ސޯމާލިއާގެ އިންޓެލިޖެންސްގެ ވެރިޔާ އާއި ފުލުހުންގެވެރިޔާ މަގާމުން ވަކިކޮށްފި

ވެރިރަށް މޮގަދިޝޫގައި ދިން ހަމަލާއެއްގައި 25 މީހުން މަރާލިތާ އެއްދުވަސް ތެރޭ ސޯމިލާގެ ސަރުކާރުން އެ ގައުމުގެ އިންޓެލިޖެންސްގެ ވެރިޔާ އާއި ޕޮލިސް ކޮމިޝަނަރ މަގާމުން ވަކިކޮށްފިއެވެ.

އަބްދުﷲ މުހައްމަދު ސަންބަލޫޝީ އަދި އަބްދުހަކީމް ދާހިރް މަގާމުން ވަކިކޮށްފައި މިވަނީ މިމަހުގެ ކުރީކޮޅު އެގައުމުގައި ދިން ބޮމުގެ ހަމަލާއެއްގައި 300 އަށްވުރެ ގިނަ މީހުން މަރުވި ހާދިސާއަށް ފަހު ޑިފެންސް މިނިސްޓަރ އަދި އިންޓެލިޖެންސް ފޯސްގެ ޗީފް އޮފް ސްޓާފް މަގާމުން އިސްތިއުފާ ދެއްވާފައިވަނިކޮށެވެ.

ގޮވާތަކެތި އަރުވާ ފުރާފައި އޮތް ލޮރީއެއް ހޮޓަލެއްގެ ދޮރުމަތީގައި ގޮއްވާލައިގެން ދިން އެ ހަމަލާއަކީ 2007 ވަނަ އަހަރު ސޯމާލިއާގެ އަލް ޝަބާބުން ހަމަނުޖެހުން ހިންގަން ފެށިފަހުން އެ ގައުމުގައި ދެވުނު އެންމެ ގެއްލުން ބޮޑު ޓެރެރިސްޓް ހަމަލާއެވެ.

ސަލާމަތީ ކަންކަމާއި ސިޔާސީ މުޝީރެއް ކަމަށްވާ މުހައްމަދު ޝައަރ ވިދާޅުވީ ސަރުކާރަށް އެފަދަ ހަމަލާތަށް ނުހުއްޓުވެނީ ސޯމާލިއާގެ ސަލާމަތީ އިދާރާތަކުގެ ގާޑުން އަބަދު ބަދަލުވަމުން ދިއުމުގެ ސަބަބުންނެވެ.

މިގެ އިތުރުން ވަސީލަތްތައް މަދުވުމާއި އިންޓެލިޖެންސްގެ ގާބިލްކަން ކުޑަވުމުގެ ސަބަބުންކަމަށް އަލްޖަޒީރާގައި ވާހަކަދައްކަވަމުން އޭނާ ވިދާޅުވިއެވެ.

އެންމެ ފަހުން ހޮނިހިރު ދުވަހު ދިން ހަމަލާގެ ޒިންމާ ސޯމާލިއާގެ ހަނގުރާމަވެރި ޖަމާއަތް. އަދި ބައިނަލްއަގްވާމީ މުޖުތަމައުއިން ބަލައިގެންފައިވާ އެ ގައުމުގެ ސަރުކާރު ވައްޓާލަން މަސައްކަތްކުރާ އަލް ޝަބާބުން ވަނީ ނަގާފައެވެ.

ދުވާލުގެ ވަގުތުގައި މި ހަމަލާދީފައިވަނީ ކާރު ބޮމެއް ގޮއްވާލައިގެން ޖާނުން ފިދާވި މީހާ ދުއްވާފައި ގޮސް ނާސާ ހަބޮލްޑް ހޮޓަލުގެ ތެރެއަށް ވައްދާލައިގެންނެވެ.

އެ ހޮޓަލަކީ ރައީސް މުހައްމަދު އަބްދުﷲ ފަރްމަޖޯ އެ ގައުމުގެ ފެޑެރަލް ފަސް ސްޓޭޓެއްގެ ވެރިންނާއެކު ހޮނިހިރު ދުވަހު ބައްދަލުވުމެއް ބޭއްވުމަށް ހަމަޖެހިފައި އޮތް ހޮޓަލެވެ.

ގޮވާތަކެތި އަރުވާފައިވާ އިތުރު ވެހިކަލަކުންވަނީ އެ ހޮޓަލާ އިންވެގެން ހުރިތަނެއްގައި ގޮއްވާލާފައެވެ. ހަމަލާ ދިން މީހުން އޭގެ ފަހުންވަނީ ހޮޓަލަށް ހަމަލާދީ މީހުން ރަހީނުކޮށްފައެވެ. ހިސާރު ނައްތާލުމަށް ސަލާމަތީ ފައުޖުތަކަށް 10 ގަޑިއިރު ހޭދަކުރަން ޖެހުނެވެ.

ހަމަލާދިން އިރު ރައީސް ފަރްމަޖޯ ހޮޓަލަށް ވަޑައިގެންފައެއް ނުވެއެވެ.

ހަމަލާދިން މީހުންގެ ތެރެއިން ދެ މީހަކު މަރާލައި ތިން މީހަކު ދިރިހުއްޓައި ހައްޔަރުކޮށްފައިވާކަމަށް މިނިސްޓްރީ އޮފް ސެކިއުރިޓީގެ ތަރުޖަމާނު އަބްދުލް އަޒީޒް އަލީ އާދީއްތަ ދުވަހ ވިދާޅުވިއެވެ.