ރައީސް ޓްރަމްޕްގެ މުސާރަ ޕާކްތައް މަރާމާތު ކުރުމަށް

އެމެރިކާގެ ރައީސް ޑޮނަލްޑް ޓްރަމްޕްގެ ފުރަތަމަ ތިން މަސް ދުވަހުގެ މުސާރަ ނޭޝަނަލް ޕާކްސް ސާވިސަސް އަށް ދެއްވައިފި ކަމަށް ވައިޓް ހައުސްގެ ތަރުޖަމާނު ވިދާޅުވެއްޖެއެވެ.

ޝޯން ސްޕައިސަރ ހޯމަ ދުވަހު ވިދާޅުވީ ޕާކްތަކާއި މޮނިއުމަންޓްތައް ބަލަހައްޓަވާ އިންޓީރިއާ ސެކްރެޓަރީއާ ހޯމަ ދުވަހު 78،333 އެމެރިކާ ޑޮލަރުގެ ޗެކެއް ހަވާލުކޮށްފައިވާނެ ކަމަށެވެ.

ރައީސް ޓްރަމްޕް ވަނީ އެ މަނިކުފާނުގެ އަހަރުދުވަހުގެ މުޅި މުސާރަ ހަދިޔާ ކުރައްވާނެ ކަމަށް ވިދާޅުވެފައެވެ. ނަމަވެސް ފާޑުކިޔާ ފަރާތްތަކުން ބުނެފައިވަނީ އެ ޑޮނޭޝަން ގޮސްފައިވަނީ ބިލިއަނަކަށް ވުރެ ގިނަ ޑޮލަރުގެ ފަންޑިންގ ކަނޑާލުމަށް އެ މަނިކުފާނު ނިންމަވާފައިވާ އޭޖެންސީއަކަށް ކަމަށެވެ.

އެމެރިކާގެ ޕާކްތައް ބަލަހައްޓާ އިންޓީރިއާ ޑިޕާޓްމަންޓްގެ ބަޖެޓުން 12 ޕަސެންޓް (1.5 ބިލިއަން ޑޮލަރު) ކަނޑާލުމަށް ރައީސް ޓްރަމްޕްގެ ބަޖެޓް ޕްރޮޕޯސަލްގައި ހިމެނެއެވެ.

ޓްރަމްޕް ދެއްވާ ފައިސާ ޚަރަދު ކުރެވިގެންދާނީ ޕާކްތައް މަރާމާތު ކުރުމަށެވެ.

އެމެރިކާގެ ރައީސްކަމުގެ މަގާމު އަދާ ކުރައްވާ ބޭފުޅަކަށް މުސާރައިގެ ގޮތުގައި އަހަރަކު 400،000 ޑޮލަރު ލިބިގެންދާނެއެވެ. މުސަރާ ނުނަންގަވާ ބޭފުޅަކު ނަމަވެސް ރަމްޒީ ގޮތުން މުސާރައިގެ ގޮތުގައި އެއް ޑޮލަރު ނަންގަވަން ޖެހިވަޑައިގަންނަވާނެއެވެ.