގެންދަނީ އެ ދާއިރާއަށް ކުރިމަތިލީ ކެނޑިޑޭޓަކު މަރާލާފައިވާތީއެވެ.

ވެރިކަން ކުރާ އަވާމީ ލީގް (އޭއެލް) ޕާޓީގެ އިއްތިހާދު، ގްރޭންޑް އެލަޔަންސް އާއި އިދިކޮޅު ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ގެ އިދިކޮޅު އިއްތިހާދުން ޖުމްލަ 1841 ކެނޑިޑޭޓުން އިންތިޚާބުގައި ވާދަކުރެއެވެ.

ހަމަނުޖެހުން ހިންގަފާނެކަމުގެ ބިރު ހީވެފައިވާއިރު ސަލާމަތީ ކަންކަމަށް އަސްކަރިއްޔާ ހިމެނޭ ގޮތުން 600،000 އެއްހާ އޮފިޝަލުން ނެރެފައި ވެއެވެ.