ފިލިޕީންސްގެ ފުލުހުން 2015 ވަނަ އަހަރު ކުރިޔަށް ގެންދިޔަ އޮޕަރޭޝަނެއްގައި އިހުމާލުވެފައިވާ ކަމަށް ބުނެ އެގައުމުގެ ކުރީގެ ރައީސް ބެނީގްނޯ އަކީނޯގެ މައްޗަށް ދައުވާ ކުރަން އެގައުމުގެ އެންޓި ކޮރަޕްޝަން ކޮމިޝަނުން ހުށަހަޅައިފިއެވެ.

އޮމްބުޑްސްމަންގެ އޮފީހުން ބުދަ ދުވަހު އަކީނޯގެ މައްޗަށް ދައުވާ އުފުލީ ބޮން ހަދާ ކަމަށް ތުހުމަތު ކުރެވޭ މީހަކު ހައްޔަރު ކުރުމަށް ހިންގި އޮޕަރޭޝަންގައި، އޭރު ސަސްޕެންޑްކޮށްފައި ހުރި ފުލުހުންގެ ވެރިޔާ ކޮމާންޑަރަކަށް ހަމަޖައްސާފައިވާތީއެވެ.

ފިލިޕީންސްގެ މިންޑަނާއޯގެ މަމަސަޕަނޯގައި ޖެނުއަރީ 2015ގައި ކުރިޔަށް ގެންދިޔަ އެ އޮޕަރޭޝަނުގައި 44 ފުލުހަކު މަރުވިއެވެ. އަދި އެތައް ބަޔަކު ޒަހަމްވި އެވެ.

ކުރީގެ ރައީސް އަކީނޯގެ މައްޗަށް ކޮށްފައިވަނީ މަކަރާ ހީލަތުން މަގާމުގެ ބާރު ބޭނުންކުރި ކަމުގެ ދައުވާއެވެ.

ފިލިޕީންސްގެ ގިނަ ރައީސުންނެކޭ އެއްގޮތަށް ރައީސް އަކީނޯވެސް މަސައްކަތް ކުރައްވަން ބޭނުންފުޅުވީ ގާތް ރައްޓެހިންނާ އެކުއެވެ.

ރައީސް އަކީނޯއަށް 1،000 އެމެރިކާ ޑޮލަރު ދައްކައިގެން ކަފާލާތުގެ ދަށުން ސަލާމަތް ވުވެން އޮތުމުން، ޖަލަށް ވަޑައިގަންނަވަން ޖެހުމުގެ ފުރުސަތު ކުޑައެވެ.