ޒީރޯއަށް ހަފްތާ ބަންދުގައި ލިބުނު އާމްދަނީ ދަށަށް ހިނގައްޖެ

މިދިޔަ ހުކުރު ދުވަހު ރިލީޒްކުރި ޝާހުރުކް ޚާންގެ ފިލްމް "ޒީރޯ" އަށް ހަފްތާ ބަންދުގައި ލިބުނު އާމްދަނީ ދަށަށް ހިނގައްޖެއެވެ.

ޝާހުރުކް ޚާންގެ އިތުރުން އަނުޝްކާ ޝާރުމާ އާއި ކެޓްރީނާ ކެއިފް ލީޑް ރޯލުން ފެނިގެންދާ މި ފިލްމަށް, ރިލީޒްކުރި ދުވަހު ބޮކްސް އޮފީހުގައި އާމްދަނީގެ ގޮތުގައި ލިބިފައި ވަނީ 20.14 ކްރޯޑް އިންޑިއަން ރުޕީސްއެވެ.

ޓްރޭޑް އެނަލިސްޓް ތަރަން އާދާޝް އަންދާޒާ ކޮށްފައިވަނީ މި ފިލްމް ރިލީޒް ކުރާ ދުވަހު އާމްދަނިގެ ގޮތުގައި 30 ކްރޯޑް ރުޕީސް ލިބޭނެ ކަމަށެވެ. އަދި ހަފްތާ ބަންދާއި ކްރިސްމަސް ޑޭ ކަމަށް ވާ އަންގާރަ ދުވަހު މި ފިލްމަށް ލިބޭ އާމްދަނީ އިތުރުވެގެން ދާނެ ކަމަށް ލަފާ ކުރެވޭ ކަމަށް ވަނީ ބުނެފައެވެ.

ނަމަވެސް ހޮނިހިރު ދުވަހު މި ފިލްމަށް އާމްދަނީގެ ގޮތުގައި ލިބިފައި ވަނީ 18.22 ކްރޯޑް ރުޕީސްއެވެ. އަދި އާދިއްތަ ދުވަހު ލިބިފައި ވަނީ 18.25 ކްރޯޑް ރުޕީސްއެވެ.

އާނަންދް އެލް ރާއީ ޑައިރެކްޓް ކޮށްފައިވާ މި ފިލްމަށް މިހާތަނަށް ޖުމްލަ އާމްދަނީގެ ގޮތުގައި ލިބިފައި ވަނީ 54.5 ކްރޯޑް ރުޕީސްއެވެ.

200 ކްރޯޑް ގެ ބަޖެޓަކުން ހަދާފައިވާ މި ފިލްމަށް އިންޓްނޭޝަނަލް މާކެޓްގައި ވެސް މާބޮޑު ތަރުހީބެއް ލިބިގެން ގޮސްފައެއް ނުވެއެވެ.

"ޒީރޯ" ވެގެން ގޮސްފައި ވަނީ މިއަހަރު ރިލީޒް ކުރި ފިލްމްތަކުގެ ތެރެއިން ފަސް ވަނަ އަށް އެންމެ ބޮޑު އާމްދަނީއެއް ލިބިގެން ދިޔަ ފިލްމަށެވެ. މިއަހަރު އެންމެ ބޮޑު އާމްދަނީއެއް ލިބިފައިވާ ފިލްމް ތަކުގެ ލިސްޓްގައި ހިމެނެނީ "ޕަދްމާވަތީ"، "ރޭސް3"، "ސަންޖޫ" އަދި "ތަގްސް އޮފް ހިންދުސްތާން" އެވެ.