ފަރަންސޭސި ވިލާތުގެ ފުލުހުންގެ މުސާރަ ބޮޑުކުރަން ނިންމައިފި

ފަރަންސޭސި ވިލާތުގެ ފުލުހުންގެ މުސާރަ ބޮޑުކުރަން ނިންމައިފި އެވެ.

ފުލުހުންގެ މުސާރަ ބޮޑުކުރަން ހަމަޖެއްސިކަން އިއުލާން ކޮށްފައިވަނީ ބުދަ ދުވަހު އެ ގައުމުގެ އިންޓީރިއާ މިނިސްޓަރު ކްރިސްޓޮޕާ ކަސްޓަނާ ނެރުއްވި ބަޔާނެއްގައިއެވެ.

އެފަދަ ބަޔާނެއް ނެރެފައި މިވަނީ ފަރަންސޭސި ވިލާތުގައި މިހާރު ކުރަމުންދާ ''ޔެލޯ ވެސްޓް'' މުޒާހަރާގައި ހަރަކާތްތެރިވާ ފުލުހުން ޑިއުޓީ އަދާ ކުރަންޖެހޭ ވަގުތު ގިނަވާތީ އެކަމުގެ ޝަކުވާކޮށްފައިވާ ދަނޑިވަޅެއްގައިއެވެ.

ރިޕޯޓްތައް ބުނާ ގޮތުގައި އިންޓީރިއާ މިނިސްޓްރީ އިން މިކަން އިއުލާން ކޮށްފައިވަނީ ޓްރޭޑް ޔޫނިއަން ތަކާއެކު ކުރެވުނު މަޝްވަރާތަކަކަށް ފަހުއެވެ.

ކަސްޓަނާ ވިދާޅުވީ އެއްބަސްވުމުގެ ދަށުން ފުލުހުން މަސައްކަތް ކުރާ ތަންތަނަށް ވެސް ބޮޑެތި ބަދަލު ތަކެއް ގެންނާނެ ކަމަށެވެ. ނަމަވެސް މުސާރަ ބޮޑުވެގެން ދާނީ ކިހާވަރެއް ކަމެއް އޭނާ ބުނެފައިއެއް ނުވެއެވެ.

އިންޓީރިއާ މިނިސްޓަރު ކްރިސްޓޮޕާ ޔޫނިއަން އޮފިޝަލަކާއި ހަވާލާދީ ރިޕޯޓްތައް ބުނާ ގޮތުގައި އަންނަ އަހަރުން ފެށިގެން ފުލުސް އޮފިސަރުންނަށް 120 ޔޫރޯ (137 ޑޮލަރު) އަދި ސީނިއާ އޮފިސަރުންނަށް 150 ޔޫރޯ (171 ޑޮލަރު) މުސާރައަށް އިތުރުވެގެން ދާނެ ކަމަށެވެ.